ەڭ باستىسى, حالىقتىڭ ءومىر ءسۇرۋ ساپاسى جاقسارسا ەكەن دەيمىن. جەرگىلىكتى تۇرعىنداردىڭ ءبارى اۋىز سۋمەن قامتىلىپ, جاعدايى جاقسى بولاتىن بولسا, جاپپاي ينتەرنەت جۇيەسى جاقسارىپ, ىستەيتىن جۇمىسى بولسا, وندا حالىقتىڭ سايلاۋعا قاتىسۋ كورسەتكىشى جوعارى بولادى. سايلاۋ دەگەن حالىقتىڭ ماسەلەسىن شەشۋدىڭ العىشارتى بولۋى كەرەك. وسى رەتتە بۇكىل پارتيا ەل ارالادى, سايلاۋالدى باعدارلاماسىمەن تانىستىردى. ەندى وزدەرى ۇگىت جاساعان مىندەتتەرىن ورىنداۋى ءتيىس.
قازاق ەلىنىڭ جەرى كەڭ. الەمدە جەر كولەمى جونىنەن 9-شى ورىندامىز. بۇل قۇدايدىڭ بىزگە بەرگەن نەسىبەسى. اتا-بابالارىمىز وسى كەڭ جەردى بىزگە امانات ەتتى. ەندى وسىنى كوزدىڭ قاراشىعىنداي ساقتاۋىمىز كەرەك. قازاقتىڭ جەرىنە كوز الارتقان ارانداتۋشىلارعا مەن ءوز باسىم ءمان بەرمەيمىن.
ول مۇمكىن ەمەس. ولار ءوز جەرلەرىن يگەرە الماي جاتىپ, حالقىنىڭ جاعدايىن جاقسارتا الماي جاتىپ, بىزگە باسىن سۇعا المايدى. «يت ۇرەدى, كەرۋەن كوشەدى». قازاقتىڭ جەرى باي - مۇناي دا, گاز دا بار. ونى ءوزىمىز پايدالانساق, قازاقتان باي حالىق بولمايدى. ءبىزدىڭ بولاشاعىمىز جارقىن. ەڭ باستىسى, دۇرىس تاڭداۋ جاساپ, بولاشاقتان جاقسىلىق كۇتۋىمىز كەرەك.
مۇرات جۇرىنوۆ,
قر ۇلتتىق عىلىم اكادەمياسىنىڭ پرەزيدەنتى, اكادەميك
