مەملەكەت باسشىسى قاسىم-جومارت كەمەل ۇلى توقاەۆتىڭ: «تاۋەلسىزدىك بارىنەن قىمبات» دەپ اتالعان ماقالاسىن وقىپ شىققاندا وي ون تاراپقا ءبولىندى. راس, داۋىرلەر الماسادى, ءداستۇر جالعاسادى. ۋاقىتتىڭ سىنىنان سۇرىنبەي وتكەن ۇراندى ەلدىڭ ۇرپاعىنىڭ باسىنا نەلەر كەلىپ, نەلەر كەتپەدى. كەشەگى كەڭەس زامانىندا مادەنيەتىمىز بەن ادەبيەتىمىزدىڭ اياعى تۇساۋدا, موينى بۇعاۋدا بولدى. سوۆەتتىك يدەولوگيا كەرەعار ۇگىت-ناسيحات ءتىلىمىزدىڭ, تاريحىمىزدىڭ ورەلى ءورىسىن, ادىمىن اشتىرماي ءتىپتى تىنىسىن تارىلتىپ كەلگەنىن اعا ۇرپاق جاقسى بىلەدى. ءداستۇر: سالت-سانا, ادەت-عۇرىپ سىندى يگى دۇنيەلەرمەن بىرگە ءوزى دە مىڭ ءولىپ, مىڭ تىرىلگەن قازاق بالاسى ءۇشىن البەتتە ەل ەگەمەندىگى بارىنەن قۇندى, قۇدىرەتتى. وسى تۇرعىدان العاندا قاسىمجومارت كەمەل ۇلىنىڭ: ءتىل, تاريح, ادەبيەت پەن مادەنيەت سالت ءداستۇرىمىزدى جاڭعىرتۋ تۋرالى استىن سىزا ايتقان وي-تولعامدارى جانىمىزدى قوزعاپ, جۇرەگىمىزدى تەربەدى.
ەلىمىزدەن قۇت-بەرەكە قاشپاسىن,-دەپ
جەرىمىزدىڭ شەتىن جاۋ باسپاسىن,-دەپ
نايزاعا ۇكى تاققان ەلىمىز اتام زاماننان انا ءتىلىن توبەسىنە كوتەرگەن. قىلىشىنان قان تامعان قىزىل يمپەريانىڭ قۇرساۋىنداعى قازاق جەرىندە جەتىمنىڭ كۇيىن كەشكەن قايران ءتىلىمىزدىڭ ءحال-قادىرى قاي زاماندا دا اڭگىمەمىزگە از وزەك بولىپ كەلە جاتقان جوق. انا ءتىلىمىزدىڭ ەرتەڭى ءۇشىن بۇگىن قام-قارەكەت جاساۋدىڭ دا ءمان-ماڭىزى ماقالادا ايرىقشا ايتىلعان. ءبىزدىڭ قارۋ, قالقانىمىز ءوز ءتىلىمىز, ءتول ونەرىمىز ەكەنىن ەل-جۇرتتىڭ جادىندا تاعى ءبىر جاڭعىرتۋدان ۇتپاساق ۇتىلماسىمىز ايدان انىق.
بارشانى باۋىرىنا باسقان الاشتىڭ اعايىندى الالاپ, الا قويدى بولە قىرىققان جەرى جوق. ەشكىمدى كەۋدەسىنەن كەرى يتەرمەگەن سول قازاق-ەلىنىڭ تىرەگى, حالقىنىڭ جۇرەگىنە اينالعان پەرزەنتتەرگە كەندە بولعان ەمەس. ەندەشە ءوزىن قازاقستاندىقپىن, - دەپ ەسەپتەيتىن ءار ازامات مەملەكەتتىك ءتىلدى مەڭگەرۋگە مىندەتتى.
«تاۋەلسىزدىك جىلدارىندا تالانتىمەن تاڭداي قاقتىرعان جاس ورەندەردىڭ تۇتاس لەگى ءوسىپ-جەتىلدى. بۇكىل الەمدى اۋزىنا قاراتقان عاجايىپ دارىن يەلەرى دە بار. ولار - قازاقستاننىڭ مادەني كەلبەتى, ەلىمىزدى حالىقارالىق ارەنادا تانىتىپ, تاۋەلسىزدىك قۇندىلىقتارىن جەر جۇزىنە پاش ەتەتىن رۋحاني ەلشىلەرىمىز, ءبىزدىڭ ايرىقشا كۇشىمىز. وسىنداي ازاماتتارعا قامقور بولۋ - مەملەكەتتىڭ مىندەتى». بۇل «ەگەمەن قازاقستان» گازەتىنە شىققان پرەزيدەنتىمىز قاسىم-جومارت توقاەۆتىڭ ماقالاسىنان ءۇزىندى.
بۇدان شىعار قورىتىندى: انا تىلىنە دەگەن قۇرمەت, سالت-داستۇرگە دەگەن ىزەت ۇلتتىق قۇندىلىعىمىز بولىپ ەسەپتەلۋ كەرەك. قازاقي ءتالىم-تاربيە بەسىكتەن باستالىپ ول كۇللى قازاقستاندىقتارعا مەملەكەتتىك دەڭگەيدە ناسيحاتتالسا قۇبا-قۇپ.
مەملەكەت باسشىسىنىڭ يگى باستاماسى جالپىحالىقتىق سيپات السا,-دەگەن اق جارما تىلەك بار بىزدە. بارىمىزدى باعالايىق. تاۋەلسىزدىكتى ايالايىق.
وتاندى ءسۇيۋ ۇيىسقان ۇلتىڭدى سۇيۋدەن باستالاتىنىن ۇمىتپايىق. ەندەشە جاسىمىز دا, جاسامىسىمىز دا ءبىراۋىز بولىپ بىرىكسەك الدا الار قانشا اسۋ, باعىندىرار قانشا بەلەسىمىز بار. قونىسى قۇتتى, ىرگەسى مىقتى قازاقتىڭ سەنىمى ءبۇتىن, بىرلىگى بەرىك ەكەنىن جەر جاھانعا ءبارىمىز بىرگە دالەلدەيىك...
نۇرعالي نۇسىپجان ۇلى,
قازاقستاننىڭ حالىق ءارتىسى, مەملەكەتتىك سىيلىقتىڭ لاۋرەاتى, جامبىل اتىنداعى مەملەكەتتىك فيلارمونيانىڭ ءانشىسى, قازاق كوركەم ونەرىنىڭ اكادەميگى
