قازاقستان • 26 قاڭتار، 2021

پرەزيدەنت باتىس قازاقستان وبلىسىن ەلەكترمەن جابدىقتاۋداعى كەمشىلىكتەردى اتادى

7 رەت كورسەتىلدى

بۇگىن ۇكىمەتتىڭ كەڭەيتىلگەن وتىرىسىندا قازاقستان پرەزيدەنتى قاسىم-جومارت توقاەۆ باتىس قازاقستان وبلىسىن ەلەكترمەن جابدىقتاۋداعى كەمشىلىكتەردى اتادى، دەپ حابارلايدى Egemen.kz

«وبلىستاعى ەلەكتر جەلىلەرىنىڭ 80 پايىزى توزعان. بەلگىلى نارسە. اپاتتار ءجيى بولىپ، ەلەكتر قۋاتى قايتا-قايتا ۇزىلە بەرەدى. مىسالى، 2020 جىلى 182 رەت ەلەكتر قۋاتى ۇزىلگەن. بۇل ماسەلەنى شەشۋ ءۇشىن قانداي شارالار قابىلدانۋدا؟»،  دەپ  مەملەكەت باسشىسى اتالعان ءوڭىردىڭ اكىمى عالي ەسقاليەۆتەن سۇرادى.

وبلىس باسشىسى وڭىردەگى اۋىلدىق ەلدى مەكەندەردىڭ سانىنا بايلانىستى ەلەكتر جەلىسىنىڭ ۇزاقتىعى 20 مىڭ شاقىرىمنان اساتىندىعىن جانە توزۋى 80 پايىزعا جۋىقتايتىنىن جاسىرمادى.

«سونىڭ كەسىرىنەن ەلدى مەكەندەردە، اسىرەسە اۋىلداردا ەلەكترمەن جابدىقتاۋ تۇراقسىز بولىپ تۇر. سونىمەن قاتار ەكى اۋدانىمىز ەلەكتر قۋاتىن رەسەيدەن ساتىپ الىپ وتىر. ياعني، ەلەكتر جەلىلەرىن قالپىنا كەلتىرۋ جانە 2 اۋدانعا ەلەكتر جەلىسىن تارتۋ وزەكتى ماسەلە. ونى شەشۋ ءۇشىن ءتيىستى ءىس-شارانى قولدانىپ جاتىرمىز. قازىرگى كەزدە ۇكىمەتتىڭ قولداۋىمەن ايماقتىق ەلەكتر تاراتۋ كومپانياسىنىڭ اكتسيالارى كوممۋنالدىق مەنشىككە الىنۋدا. كەيىن ۇكىمەتپەن كەلىسىپ، ەلەكتر جەلىلەرىن قالپىنا كەلتىرۋ ءۇشىن «نۇرلى جەر» باعدارلاماسىنا ءتيىستى وزگەرتۋلەر ۇسىناتىن بولامىز»، دەپ جاۋاپ بەردى وبلىس اكىمى.

سوڭعى جاڭالىقتار

ۇقساس جاڭالىقتار