حالىقارالىق تۇركى اكادەمياسى 8 قاڭتار كۇنى نۇر-سۇلتان قالاسىندا ۇيىمداستىرعان «تۇركى الەمى: تاريحي-مادەني مۇرا» حالىقارالىق كونفەرەنتسياسىندا ارنايى بايانداما جاساعان تۇركپا باس حاتشىسى بىرقاتار شەتەلدىك ساياساتكەرلەردىڭ ارانداتۋشى مالىمدەمەلەرىنە قاتىستى ويلارىمەن ءبولىستى:
«بۇگىندە حالىقارالىق قاۋىمداستىق سوڭعى ونجىلدىقتاعى ەڭ وتكىر سەنىم داعدارىسىن باستان وتكەرۋدە. قازىرگى زامانعى قاۋىپ-قاتەرلەرگە قارسى ءبىزدىڭ ەلدەرىمىز ايماقتىق جانە جاھاندىق قاۋىپسىزدىك پەن بەيبىتشىلىكتى نىعايتا تۇسۋگە باعىتتالعان بىرقاتار باستامالار ارقىلى وڭتايلى جاۋاپ بەرە الادى.
وسى ورايدا پرەزيدەنت قاسىم-جومارت كەمەل ۇلى توقاەۆتىڭ سوڭعى وقيعالار تۇرعىسىنان شىندىعىندا دا وتە وزەكتى ماسەلەلەردى كوتەرگەن ءارى قازاقستاننىڭ الداعى دامۋ باعدارىن ايقىنداي تۇسەتىن ماقالاسىن ايرىقشا اتاپ وتۋگە بولادى» دەدى ول.
ايتا كەتۋ كەرەك, ونلاين-وففلاين رەجيمدە وتكەن شاراعا 20-دان استام مەملەكەتتەن عالىمدار مەن ساراپشىلار, سونداي-اق, تۇركى ەلدەرىنىڭ بىرقاتار رەسمي تۇلعالارى, حالىقارالىق ۇيىمداردىڭ وكىلدەرى قاتىستى.
