ء«اموز» جشس-ءنىڭ قوعاممەن بايلانىس قىزمەتىنىڭ مالىمەتىنشە, سوڭعى جىلدارى زاۋىتتا شىعارىلاتىن ءونىم تۇرلەرى كوبەيە ءتۇستى. وتكەن جىلى قازاقستانداعى ەڭ تومەنگى تەمپەراتۋراعا شىدامدى «Khazar-38» ديزەل وتىنىن ءوندىرۋ باستالعان ەدى. ەندى سونداي ءونىمنىڭ قاتارىنا «Altay-45» قىسقى ديزەل وتىنى قوسىلدى.
– «اltay-45» ماركالى ديزەل وتىنى مۇنايدى تەرەڭ وڭدەۋ كەشەنىنىڭ Prime D 3205 ديزەل وتىنىن گيدروتازارتۋ قوندىرعىسىندا شىعارىلدى. جاڭا ءونىم K5 كلاسىنىڭ ەكولوگيالىق تالاپتارىنا سايكەس كەلەدى. كۇكىرتتىڭ مينيمالدى مولشەرى جانە تومەن تەمپەراتۋرالىق قاسيەتىن جاقسارتاتىن قوسپالاردىڭ بولماۋى ءونىمدى اركتيكالىق ديزەل وتىنىنىڭ ساپاسىنا سايكەس ەتەدى. جاڭا ديزەل وتىنىنىڭ ءبىرىنشى پارتياسى ىشكى نارىقتاعى سۇرانىستى قامتاماسىز ەتۋ ءۇشىن شاعىن كولەمدە وندىرىلەدى. ودان ءارى سۇرانىسقا قاراي «Altay-45» ديزەل وتىنىن تيەۋ كولەمى ۇلعايتىلاتىن بولادى, – دەپ حابارلادى كاسىپورىننىڭ قوعاممەن بايلانىس قىزمەتى.
اتالعان زاۋىتتا تاعى ءبىر جاڭالىق بار. بۇل – زاۋىتتا شىعارىلعان جانارمايدىڭ REACH سەرتيفيكاتىن يەلەنۋى. وسىعان بايلانىستى ەۋرووداق نارىعىنا يمپورتتاۋعا ارنالعان حيميالىق زاتتار مەن ولاردىڭ قوسپالارىنىڭ ساپا دەڭگەيىن باعالاۋدىڭ تولىق راسىمىنەن ءوتتى.
كاسىپورىننىڭ قوعاممەن بايلانىس قىزمەتىنىڭ مالىمەتىنە سۇيەنسەك, REACH رەگلامەنتىنە سايكەس, ەۋرووداقتا جىلىنا 1 توننادان استام مولشەردە وندىرىلەتىن نەمەسە يمپورتتالاتىن كەز كەلگەن حيميالىق زات تىركەۋگە جاتادى. ال REACH سەرتيفيكاتى – ەۋروايماق ەلدەرىنە بەنزين شىعاراتىن قازاقستاندىق كاسىپورىننىڭ ەكسپورتتىق مۇمكىندىگىن دامىتۋداعى ماڭىزدى قادام.
مۇنداي سەرتيفيكات بىلتىرعى ساۋىردە اتىراۋ مۇناي وڭدەۋ زاۋىتىنىڭ وندىرىسىندەگى حوش ءيىستى كومىرسۋتەكتەر – بەنزول جانە پاراكسيلول ونىمدەرى ءۇشىن دە بەرىلگەن ەدى. ال قازاقستاندىق جانارماي ەۋروپالىق ساپا ستاندارتتارىنا سايكەستىگى راستالعان ءۇشىنشى ءونىم بولىپ وتىر. ەندى REACH سەرتيفيكاتى اتىراۋدا شىعارىلعان جانارمايدىڭ ەۋرووداق ەلدەرىنىڭ نارىعىنا شىعۋىنا داڭعىل جول اشادى.
اتىراۋ وبلىسى
