پرەزيدەنت • 19 قاڭتار، 2021

مەملەكەت باسشىسى اسقار ءماميندى قابىلدادى

38 رەت كورسەتىلدى

قاسىم-جومارت توقاەۆقا ەلىمىزدەگى سانيتارلىق-ەپيدەميالىق احۋال مەن الەۋمەتتىك-ەكونوميكالىق دامۋدىڭ وزەكتى ماسەلەلەرى تۋرالى باياندالدى.

اسقار مامين ەلىمىزدەگى سانيتارلىق-ەپيدەميالىق احۋالدىڭ باقىلاۋدا ەكەنىن جەتكىزدى.

پرەمەر-مينيستر پرەزيدەنتكە كوروناۆيۋرسقا قارسى ۆاكتسينالار جونىندە مالىمەت بەردى. قازىرگى ۋاقىتتا وتاندىق QazCovid-in ۆاكتسيناسى كلينيكالىق سىناقتىڭ ءىىى ساتىسىنان وتكىزىلىپ جاتىر. ونىڭ الدىن الا تيىمدىلىگى 96 پايىزدى قۇرايدى. «سپۋتنيك V» ۆاكتسيناسىنىڭ ساپاسى اتتەستاتسيادان وتكىزىلۋدە. سونداي-اق GMP ستاندارتى بويىنشا ۆاكتسينا شىعاراتىن بيوفارم زاۋىتىنىڭ قۇرىلىسى جۇرگىزىلۋدە.

اسقار مامين قاسىم-جومارت توقاەۆقا 26 قاڭتارداعى ۇكىمەتتىڭ كەڭەيتىلگەن وتىرىسىنا دايىندىق بارىسى جايىندا ايتتى. مەملەكەت باسشىسىنىڭ توراعالىعىمەن وتەتىن جيىندا ەلىمىزدىڭ الەۋمەتتىك-ەكونوميكالىق دامۋ قورىتىندىلارى مەن الداعى كەزەڭدە اتقارىلاتىن مىندەتتەر قارالماق.

كەزدەسۋ بارىسىندا ەكونوميكالىق ءوسىمدى قالپىنا كەلتىرۋ، ينۆەستيتسيا تارتۋ، حالىقتى جۇمىسپەن قامتۋدى قولداۋ، الەۋمەتتىك ماڭىزى بار تاۋارلاردىڭ باعاسىن تۇراقتاندىرۋ جانە ەلىمىزدىڭ الەۋمەتتىك-ەكونوميكالىق دامۋىنىڭ باسقا دا وزەكتى ماسەلەلەرى جونىندەگى شارالار تالقىلاندى.

مەملەكەت باسشىسىنا تۇرعىن ءۇي قۇرىلىسىنىڭ دامۋ قارقىنى تۋرالى مالىمەت بەرىلدى. 2020 جىلدىڭ قورىتىندىسى بويىنشا تۇرعىن ۇيلەردى پايدالانۋعا بەرۋ كولەمى 16،8 پايىزعا ارتىپ، 15،3 ميلليون شارشى مەترگە جەتكەن. قولجەتىمدى باسپانا قۇرىلىسىنىڭ كولەمىن ۇلعايتۋ، تۇرعىن ءۇي قۇرىلىسى مەن جالعا بەرىلەتىن تۇرعىن ءۇي نارىعىنا جەكە ينۆەستيتسيالاردى تارتۋ ماسەلەلەرىنە باسا ءمان بەرىلگەن.  

پرەزيدەنتتىڭ تاپسىرماسى بويىنشا ۇكىمەت 2020 جىلى بيۋدجەت سالاسىنداعى 883 مىڭ قىزمەتكەردىڭ ەڭبەكاقىسىن وسىرگەن. اتاپ ايتقاندا 609 مىڭ پەداگوگتىڭ جالاقىسى 25 پايىزعا، 215 مىڭ مەديتسينا قىزمەتكەرىنىڭ ەڭبەكاقىسى 30 پايىزعا دەيىن، مادەنيەت، ارحيۆ جانە ونەر سالاسىنداعى 34 مىڭ قىزمەتكەر مەن الەۋمەتتىك قورعاۋ سالاسىنداعى 25 مىڭ قىزمەتكەردىڭ جالاقىسى 50 پايىزعا دەيىن كوبەيگەن.

پرەزيدەنت بيىل دا بيۋدجەت سالاسىنداعى 1 ميلليون 70 مىڭ قىزمەتكەردىڭ ەڭبەكاقىسىن، ونىڭ ىشىندە، 785 مىڭ پەداگوگتىڭ جالاقىسىن 25 پايىزعا، 247 مىڭ مەديتسينا قىزمەتكەرىنىڭ ەڭبەكاقىسىن 30 پايىزعا،   الەۋمەتتىك قورعاۋ سالاسىنداعى الەۋمەتتىك-مەديتسينالىق مەكەمەلەردىڭ 38 مىڭ قىزمەتكەرىنىڭ جالاقىسىن 45 پايىزعا دەيىن ارتتىرۋ جۇمىسىن جالعاستىرۋ اسا ماڭىزدى مىندەت دەپ ەسەپتەيدى.

كەزدەسۋ سوڭىندا مەملەكەت باسشىسى ۇكىمەتكە قازاقستاننىڭ ەۋرازيالىق ەكونوميكالىق وداققا بيىلعى توراعالىق قىزمەتىنىڭ جوعارى دەڭگەيدە اتقارىلۋىن قامتاماسىز ەتۋدى مىندەتتەدى. بۇل كوپجاقتى ەۋرازيالىق ينتەگراتسيانىڭ دامۋىنا تىڭ سەرپىن بەرەدى.

سوڭعى جاڭالىقتار

اراق ساتىلمايتىن اۋدان

ايماقتار • كەشە

ۇقساس جاڭالىقتار