رەسەيدە ادام باسىنا 0,56 شارشى مەتردەن كەلسە, بۇل كورسەتكىش بەلارۋسيادا 0,45, وزبەكستاندا 0,36-عا تەڭ. ۆەدومستۆو تاراتقان دەرەككە سۇيەنسەك, بىلتىر قازاقستاندا بارلىق قارجىلاندىرۋ كوزدەرى ەسەبىنەن 15,3 ميلليون شارشى مەتر باسپانا پايدالانۋعا بەرىلگەن. بۇل 2019 جىلمەن سالىستىرعاندا 16,8 پايىزعا ارتىق ەكەن.
ەندى ازاماتتاردىڭ بجزق-دان زەينەتاقى جيناعىنىڭ ءبىر بولىگىن الا باستاۋى دا تۇرعىن ۇيگە دەگەن سۇرانىستى ارتتىرا ءتۇسۋى مۇمكىن. وسىلايشا, ەلىمىز ەكىنشى جىل قاتارىنان باسپانا سالۋ بويىنشا قارا ءۇزىپ الدا كەلەدى.
«نۇرلى جەر» مەملەكەتتىك تۇرعىن ءۇي-كوممۋنالدىق دامۋ باعدارلاماسىنىڭ شەڭبەرىندە حالىققا قولايلى تۇرمىستىق جاعدايلار جاساۋ, تۇرعىن ءۇيدىڭ قول جەتىمدىلىگى مەن جايلىلىعىن ارتتىرۋ, سونداي-اق تۇرعىن ءۇي ينفراقۇرىلىمىن دامىتۋ – مەملەكەتتىك ساياساتتىڭ باسىم باعىتى, – دەيدى قۇرىلىس جانە تۇرعىن ءۇي-كوممۋنالدىق شارۋاشىلىق ىستەرى كوميتەتىنىڭ توراعاسى مارحابات جايىمبەتوۆ.
بىلتىر ماۋسىم ايىندا يندۋستريا جانە ينفراقۇرىلىمدىق دامۋ ءمينيسترى بەيبىت اتامقۇلوۆ تۇرعىن ءۇي قۇرىلىسى قارقىنىنىڭ باسەڭدەپ قالعانىن ايتقان بولاتىن. «بەس ايدىڭ قورىتىندىسى بويىنشا 4 075 000 شارشى مەتر باسپانا پايدالانۋعا بەرىلدى. بۇل 2019 جىلعى كورسەتكىشتىڭ 88,4 پايىزى عانا. قازىر رەسپۋبليكا بويىنشا 33 479 تۇرعىن ءۇي سالىندى, ونىڭ ىشىندە 14 209-ى جەكە ۇيلەر» دەگەن ەدى مينيستر.
ءاۋ باستا مينيسترلىكتىڭ جوسپارى 2020 جىلى 14,1 ملن شارشى مەتر تۇرعىن ءۇي سالىپ ءبىتىرۋ بولعان. بۇل تۋرالى بىلتىر اقپاندا ۆيتسە-مينيستر قايىربەك وسكەنباەۆ ايتقان. ال مينيسترلىك بۇل جوسپارىن اسىرا ورىنداپ, سالىنىپ بىتكەن تۇرعىن ءۇي كولەمىن 15,3 ملن شارشى مەترگە جەتكىزىپ ءبىر-اق توقتاعان. بۇدان اڭعارعانىمىز – قازاقستان 7 ايدا (ماۋسىم ايىنان بەرى) 11 ملن شارشى مەتردەن استام باسپانانى سالىپ, پايدالانۋعا ۇسىنعان. ارينە, قارجىسىز ءىس بىتپەيدى. مينيسترلىكتىڭ جىل باسىنداعى جوسپارى ورىندالۋ ءۇشىن بيۋدجەتتەن تىس قارجى كوزىنەن قوسىمشا 390 ملرد تەڭگە بولىنگەن.
جالپى, 2020 جىلدىڭ قاڭتار-قاراشا ايلارى ارالىعىندا تۇرعىن ءۇي قۇرىلىسىنا 1 ترلن 700,5 ملرد تەڭگە جۇمسالعان. بۇل سوما 2019 جىلمەن سالىستىرعاندا 33,4 پايىزعا كوپ.
قازاقستاندا كوپقاباتتى ءۇيدىڭ 1 شارشى مەترىنە كەتەتىن شىعىن 143,4 مىڭ تەڭگە بولسا, جەكە قۇرىلىس كومپانيالارى سالعان تۇرعىن ۇيلەردە 1 شارشى مەتر 91,5 مىڭ تەڭگەگە باعالانادى.
