قىرعىزستانداعى قازىرگى پروبلەمالاردى شەشۋ ءۇشىن كەم دەگەندە 1-2 جىل قاجەت بولادى. بۇل تۋرالى سادىر جاپاروۆ بىشكەكتە وتكەن ءباسپاسوز كونفەرەنتسياسىندا ايتتى.
س. جاپاروۆ ەگەر ساياسي تۇراقتىلىق بولسا, قىرعىزستاندى 3-4 جىلدان كەيىن ەكونوميكالىق داعدارىستان شىعاراتىنىنا ۋادە بەردى.
ساياساتكەر سوڭعى 30 جىل ىشىندە سىبايلاس جەمقورلىق ءومىردىڭ بارلىق سالاسىندا تامىر جايعانىن جانە ءاربىر ازامات ونىمەن كۇرەسۋگە كۇش سالۋى كەرەك ەكەنىن اتاپ ءوتتى.
«مەن الدىڭعى بيلىكتىڭ قاتەلىكتەرىن قايتالامايمىن. ءبىز ساياسي قىسىمنان اۋلاق بولامىز جانە زاڭدىلىق قاعيداسىن بۇزۋشىلارعا جول بەرمەيمىز. مەنىڭ جالعىز ماقساتىم - ەلدىڭ دامۋى, بىرلىكتى قامتاماسىز ەتۋ», دەپ ۋادە ەتتى جاڭا سايلانعان مەملەكەت باسشىسى.
سونداي-اق ول سايلاۋعا قاتىسقان وزگە كانديداتتار مەن ولاردىڭ ۇگىتشىلەرىنە دەگەن ەش رەنىشى جوق ەكەنىن ايتتى.
ەسكە سالا كەتەيىك, قىرعىزستان سايلاۋ كوميسسياسىنىڭ جەتەكشىسى نۇرجان شايلدابەكوۆا جەكسەنبى كۇنگى سايلاۋداعى داۋىس بەرۋدىڭ الدىن-الا قورىتىندىلارى بويىنشا سايلاۋشىلاردىڭ 79,18 پايىزى سادىر جاپاروۆقا داۋىس بەرگەنىن حابارلاعان بولاتىن.
