قوعام • 25 قاڭتار، 2021

ساپار بايجانوۆتىڭ تۋعانىنا 90 جىل تولۋىنا وراي كونفەرەنتسيا وتەدى

59 رەت كورسەتىلدى

ءال-فارابي اتىنداعى قازاق ۇلتتىق ۋنيۆەرسيتەتى جۋرناليستيكا فاكۋلتەتىنىڭ ە. شايمەردەنوۆ اتىنداعى اۋديتورياسىدا كورنەكتى مەملەكەت جانە قوعام قايراتكەرى، تانىمال جازۋشى پۋبليتسيست ساپار بايجانوۆتىڭ تۋعانىنا 90 جىل تولۋىنا وراي 27 قاڭتاردا «ۇلتىنىڭ ۇمىتىلماس تۇلعاسى – ساپار بايجانوۆتىڭ شىعارماشىلىعى» حالىقارالىق عىلىمي-تاجىريبەلىك ونلاين-كونفەرەنتسيا وتەدى، دەپ حابارلايدى Egemen.kz.

ساپار بايجانوۆ ەلىمىزدىڭ اعا باسىلىمى «سوتسياليستىك قازاقستان» (قازىرگى «ەگەمەن قازاقستان») گازەتىنە ۇزاق جىلدار باسشىلىق جاساپ، مادەني جانە الەۋمەتتىك دامۋىمىزعا سۇبەلى ۇلەس قوسقان. باس رەداكتور، قالامى جۇيرىك جۋرناليست، عالىم، فيلولوگيا عىلىمدارىنىڭ كانديداتى ساپار بايجانوۆ وسى وقۋ ورنىنىڭ تۇلەگى. «زامانداس تۋرالى تولعاۋ»، «ارحيۆ-ايعاق»، «اباي جانە ارحيۆ»، «قاجىعا بارعان قازاقتار» سىندى زەرتتەۋلەرىنىڭ اۆتورى - ساپار بايجانوۆ. قازاق مەملەكەتتىك ۋنيۆەرسيتەتىنىڭ جۋرناليستيكا فاكۋلتەتىن 1952 جىلى بىتىرگەن سوڭ جاستار باسىلىمى  «لەنينشىل جاس» (قازىرگى «جاس الاش») گازەتىنىڭ ادەبي قىزمەتكەرى، جۇمىسشى جاستار ءبولىمىنىڭ مەڭگەرۋشىسى، رەداكتوردىڭ ورىنباسارى بولىپ ىستەگەن. 1958–1965 جىلدارى «مادەنيەت جانە تۇرمىس» (قازىرگى «پاراسات») جۋرنالىنىڭ جاۋاپتى حاتشىسى، رەداكتوردىڭ ورىنباسارى، باس رەداكتورى بولعان، 1965– 1973 جىلدارى قازاقستان كومپارتياسى ورتالىق كوميتەتىنىڭ اپپاراتىندا جاۋاپتى قىزمەتتەر اتقارعان. 1973–1983 جىلدارى «سوتسياليستىك قازاقستان» (قازىرگى «ەگەمەن قازاقستان») گازەتىنىڭ باس رەداكتورى بولىپ ىستەگەن. 1983–1994 جىلدارى رەسپۋبليكا باس مۇراعات باسقارماسىنىڭ باستىعى بولعان. قازاقستاننىڭ ەڭبەك سىڭىرگەن قايراتكەرى اتاعىن يەلەنگەن. «حالىقتار دوستىعى»، «قۇرمەت بەلگىسى» وردەندەرىمەن، كوپتەگەن مەدالدارمەن ماراپاتتالعان. ول جايىندا «ومىرگە وكپەسى جوق ادام» اتتى ەستەلىكتەر جيناعى جارىق كورگەن. زامانداستارى وعان «قازاق جۋرناليستيكاسىنىڭ قارا جورعاسى، قارىمدى قالامگەر، بىلگىر عالىم» دەپ باعا بەرگەن.

عىلىمي شاراعا قازاقستان جازۋشىلار جانە جۋرناليستەر وداعى، شەتەلدىك عالىمدار، رەسپۋبليكالىق باق باسشىلارى مەن تانىمال جۋرناليستەر، قوعام جانە مەملەكەت قايراتكەرلەرى، زيالى قاۋىم وكىلدەرى مەن پروفەسسور-وقىتۋشىلار قۇرامى قاتىسادى.

كونفەرەنتسيا اياسىندا عالىم شىعارماشىلىعىنا ارنالعان كورمە وتەدى.

سوڭعى جاڭالىقتار

ۇقساس جاڭالىقتار