– نۇر-سۇلتان قالاسىنداعى دەنە شىنىقتىرۋ جانە سپورت باسقارماسىنىڭ 2020 جىلى اتقارىلعان جۇمىستارعا كوڭىلىڭىز تولا ما؟ بۇل رەتتە باستى جەتىستىكتەر دەپ قانداي اۋقىمدى ءىس-شارالاردى اتار ەدىڭىز؟
– اڭگىمەمىزدىڭ باسىن قۋانىشتى جاڭالىقپەن باستايىن. 2020 جىل ەلدەگى احۋالعا قاراماستان ەلوردا سپورتشىلارى ءۇشىن تابىستى جىل بولدى. نۇر-سۇلتان قالاسى سپورتشىلارىنىڭ اقشالاي قامتىلىم مولشەرى ۇلعايىپ, اي سايىنعى تولەماقى الاتىن سپورتشىلار سانى 84-تەن 157-گە دەيىن ارتتى. سپورت سالاسىنداعى وقىتۋشى-جاتتىقتىرۋشىلاردىڭ دا ەڭبەكاقىسى 2020 جىلى 25 پايىزعا دەيىن كوتەرىلدى. ياعني 2019 جىلى 75 مىڭ بولعان بولسا, 2020 جىلى – 93 750 تەڭگەگە ءوستى. ەندى 2021 جىلى ونى 50 پايىزعا دەيىن كوتەرۋ جوسپاردا بار. ەگەر ءبارى وڭىنان شەشىلسە سپورتتاعى وقىتۋشى-جاتتىقتىرۋشىلاردىڭ ەڭبەك اقىسى 112 500-عا كوبەيەدى.
ساباقتى ينە ساتىمەن دەمەكشى, بيىل نۇر-سۇلتاندا بۇدان وزگە دە كوپتەگەن اۋقىمدى جۇمىستار اتقارىلدى.
– ەندەشە سولاردىڭ بىرقاتارىنا جەكە-جەكە توقتالىپ وتسەڭىز.
الدىمەن باسقارما جۇمىس جۇيەسىن تسيفرلاندىرۋ ماقساتىندا جوسپار جاسالىپ, قازىرگى تاڭدا «E-sport» بىرىڭعاي تسيفرلىق پلاتفورماسى ىسكە قوسىلعانىن ايتا كەتكەن ءجون. بۇل ءبىزدىڭ جۇمىسىمىزدى جەدەل ءارى جۇيەلى تۇردە اتقارۋعا سەپتىگىن تيگىزەدى. سونىمەن قاتار وسى جىلى مەملەكەتتىك جەكەشەلىك سەرىكتەستىك اياسىندا «قازاقستان» سپورت سارايىن جاڭعىرتۋ ماقساتىندا ەكىجاقتى كەلىسسوزدەر جۇرگىزىلىپ, كەلىسىمشارت جاسالدى. ال «جۇمىسپەن قامتۋ 2020» جول كارتاسى باعدارلاماسى اياسىندا «تولقىن», «جەڭىس», «بارىس» سپورت كەشەندەرىندە كۇردەلى جانە اعىمداعى جوندەۋ جۇمىستارى جوسپارلى تۇردە جۇزەگە اسىرىلدى. اتالعان باعدارلاما بويىنشا ۇرمەلى فۋتبول مانەجىندە دە جوندەۋ جۇمىستارى اياقتالۋعا جاقىن. ول تۋرالى جاقىندا ارنايى حابارلايتىن بولامىز. كۇنى كەشە «استانا ارەنا» ستاديونىنىڭ فۋتبول الاڭى دا اۋىستىرىلدى. 16 قاراشادا زاماناۋي جوعارى تەحنولوگيالارمەن جابدىقتالعان جەڭىل اتلەتيكالىق سپورت مانەجى پايدالانۋعا بەرىلدى. ول جەڭىل اتلەتيكانىڭ بارلىق باعىتىن دامىتۋعا, سپورتشىلاردىڭ رەسپۋبليكالىق دودالارعا, حالىقارالىق جارىستارعا, الەم چەمپيوناتتارىنا جانە جازعى وليمپيادا ويىندارىنا دايىندالۋىنا جاعداي جاسايدى.
بيىل ەلوردالىق سپورتشىلار ءۇشىن تابىستى جىل بولدى. ەل چەمپيوناتتارى مەن وزگە دە ءتۇرلى جارىستاردا ساڭلاقتارىمىز 1 548 مەدالدى (574 التىن, 482 كۇمىس, 492 قولا) قانجىعالارىنا بايلادى. جەرگىلىكتى سپورتشىلاردىڭ 25-ءى «حالىقارالىق دارەجەدەگى سپورت شەبەرى», 83-ءى «سپورت شەبەرى», 250-ءى «سپورت شەبەرىنە كانديدات», 43-ءى «I-سپورتتىق رازرياد» اتاعىن يەلەندى. جىل قورىتىندىسى بويىنشا سپورتشىلار مەن جاتتىقتىرۋشىلار, سپورت قىزمەتكەرلەرى قالا اكىمى التاي سەيدىر ۇلىنىڭ العىس حاتتارىمەن ارنايى ماراپاتتالدى.
تاعى ءبىر ماڭىزدى جاڭالىق دەنە شىنىقتىرۋ جانە سپورت باسقارماسىنىڭ باستاماسىمەن ەلوردالىق سپورت مەكتەبىندە تۇڭعىش رەت پارا سپورت تۇرىنەن سلەدج-حوككەي بولىمشەسى اشىلدى. بۇل جانكۇيەرلەر ءۇشىن دە, سپورتسۇيەر قاۋىم ءۇشىن دە 2020 جىلداعى ايتۋلى وقيعالاردىڭ ءبىرى بولدى. سونداي-اق مۇمكىندىگى شەكتەۋلى سپورتشىلارعا ارنالعان سپورت مەكتەبىنە 2 ينۆاتاكسي بەرىلدى.
ەلوردامىزدا بۇگىنگى تاڭدا 11 بالالار-جاسوسپىرىمدەر سپورت مەكتەبى جۇمىسىن جالعاستىرۋدا. 73 بولىمشەدە 8 032 سپورتشى سپورتپەن شۇعىلدانادى. ونىڭ 57-ءى وليمپيادالىق, 16-سى وليمپيادالىق ەمەس, ۇلتتىق جانە مۇمكىندىگى شەكتەۋلى تۇلعالارعا ارنالعان سپورت تۇرلەرىنە جاتادى. وسى رەتتە ايتا كەتەيىك, باس قالامىزدا بارلىعى 975 سپورتتىق نىسان جۇمىس ىستەپ تۇر.
باسقارماعا باعىنىستى 7 مەكەمە ءبىر عيماراتقا ورنالاستىرىلىپ, ەكى مەكەمە سپورتتى دامىتۋ ديرەكتسياسى دەپ قايتا قۇرىلدى. سپورتشىلارعا تولىققاندى جاتتىعۋ جۇمىسىن جۇرگىزۋگە ارنالعان قۇرال-جابدىقتار مەن ارنايى سپورتتىق كيىم-كەشەكتەر الىندى. سونداي-اق جارىسقا قاتىسۋشىلاردىڭ ءىس-ساپارعا بولىنەتىن قارجىلارى قولما-قول اقشاسىز ەسەپ ايىرىسۋ تۇرىنە اۋىستىرىلدى.
– ءسىز باسقارىپ وتىرعان سالادا وتكەن جىل نەسىمەن ەستە قالدى؟ كەلەر جىلدىڭ جوسپارى قانداي؟
– وتكەن جىلعا وكپە جوق, كەلەر جىلدان ءۇمىت كوپ. بىراق تىشقان جىلى بۇكىل الەم ەلدەرى ءۇشىن اۋىر جىل بولدى. نەبىر ايتۋلى جارىستار كەيىنگە شەگەرىلدى, ءتىپتى كەيبىرى وتپەي قالدى. تورتكۇل دۇنيە كوز تىككەن توكيو وليمپياداسىنىڭ ءوزى الداعى جىلى وتەتىن بولدى. كارانتين شارالارىن ساقتاي وتىرىپ بۇگىندە سپورتتىق جارىستاردى ۇيىمداستىرۋ ءالى دە جالعاسىپ جاتىر. كارانتيندىك شەكتەۋلەر قاپەرگە الىنىپ, بۇگىنگە دەيىن ونلاين فورماتتا 18 ءىس-شارا, تانىمال سپورتشىلارمەن 27 كەزدەسۋ وتكىزىلدى.
ءوز كەزەگىندە نۇر-سۇلتان قالاسىنىڭ اكىمى التاي كولگىنوۆ باسقارماعا قاراستى مەكەمە باسشىلارىمەن, سپورت تۇرلەرى بويىنشا فەدەراتسيا پرەزيدەنتتەرىمەن كەزدەستى, وزەكتى ماسەلەر قاراستىرىلىپ, ولار تولىقتاي باقىلاۋعا الىندى. جىلدى قورىتىندىلاۋ ماقساتىندا 2020 جىلى اتقارىلعان جۇمىستاردىڭ ەسەبى تىڭدالىپ, كەلەر جىلعا سپورت تۇرلەرى بويىنشا قارجىلىق جانە دايىندىق جوسپارلارى بەكىتىلدى. كەلەر جىلدان ءۇمىتىمىز كوپ. الدا ءتۇرلى جوسپارلاردى ىسكە اسىرۋىمىز كەرەك. 2021 جىلدان باستاپ نۇر-سۇلتان قالاسىنداعى تۇڭعىش ارنايى سپورتتىق مەديتسينالىق ورتالىق اشىلادى. قازىرگى تاڭدا قالادا 4 دەنە شىنىقتىرۋ-ساۋىقتىرۋ كەشەنىنىڭ قۇرىلىسى جۇرگىزىلىپ جاتىر. يلينكا, كوكتال-2, ءوندىرىس, جەلەزنودوروجنىي تۇرعىن الاپتارىندا سالىنىپ جاتقان سپورت كەشەندەرى 2021 جىلى قولدانىسقا بەرىلەدى. الداعى وقۋ جىلىنان باستاپ «دەنە شىنىقتىرۋ جانە سپورت» ماماندىعىنا 50 قالا اكىمىنىڭ گرانتى بولىنەتىن بولدى. بۇل دا بولسا سپورتقا قىزىعۋشى جاستار ءۇشىن ۇلكەن قولداۋ ەكەنى ءسوزسىز.
2020 جىلى اتقارىلعان جۇمىستار لەگى وسىنداي. ءبىز مۇنىمەن توقتاپ قالمايمىز. كەلەر جىلدا دا جەمىستى جۇمىس ىستەپ, قازاق سپورتىنىڭ دامۋىنا ءوز ۇلەسىمىزدى قوسۋعا بىرلەسە اتسالىسامىز.
- ءيا شىنىمەن ەلدەگى احۋالعا قاراماستان ەلوردا سپورتىندا ۇلكەن ءبىر سەرپىلىس بولعان ەكەن. جۇمىستارىڭىزعا تابىس تىلەيمىز, سامات سەرىكحان ۇلى, سۇحباتىڭىزعا راحمەت.
