حالىقارالىق تۇركى اكادەمياسىنىڭ پرەزيدەنتى دارحان قىدىرالىنىڭ ايتۋىنشا, اتلاس تاۋەلسىزدىگىمىزدىڭ 30 جىلدىعىنا ورايلاستىرىلىپ شىعارىلعان.
جيناق قازاقستاننىڭ تۇڭعىش پرەزيدەنتى نۇرسۇلتان نازارباەۆتىڭ العىسوزىمەن شىققان. سونىمەن بىرگە ايگىلى ساياحاتشىلار مەن جيھانكەزدەر دايىنداعان كونە كارتالار مەن اتا-بابالارىمىزدىڭ مول مۇراسىن كورسەتەتىن ماڭىزدى مالىمەتتەرمەن تولىقتىرىلعان.
«تاياۋدا عانا مەملەكەت باسشىسى قاسىم-جومارت توقاەۆتىڭ «تاۋەلسىزدىك بارىنەن قىمبات» اتتى ماقالاسى شىققانى بەلگىلى, سونىمەن تۇستاس كەلۋىنىڭ دە ءمانى زور دەپ ەسەپتەيمىز. سەبەبى ماقالادا پرەزيدەنت بىزگە بۇل جەردى ەشكىم سىيعا تارتقان جوق دەپ ايتتى. بۇگىنگى اتلاس − ونىڭ جارقىن ايعاعى. ويتكەنى اتلاستا 200-دەن استام كارتا مەن تاريحي قۇجاتتار بار جانە وسى گەوگرافيالىق اۋماقتاعى تاريحي-مادەني جەتىستىكتەردى پاش ەتەدى. جالپى اتلاس ەلباسىنىڭ العىسوزىمەن شىقتى جانە ەلباسىنىڭ تۇركى كەڭەسى سامميتىندە بەرگەن تاپسىرماسى نەگىزىندە جارىق كوردى», دەدى دارحان قىدىرالى.
بۇدان وزگە, حالىقارالىق كونفەرەنتسيادا تۇركپا ۇيىمىنىڭ باس حاتشىسى التىنبەك مامايۋسۋپوۆ وقىرمانعا جول تارتقان باسىلىمدى جوعارى باعالاپ, مەملەكەت باسشىسى ق.توقاەۆتىڭ باعدارلامالىق ماقالاسىنداعى ورامدى ويلاردىڭ تاريحى ورتاق باۋىرلاس ەلدەر ءۇشىن ماڭىزدى ەكەنىن تىلگە تيەك ەتتى.
ال تۇركى كەڭەسىنىڭ باس حاتشىسى حاليل اكىنجى قازىرگى ءسىبىر, موڭعوليا جەرلەرىنەن قارا تەڭىز بەن جەرورتا تەڭىزىنە دەيىنگى الىپ اۋماقتى قونىستاعان تۇركى حالىقتارىنىڭ مىڭداعان جىلدار بويى ساقتالىپ كەلە جاتقان بىرەگەي مادەنيەتىنە توقتالدى.
«بۇگىندە جەتى تۇركى مەملەكەتىنىڭ بايراعى اسقاق رۋحپەن جەلبىرەپ تۇر. ەندى ولاردى ەشكىم قۇلاتا المايدى», دەدى بەينەبايلانىس ارقىلى بايانداما جاساعان ح.اكىنجى.
ءوز كەزەگىندە ازەربايجاننىڭ العاشقى ۇكىمەت باسشىسى گاسان گاسانوۆ جيىن قاتىسۋشىلارىن العاشقى تاريحي-مادەني اتلاستىڭ جارىق كورۋىمەن قۇتتىقتاپ, حالىقارالىق تۇركى اكادەمياسىنا ريزاشىلىعىن ءبىلدىردى.
ودان بولەك, القالى جيىنعا تۇركى كەڭەسى باس حاتشىسىنىڭ ورىنباسارى ومەر كودجامان, ازەربايجان رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى راشاد ماممادوۆ, تۇركيا رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى ۋفۋك ەكيدجي, قىرعىز رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى جەەنبەك كۋلۋباەۆ, فرانكفۋرت ۋنيۆەرسيتەتىنىڭ پروفەسسورى, رەسەي عىلىم اكادەمياسى ءسىبىر بولىمشەسىنىڭ فيلولوگيا ينستيتۋتىنىڭ باس عىلىمي قىزمەتكەرى يرينا نەۆسكايا جانە وزگە دە تۇركىتانۋشى عالىمدار مەن ساراپشىلار, قوعام جانە مەملەكەت قايراتكەرلەرى قاتىستى.
