قور بيرجاسىنداعى قوڭدىلار

قازاقستان قور بيرجاسىنىڭ ءباسپا­سوز قىزمەتى تاراتقان رەسمي مالىمەتكە سۇيەنسەك، وتكەن جىلى اكتسيالارى جاقسى ءوسىم كورسەتكەن كومپانيالاردىڭ ۇشتىگىنە «قازاتومونەركاسىپتەن» بولەك، «KAZ Minerals PLC» جانە «كسەلل» كومپانيا­لارى ەنگەن.

KASE-ءنىڭ دەرەگىنشە، 2020 جىلدىڭ ناۋرىز ايىندا «قازاتومونەركاسىپتىڭ» ءبىر اكتسياسىنىڭ قۇنى 4 707 تەڭگەگە دەيىن تومەندەگەن. بۇعان جاھاندىق قور يندەكستەرى مەن شيكىزات باعاسىنىڭ قۇلدىراۋى سەبەپ بولدى. كەيىن ۋران باعاسى ءوستى. تيىسىنشە، كومپانيا اكتسيالارى دا قىمباتتاي باستادى. 2021 جىلدىڭ 20 قاڭتارىنداعى جاعدايعا سۇيەنسەك، ۇلتتىق اتوم كومپانياسىنىڭ ءبىر اكتسياسى 7 927 تەڭگەگە ساتىلۋدا. دەمەك، اكتسيانىڭ قۇنى 2021 جىلدىڭ باسىنان بەرى 2،81 پايىزعا قىمباتتاعان.

2020 جىلى «KAZ Minerals PLC» كومپانياسىنىڭ اكتسيالارى 33،2 پايىزعا وسكەن. وسىلايشا، كومپانيا KASE يندەكسىندە ءوسىم جاعىنان ەكىنشى ورىنعا يە بولدى. قور بيرجاسىنىڭ مالىمەتىنشە، كومپانيانىڭ اكتسيالارى نەگىزىنەن وتكەن جىلدىڭ قازان-جەلتوقسان ارالىعىندا جاقسى ءوسىم كورسەتكەن. ناقتىراق ايتساق، ءدال وسى ارالىقتا بىردەن 15،2 پايىزعا قىم­باتتاعان. «KAZ Minerals PLC» اكتسيا­لارىنىڭ قىمباتتاۋىنا الەمدىك نارىق­تاعى مىس باعاسىنىڭ وڭ دينامي­كاسى اسەر ەتتى. 2021 جىلدىڭ 20 قاڭتارىنداعى جاعداي بويىنشا، كومپانيانىڭ اكتسيا­لارى وسى جىلدىڭ باسىنان بەرى 2،36 پا­يىز­عا ءوسىپ، ءبىر اكتسيا 3 997 تەڭگەگە ساتىلۋدا.

ۇزدىك ۇشتىكتى «كسەلل» اكتسيونەرلىك قوعامى تۇيىندەگەن. كومپانيانىڭ اكتسيا­لارى 2020 جىلى 18،5 پايىزعا وسكەن. اسىرەسە وتكەن جىلدىڭ 30 جەلتوقسانىندا ەرەكشە ءوسىم كورسەتىپ، ءبىر اكتسيانىڭ قۇنى 2 780 تەڭگەگە دەيىن جەتكەن. «كسەلل» اكتسيالارى بيىل دا جاقسى ءوسىم كورسەتۋدە. قازىر ونىڭ ءبىر اكتسياسىن 2 839 تەڭگەگە ساتىپ الۋعا بولادى.

جالپى، وتكەن جىلى KASE يندەكسىنىڭ ءمانى 13،2 پايىزعا، ياعني 2 675،58 پۋنكتكە دەيىن وسكەن. جىل قورىتىندىسى بويىنشا يندەكستىك اكتسيالارمەن جاسالعان ساۋدا-ساتتىقتىڭ جيىنتىق كولەمى 150،4 ملرد تەڭگەنى قۇرادى. كورسەتكىش 2019 جىل­مەن سالىستىرعاندا 39 پايىزعا ارتقان.

– اكتسيالار نارىعىن كاپيتالداندىرۋ ءبىر جىل ىشىندە 10،6 پايىزعا ۇلعايىپ، 19،1 ترلن تەڭگەگە تەڭ بولدى. اكتسيا­لارمەن جۇرگىزىلگەن ساۋدا-ساتتىق كولەمى بىلتىر 2019 جىلعا قاراعاندا 17،1 پايىزعا نەمەسە 238،4 ملرد تەڭگەگە دەيىن ءوستى. تارقاتا ايتساق، ورتاشا كۇندىك ساۋدا-ساتتىق كولەمى 969،1 ملن تەڭگەنى قۇرادى. ال ورتاشا كۇندىك مامىلە سانى – 795، ءبىر مامىلەنىڭ ورتاشا كۇندىك كولەمى – 1،2 ملن تەڭگە. باستاپقى نارىق كولەمى 3،5 ملرد تەڭگەگە، قايتالاما نارىق 234،9 ملرد تەڭگەگە باعالاندى.

ينۆەستورلار بولىنىسىندە باستاپقى نارىقتا زاڭدى تۇلعالار (ساۋدا-ساتتىق كو­لەمىنىڭ 84،7 پايىزى)، قايتالاما نا­رىق­تا جەكە تۇلعالار (53،8 پايىز) كوش باس­تاپ تۇر. ايتا كەتەيىك، 2020 جىلى ورتا­لىق دەپوزيتاريدە جەكە تۇلعالاردىڭ 15 مىڭ­نان استام جاڭا شوتى اشىلعان. 2021 جىل­عى 1 قاڭتارداعى جاعداي بويىنشا ولار­دىڭ جالپى سانى – 132 861، – دەپ حابار­لادى قازاقستان قور بيرجاسىنىڭ ءباسپاسوز قىزمەتى.

بىلتىر KASE-دەگى ساۋدا-ساتتىقتىڭ جيىنتىق كولەمى 118 ترلن تەڭگەنى قۇرا­عان. كورسەتكىش 2019 جىلمەن سالىس­تىرعاندا 0،1 پايىزعا نەمەسە 152،1 ملرد تەڭگەگە تومەندەگەن. باعالى قاعاز­دار نارىعىنداعى ساۋدا-ساتتىق كولەمى 49 پايىزعا ءوسىپ، 7،9 ترلن تەڭگەگە جەتتى. 2021 جىلعى 1 قاڭتارداعى جاعداي بو­يىن­شا، KASE-ءنىڭ ساۋدا-ساتتىق تىزىلىمىندە 191 ەميتەنتتىڭ (ۇيىمنىڭ) 477 اتاۋلى مەملەكەتتىك ەمەس باعالى قاعازى شىعارىلعان.