مەملەكەتتىك باعدارلامالاردىڭ ناتيجەسىندە اجارى اشىلعان الەۋمەتتىك نىساندار الماتى وبلىسىندا دا كوپتەپ سانالادى. اتاپ ايتقاندا, بىلتىر «اۋىل – ەل بەسىگى» باعدارلاماسى بويىنشا ىرىكتەلگەن 50 جوباعا 13,7 ملرد تەڭگە ءبولىنىپ, بۇل قارجىعا ايماقتاعى 24 ەلدى مەكەندەگى نىساندارعا كۇردەلى جوندەۋدەن جۇمىسى جۇرگىزىلىپتى. جالپى وتكەن جىلى «اۋىل - ەل بەسiگi» باعدارلاماسىنىڭ اياسىندا جەتىسۋ ولكەسىندە ءبىر مەزەتتە 360 ادام قابىلداي الاتىن 2 دەنە شىنىقتىرۋ-ساۋىقتىرۋ كەشەنى سالىنىپ, 20 كم سۋ جۇيەسى جوندەلگەن ەكەن. سونداي-اق, ۇزىن-سانى 70 شاقىرىمعا سوزىلعان اۋىل ىشىندەگى ەلەكترمەن قامتۋ جەلىلەرى اۋىستىرىلىپ, جالپى ۇزىندىعى 90 شاقىرىمعا جۋىق ىشكى جولدار قالپىنا كەلتىرىلگەن. مۇنان بولەك ەلدى مەكەندەردەگى ۇيلەر مەن عيماراتتارعا 4,4 شاقىرىم بولاتىن جىلۋ جۇيەسى تارتىلعان.
وسى «اۋىل – ەل بەسىگى» باعدارلاماسى بويىنشا بولىنگەن قارجىنىڭ يگىلىگىن كورگەن اۋىلدار كەربۇلاق اۋدانىندا دا بارشىلىق ەكەن. وتكەن جىلى اۋدانعا جوبا اياسىندا 2 ملرد 75 ملن. تەڭگە بولىنگەن. بۇل قارجىعا 9 جوبا ىسكە اسىرىىپتى. ولاردىڭ اراسىنان ەلدى مەكەندەردىڭ الەۋمەتتىك جانە ينجەنەرلىك ينفراقۇرىلىمىن دامىتۋعا, كورسەتىلەتىن مەملەكەتتىك قىزمەتتەردىڭ حالىققا قولجەتىمدىلىگىن قامتاماسىز ەتۋگە, ءومىر ءسۇرۋ جاعايدىن جاقسارتۋعا ىقپال ەتكەنى ءبىر توبە. ماسەلەن, «اۋىل – ەل بەسىگى» اياسىندا اۋدانداعى ى.التىنسارين, دۋتوۆ, سارىبۇلاق ورتا مەكتەپتەرىنە كۇردەلى جوندەۋ جاسالسا, سارىوزەك, قوعالى, قاراعاش اۋىلدارىنىڭ ىشكى جولدارى قالىپقا كەلتىرىلىپتى. سارىوزەك اۋىلىنىڭ كوشەلەرىنە جارىقو شامدار قويىلىپ, اۋدان ورتالىعىنىڭ كەلبەتى جاڭارىپتى.
كەربۇلاق تۇرعىندارى ءۇشىن اۋدانداعى مادەنيەت ءۇيىنىڭ كۇردەلى جوندەۋدەن وتكەنى ەرەكشە سىي بولعانداي. بىلتىر ابىكەن سارىباەۆ اتىنداعى بۇل مادەني نىساننىڭ كۇردەلى جوندەۋىنە رەسپۋبليكالىق بيۋدجەتتەن 320 ملن 337 مىڭ تەڭگە بولىنگەن بولاتىن.ناتيجەسىندە عيماراتتىڭ قابىرعالارى, شاتىرى, ەلەكترمەن قامتۋ جۇيەسى قايتا جاڭعىرتىلدى. مۇنان بولەك, وبلىس اكىمىنىڭ قولداۋىمەن وبلىستىق جانە جەرگىلىكتى بيۋدجەتتەن بولىنگەن قارجىعا ونەر ورداسىنىڭ ماتەريالدىق تەحنيكالىق بازاسى دا تولىقتىرىلىپتى. كورەرمەن زالىنا جيھاز, زاماناۋي مۋزىكالىق اپپاراتۋرا, كەڭسە تەحنيكاسى, LED-ەكراندار مەن ارنايى قۇرىلعىلار ساتىپ الىنعان. بۇگىندە ابىكەن سارىباەۆ اتىنداعى مادەنيەت ۇيىندە 16 ادام, ال «كۇرەڭبەل» فولكلورلىق ءان-بي انسامبلىندە 13 ادام جۇمىس ىستەيدى. جاقىندا جاڭعىرعان مادەنيەت ءۇيىنىڭ ساحناسىندا اۋدان ونەرپازدارى ۇلكەن كونتسەرت قويدى. وكىنىشكە قاراي, ەلدەگى ەپيدەميالىق احۋالعا وراي زالداعى كورەرمەندەر ورىن بوس تۇردى. ال كۇرەڭبەلدىكتەردىڭ ونەرىن تۇرعىندار ونلاين تاماشالادى.
ايتپاقشى, «اۋىل – ەل بەسىگى» مەملەكەتتىك باعدارلاماسى اياسىندا وڭىرلەردى دامىتۋعا بولىنگەن ماقساتتى قارجى كوزى تلالستامايدى. ياعني, بۇل يگى ءىس بيىل دا جالعاسىن تاۋىپ وتىر. بۇگىندە الماتى وبلىسى بويىنشا ارنايى باعدارلاماعا 32 جوبا ەنگەن ەكەن. دەمەك, جىل اياعىنا دەيىن تاعى 32 اۋىلداعى مادەنيەت ءۇيى, مەكتەپ, مەديتسينا نىسانى جانە ىشكى جولدار جوندەلمەكشى.
