پرەزيدەنت • 10 قاڭتار, 2021

ءار سايلاۋ – ازاماتتىق قوعامنىڭ ىلگەرىلەگەنىن كورسەتەتىن سىناق

300 رەت
كورسەتىلدى
3 مين
وقۋ ءۇشىن

مەملەكەت باسشىسى ءال-فارابي اتىنداعى وقۋشىلار سارايىندا ورنالاسقان سايلاۋ ۋچاسكەسىنە بارىپ, قازاقستان رەسپۋبليكاسى ءماجىلىسى مەن جەرگىلىكتى ءماسليحاتتار سايلاۋىندا ءوز تاڭداۋىن جاسادى, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.

پرەزيدەنت قازاقستاندىق جانە شەتەلدىك بۇقارالىق اقپارات قۇرالدارى ءۇشىن ۇيىمداستىرىلعان بريفينگتە پارلامەنت سايلاۋى ءاربىر ەلدىڭ ومىرىندەگى اسا ماڭىزدى وقيعا ەكەنىن اتاپ ءوتتى.

– بۇل سايلاۋ مەملەكەتىمىزدىڭ ودان ءارى دامۋىنا سەرپىن بەرەدى. جالپى ءبىزدىڭ پارلامەنتكە نەعۇرلىم كوپ پارتيا كىرسە, ەلىمىزدىڭ بولاشاعى ءۇشىن دە سوعۇرلىم جاقسى بولادى. سوندىقتان سايلاۋ ءادىل وتەدى دەپ سەنەمىن. پارلامەنتتىڭ نەگىزگى مىندەتى ساپالى زاڭدار قابىلداۋ. قازاقستانعا ساپالى زاڭناما جۇيەسى قاجەت. سول سەبەپتى ءبارىمىز وسى مۇمكىندىكتى پايدالانىپ داۋىس بەرۋىمىز كەرەك, – دەدى قاسىم-جومارت توقاەۆ.

جۋرناليستەر ەڭ الدىمەن پرەزيدەنتتىڭ سايلاۋعا قانداي كوڭىل-كۇيمەن كەلگەنىن, قاي پارتياعا داۋىس بەرگەنىن سۇرادى.

– كوڭىل-كۇيىم وتە جاقسى. حالقىمىز بەلسەندى تۇردە داۋىس بەرىپ جاتىر. ءبىز قازاقستاننىڭ بولاشاعى, ەلىمىزدىڭ دامۋى ءۇشىن داۋىس بەردىك. پارلامەنتتە ەلىمىزدىڭ كەلەشەگى, حالقىمىزدىڭ تاعدىرى جايىندا كەڭ اۋقىمدى پىكىرتالاستار بولۋى كەرەك, – دەدى پرەزيدەنت.

باق وكىلدەرىن قاسىم-جومارت توقاەۆتىڭ سايلاۋدان نە كۇتەتىنى, قانداي ءۇمىت ارتاتىنى قىزىقتىردى.

– بۇل سايلاۋ ەلىمىزدەگى دەموكراتيانى دامىتۋعا جاسالعان تاعى ءبىر قادام بولۋى كەرەك. ءار سايلاۋ – ازاماتتىق قوعامنىڭ ىلگەرىلەگەنىن كورسەتەتىن سىناق. ءبىزدىڭ پارلامەنتىمىزدە ءارتۇرلى پارتيالار بولاتىنىنا ۇلكەن ءۇمىت ارتامىن, – دەدى مەملەكەت باسشىسى.

جۋرناليستەر پرەزيدەنتتەن سايلاۋالدى ۇگىت-ناسيحات ناۋقانىنىڭ قانشالىقتى باسەكەگە ساي وتكەنى تۋرالى سۇرادى.

– حالقىمىزدىڭ ازاماتتىق بەلسەندىلىگى وتە جوعارى. ۇمىتكەرلەر وتە كوپ. بارلىعىنا تەڭ مۇمكىندىك جاسالدى. جالپى العاندا, سايلاۋ جوعارى دەڭگەيدە, زاڭناماعا سايكەس ءوتىپ جاتىر. قاندايدا دا ءبىر زاڭ بۇزۋشىلىقتار تىركەلگەن جوق. ءبىز ءبارىن مۇقيات باقىلاپ وتىرمىز. بۇل سايلاۋ بارىمىزگە, اسىرەسە, ازاماتتىق قوعامعا ۇلكەن سىناق. سوندىقتان سايلاۋ جاقسى وتەدى دەپ ويلايمىن, – دەدى قاسىم-جومارت توقاەۆ.

بريفينگ بارىسىندا مەملەكەت باسشىسى رەفورمالاردىڭ كەزەكتى پاكەتى ازىرلەنىپ جاتقانىن ايتتى.

– رەفورمالار دايىندالىپ جاتىر. ول توقتاماۋى كەرەك. 15 قاڭتاردا پارلامەنتتە دەپۋتاتتاردىڭ جاڭا قۇرامىنىڭ الدىندا سويلەيمىن. ودان كەيىن ۇلتتىق قوعامدىق سەنىم كەڭەسىنىڭ وتىرىسىندا الداعى رەفورمالار جايى جان-جاقتى تالقىلانادى, – دەدى پرەزيدەنت.

جۋرناليستەر قاسىم-جومارت توقاەۆتان بولاشاقتا ۇكىمەتتە بولاتىن اۋىس-تۇيىستەر تۋرالى پىكىرىن سۇرادى.

– ءبىزدىڭ زاڭناماعا سايكەس, ۇكىمەت وتستاۆكاعا كەتۋى كەرەك. سايلاۋدان سوڭ پارلامەنتتە جاڭادان سايلانعان دەپۋتاتتارمەن جانە فراكتسيا جەتەكشىلەرىمەن پرەمەر-ءمينيستردىڭ, ۇكىمەت مۇشەلەرىنىڭ قۇرامى جونىندە اقىلداسامىن, – دەدى مەملەكەت باسشىسى.

سوڭعى جاڭالىقتار