جاڭا جىل قارساڭىندا بۇكىل ەل بويىنشا 30 مىڭعا جۋىق پوليتسيا مەن ۇلتتىق ۇلاننىڭ اسكەري قىزمەتكەرلەرى ازاماتتاردىڭ قاۋىپسىزدىگىن قامتاماسىز ەتىپ, كۇشەيتىلگەن رەجىمدە قىزمەت اتقاردى. جەدەل باسقارۋ ورتالىعىنىڭ قىزمەتكەرلەرى قالالار مەن وبلىس ورتالىقتارىنىڭ كوشەلەرىندەگى جاعدايدى ءجىتى باقىلادى.
ءىىم باسشىسى ەرلان تۇرعىمباەۆ ەلوردالىق گارنيزون بولىمشەلەرىنە بارىپ, مەرەكە كۇندەرى قىزمەت اتقارعان ناريادتاردىڭ جۇمىسىن تەكسەردى.
– نۇر-سۇلتان قالاسىنىڭ كوشەلەرىندە ءبىر جارىم مىڭ پوليتسەي قىزمەت اتقارۋدا. جەدەل باسقارۋ ورتالىعى قالاداعى جاعدايدى باقىلاۋدى تۇراقتى قامتاماسىز ەتەدى. ولار كەلىپ تۇسكەن بارلىق قوڭىراۋلارعا جەدەل جاۋاپ بەرەدى. شاقىرتۋلاردىڭ باسىم بولىگى تىنىشتىقتى بۇزۋ, وتباسىلىق جانجالدار, قاراۋسىز قالعان زاتتار مەن شاعىن جول-كولىك وقيعالارى سياقتى اكىمشىلىك قۇقىق بۇزۋشىلىقتارعا قاتىستى, – دەپ اتاپ ءوتتى مينيستر ەرلان تۇرعىمباەۆ.
ءتارتىپ ساقشىلارى ەلىمىزدىڭ بارلىق ايماقتارىندا مەرەكەلىك دەمالىس كۇندەرى نەگىزىنەن ۇساق ۇرلىقتار, تۇرمىستىق جانجالدار مەن تىنىشتىقتى بۇزۋ سياقتى دەرەكتەردى تىركەدى.
نۇر-سۇلتاندا جاڭا جىل قارساڭىندا پوليتسيانىڭ «102» شۇعىل شاقىرتۋ پۋلتىنە ەكى مىڭنان استام قوڭىراۋ ءتۇستى. جىل باسىنان بەرى ەلوردالىق پوليتسەيلەر 10 ماس جۇرگىزۋشىنى ۇستادى.
قوستاناي وبلىسىندا جۇمىس كۇندەرى كەزەكشى بولىمگە ورتا ەسەپپەن 400 حابارلاما كەلىپ تۇسەدى. ال 1 قاڭتاردا پوليتسەيلەر 650 قوڭىراۋ قابىلدادى. وبلىس ورتالىعىندا دەمالىس كۇندەرى 28 جول-كولىك وقيعاسى ورىن الدى.
جاڭا جىل كۇندەرى سەمەيدەگى «102» پۋلتىنە ءبىر جارىم مىڭنان استام قوڭىراۋ ءتۇستى. ونىڭ 20-سى قىلمىستىق قۇقىق بۇزۋشىلىق فاكتىسى بولىپ تابىلادى.
تۇركىستانداعى «102» پۋلتىنە قاڭتار ايىنىڭ العاشقى ءۇش كۇنىندە 100-دەن استام قوڭىراۋ كەلىپ ءتۇستى. مۇندا ءتارتىپ ساقشىلارى 300-گە جۋىق اكىمشىلىك قۇقىق بۇزۋشىلىقتى تىركەدى. ولاردىڭ باسىم كوپشىلىگى جول قوزعالىسى ەرەجەلەرىنىڭ بۇزىلۋىمەن بايلانىستى.
قىزىلوردا وبلىسىندا جاڭا جىلدىڭ العاشقى كۇندەرىندە پوليتسيا قىزمەتكەرلەرى 34 قىلمىستىق قۇقىق بۇزۋشىلىقتى تىركەدى. ولاردىڭ 23-ءى تەز ارادا اشىلدى.
قوعامدىق ورىنداردا ماس كۇيىندە 50 ادام ۇستالدى. تىنىشتىقتى بۇزۋدىڭ 10 فاكتىسى انىقتالدى. بەس جۇرگىزۋشى ماس كۇيىندە كولىك تىزگىندەسە, ال 44 جۇرگىزۋشىنىڭ قۇجاتتارى جوق بولىپ شىققان.
