«وسى جىلى شىمكەنتتە 5 مىڭنان استام ءجاسوسپىرىمدى اسكەري ەسەپكە قويۋ جوسپارلانعان. ءاربىر ادام تۇرعىلىقتى جەرى بويىنشا جەرگىلىكتى اسكەري باسقارۋ ورگانىنا جۇگىنىپ, تولىق اقپارات الا الادى», - دەپ ءتۇسىندىردى شىمكەنت قالاسىنىڭ قورعانىس ىستەرى جونىندەگ دەپارتامەنت باستىعىنىڭ ورىنباسارى پولكوۆنيك اجيمۋحان شىنتاەۆ.
كۇن سايىن قالانىڭ جەرگىلىكتى اسكەري باسقارۋ ورگاندارىنا مەديتسينالىق تەكسەرۋدەن ءوتۋ ءۇشىن مەكتەپ جانە ارنايى ورتا وقۋ ورىندارىنىڭ وقۋشىلارى كەلەتىن بولادى. جوسپارعا سايكەس قورعانىس ىستەرى جونىندەگى بىرىكتىرىلگەن باسقارمالارى كۇنىنە 100-گە جۋىق ادامدى قابىلداۋ كەرەك. الدىمەن جىگىتتەر اسكەري قىزمەتكە جارامدىلىعىن دالەلدەيتىن مەديتسينالىق تەكسەرۋدەن جانە قاجەتتى قۇجاتتاردى تەكسەرۋدەن وتەدى. ەگەر ەسەپكە الۋ بارىسىندا ەمدەلۋگە نەمەسە مەديتسينالىق باقىلاۋعا مۇقتاج اسكەرگە شاقىرۋ جاسىنا دەيىنگىلەر انىقتالسا, وندا ولار ەمدەۋ-پروفيلاكتيكالىق ۇيىمدارىنا تىركەلەدى.
ايتا كەتسەك, ازاماتتاردى شاقىرۋ ۋچاسكەلەرىنە ەسەپكە الۋ جۇمىستارى جەرگىلىكتى اتقارۋشى ورگاندارى جەرگىلىكتى اسكەري باسقارۋ ورگاندارىمەن بىرلەسىپ جۇرگىزەدى.
«اسكەري قىزمەت جانە اسكەري قىزمەتشىلەردىڭ مارتەبەسى تۋرالى» قازاقستان رەسپۋبليكاسىنىڭ زاڭىنا سايكەس اسكەري ەسەپكە 17 جاسقا تولعان نەمەسە سول جىلى تولاتىن قازاقستان رەسپۋبليكاسىنىڭ ەر ازاماتتارى جاتادى.
بارلىق ءىس-شارالاردان كەيىن, جاستارعا اسكەري شاقىرۋ ۋچاسكەسىنە تىركەۋ تۋرالى كۋالىك بەرىلەدى. بۇل كۋالىك اسكەرگە شاقىرۋ كەزىندە شاقىرىلۋشىنىڭ ەسەپتە تۇرعانىن راستايتىن قۇجات بولىپ تابىلادى.
اسكەري ەسەپكە العاش تۇرعان ازاماتتارمەن قوسىمشا قورعانىس مينيسترلىگىنىڭ اسكەري وقۋ ورىندارىنا ءتۇسۋ بويىنشا اقپاراتتىق جۇمىس جۇرگىزىلەدى جانە كەلىسىمشارت بويىنشا اسكەري قىزمەتتىڭ ارتىقشىلىقتارى تۇسىندىرىلەدى.
