ولاي دەيتىن سەبەبىمىز, 2007 جىلى بەس جاستاعى دەكلان تومپسون ەسىمدى اعىلشىن بالاسىنا ادام جامباسىندا بولاتىن «پەرتەس» اۋرۋىنىڭ سيرەك دياگنوزى قويىلادى.
پەرتەس اۋرۋى بالالىق جاستا پايدا بولادى جانە ۇرشىقبۋىننىڭ اۋماعىندا (جامباستاعى بۋىن) جانە ورتان جىلىكتىڭ (جامباس سۇيەگىنىڭ بۋىنى) باسىنىڭ زاقىمدانۋىمەن سيپاتتالادى.
لەگگا-كالۆە-پەرتەس اۋرۋى ورتان جىلىكتىڭ باسىنداعى قان اينالىمىنىڭ ۋاقىتشا بۇزىلىسىندا پايدا بولادى. سونداي-اق قان اعىمى بۇزىلعان كەزدە تىندەردىڭ تىرشىلىگى جويىلادى. سونىڭ سالدارىنان دەكلان تومپسون ەكى جىلعا جۋىق مۇگەدەكتەر ارباسىنا تاڭىلادى. دارىگەرلەر «دەكلان ەندىگىدە جۇرە المايدى» دەپ ويلايدى.
دەگەنمەن كوپتەگەن وپەراتسيالاردىڭ ناتيجەسىنەن كەيىن جاس جىگىت اياعىنا تۇرا باستايدى. وسى ۋاقىت ىشىندە اتا-انالار كىشكەنتاي ۇلىنا قامقورلىق جاساۋمەن بولادى. ولار ەمدەلۋىنە اقشا ىزدەپ, فيزيوتەراپياعا ءجيى اپارىپ جۇرەدى.
دەكلان تومپسون سەگىز جاسقا تولعاندا دەنساۋلىعى قالپىنا كەلە باستايدى. اكەسى ونى بىردەن «شەففيلد ۋەنسدەي» اكادەمياسىنا جازدىرادى. جاس بالا سول جەردە فۋتبولعا ماشىقتانىپ, شەبەرلىگىن شىڭدايدى.
لي تومپسون (جىگىتتىڭ اكەسى) - بۇرىنعى فۋتبولشى بولاتىن. ول مانسابىن «شەففيلد يۋنايتەدتەن» باستاعان. بىراق جوعارى دەڭگەيگە جەتە الماعان. قازىر جاتتىقتىرۋشى بولىپ جۇمىس ىستەيدى. ول ۇلىن ءوزى جەكە وقىتتى. ونىڭ قالپىنا كەلۋىن باقىلاپ, اكادەمياداعى دارىگەرلەرمەن ونىڭ جاعدايى تۋرالى ۇنەمى حابارلاسىپ وتىردى.
دەكلان «شەففيلد ۋەنسدەي» فۋتبول كلۋبىمەن العاشقى كاسىبي كەلىسىمشارتقا وتىرعان كۇن - تومپسوندار اۋلەتىندەگى ەڭ ايتۋلى وقيعا بولعان ەدى.
« ۇلىم فۋتبول كلۋبىنان ۇسىنىس ءتۇسىپ جاتقانىن ايتقان كەزدە مەن وعان سەنبەدىم. جوق, مەن ۇلىمنىڭ كەرەمەت فۋتبول وينايتىنىن بىلەمىن. بىراق ءبىز ۇلكەن قيىندىقتاردان وتتىك. بۇل مەنىڭ جادىمدا ۇلكەن ءىز قالدىردى. بىراق جاڭالىققا قاتتى قۋاندىم», - دەيدى جاتتىقتىرۋشى اكە.
سوندىقتان دا بولار 2021 جىلدىڭ 9 قاڭتارىندا وتكەن كاسىبي فۋتبولداعى 18 جاسار ۇلىنىڭ دەبيۋتى وتباسى ءۇشىن جەكە ءبىر مەرەكە. ال تەلەديداردان 38-ءشى نومەردەگى فۋتبولشىنىڭ جاسىل الاڭعا قاراي جۇگىرىپ شىققان ءساتىن كورگەندە اكەسى ەرىكسىز جىلاپ جىبەردى. ول ويىنشى - باياعى مۇگەدەك دەكلان تومپسون بولاتىن.
ءسىرا, بۇل ونىڭ ەڭ ءبىر باقىتتى ءساتى بولار...
