مۇنداي اۋقىمدى عىلىمي اۋدارما جوباسى قازاقستاندا بۇرىن-سوڭدى ىسكە اسپاعان.
وقۋلىقتار گۋمانيتارلىق سالانىڭ فيلوسوفيا, الەۋمەتتانۋ, پسيحولوگيا, ديپلوماتيا, ءدىنتانۋ, لينگۆيستيكا, سەميوتيكا, پەداگوگيكا, ينتەرنەت پسيحولوگياسى, مادەنيەتتانۋ, انتروپولوگيا, جۋرناليستيكا, ەكونوميكا, مەنەدجمەنت, ماركەتينگ, كاسىپكەرلىك, حالىقارالىق قۇقىق, ينتەللەكتۋالدىق قۇقىق, كينوتانۋ, تەاترتانۋ, شىعىس فيلوسوفياسى, كوشباسشىلىق, مەديا, ەتنوگرافيا باعىتتارىن قامتيدى.
جوبا ۇيلەستىرۋشىسى – «ۇلتتىق اۋدارما بيۋروسى» قوعامدىق قورى. بيۋرونىڭ ءباسپاسوز قىزمەتى بەرگەن مالىمەت بويىنشا, ۇلتتىق اۋدارما بيۋروسى جوبا بارىسىندا الەمدەگى وقۋلىق شىعارۋعا ماماندانعان «Cambridge University Press», «Oxford University Press», «Pearson», «Cengage», «Penguin Random House», «McMillan» جانە باسقا دا ءىرى حالىقارالىق باسپا ۇيلەرىمەن ارىپتەستىك قارىم-قاتىناس ورناتقان.
وقۋلىقتاردىڭ باسىم بولىگى اعىلشىن تىلىنەن اۋدارىلدى. فرانتسۋز, ورىس تىلدەرىنەن اۋدارىلعان وقۋلىقتار دا بار. بۇل كىتاپتاردىڭ كەيبىرىنىڭ ورىسشا نۇسقاسى بار بولعانىنا قاراماستان, ۇلتتىق اۋدارما بيۋروسى وقۋلىقتى تۇپنۇسقا تىلدەن تىكەلەي اۋدارۋعا ءمان بەردى.
ىرىكتەلگەن وقۋ قۇرالدارىن قازاق تىلىنە اۋدارۋعا قازاقستاننىڭ الدىڭعى قاتارلى وقۋ ورىندارىنىڭ وقىتۋشىلارى, بىلىكتى اۋدارماشىلار مەن رەداكتورلار, جالپى سانى 300-گە جۋىق مامان قاتىسىپتى.
سونداي مامانداردىڭ ءبىرى – فيلولوگيا عىلىمدارىنىڭ كانديداتى, ابىلاي حان اتىنداعى قازاق حالىقارالىق قاتىناستار جانە الەم تىلدەرى ۋنيۆەرسيتەتى, اۋدارما جانە فيلولوگيا فاكۋلتەتىنىڭ دەكانى باعلان ميزامحان. ول جوبا باستالعالى اۋدارما جۇمىسىنا ارالاسىپ, ء«تىل بىلىمىنە كىرىسپە», «كوپكە ۇمتىلعان جالعىز», «وقىتۋ تەورياسى», ء«بىلىم بەرۋدەگى زەرتتەۋلەر», «الەۋمەتتىك جۇمىس: كونتەكسى مەن پراكتيكاسى» دەپ اتالاتىن وقۋلىقتاردى اعىلشىن تىلىنەن قازاق تىلىنە اۋداردى.
ءبىز باعلان ميزامحاننان «100 جاڭا وقۋلىق» جوباسى, ونىڭ ىشىندە, اعىلشىن تىلىنەن قازاق تىلىنە تىكەلەي اۋدارما جاساۋ ەرەكشەلىكتەرى تۋرالى سۇراپ كوردىك:
قازاق ءتىلىنىڭ باي, كەز كەلگەن سالادا ونى ەركىن قولدانۋعا بولاتىنىن دالەلدەي الدىق
ەلىمىز ەگەمەندىك العالى بەرى قازاق ءتىلى مارتەبەسى, ونىڭ قولدانىلۋ اياسى جايلى كەڭىنەن ايتىلىپ تا, جازىلىپ تا ءجۇر. ءتۇرلى جوبالار ىسكە اسىرىلدى. سونداي جوبالاردىڭ ءبىرى جانە بىرەگەيى رەتىندە ەلباسى ن.ءا. نازارباەۆتىڭ باستاماسىمەن جۇزەگە اسىرىلعان, قازاق ءتىلى مارتەبەسىن ارتتىرۋ جولىنداعى ەڭ باستى جوبا دەپ 100 وقۋلىقتى اۋدارۋ ءىسىن ايتار ەدىم. «100 وقۋلىق» جوباسىنىڭ باسقالاردان ەرەكشەلىگى – قازاق, اعىلشىن تىلدەرىن جاقسى بىلەتىن ماماندار ىرىكتەلىپ الىندى. ءار كىتاپتى اۋدارۋ پروتسەسى بىرنەشە كەزەڭنەن تۇردى: اۋدارماشى اۋدارعان ءماتىندى عىلىمي رەداكتور, سوسىن ادەبي رەداكتور سۇزگىدەن وتكىزدى. ال, ولاردىڭ ءبارى ۋنيۆەرسيتەتتە ساباق بەرەتىن, عىلىمي اتاق-دارەجەلەرى بار, قوعامدا ءوز ورنى بار بەلگىلى تۇلعالار. گۋگل ارقىلى اۋدارا سالۋ دەگەن اڭگىمە بۇل جوبادا مۇلدە بولعان ەمەس. وسى ارقىلى, ۇلتتىق اۋدارما بيۋروسى قازاق ءتىلى دەسە جانىن بەرەتىن, «قازاق ءتىلى عىلىم ءتىلى بولا المايدى» دەگەن پىكىردى جوققا شىعارۋعا دايىن مامانداردىڭ باسىن بىرىكتىرە الدى. قازاق ءتىلىنىڭ باي, كەز كەلگەن سالادا ونى ەركىن قولدانۋعا بولاتىنىن دالەلدەي الدىق دەپ ويلايمىن.
بارىمىزگە بەلگىلى, بۇعان دەيىن ۋنيۆەرسيتەتتەردىڭ قازاق بولىمدەرىندە وقيتىن ستۋدەنتتەر تەك ورىس تىلىندەگى وقۋلىقتار ارقىلى ءبىلىم الىپ كەلدى. بۇل, اسىرەسە, اۋىلدان كەلگەن, ورىس ءتىلىن جەتىك بىلمەيتىن ءوزىمىزدىڭ قارا دومالاقتارىمىز ءۇشىن قيىن ەدى. قينالعاندارى ينتەرنەتتەگى گۋگل ارقىلى ساپاسىز اۋدارىلعان ەڭبەكتەرگە ارقا سۇيەيتىن. «100 وقۋلىق» جوباسى اياسىندا اۋدارىلعان ەڭبەكتەر, ەڭ الدىمەن, جوو-نا تەگىن تاراتىلا باستادى. قازاق بولىمىندە وقيتىن ستۋدەنتەر الەم مويىنداعان عالىمدار ەڭبەكتەرىن ورتاعا كوپىر ءتىل سالماي, تەك قازاق تىلىندە وقي باستادى. بۇل ستۋدەنتتەردىڭ ءبىلىم دەڭگەيىن ارتتىرۋعا سەپتىگىن تيگىزەرى ءسوزسىز.
مۇنداي اۋدارما جوبالارى توقتاپ قالماۋى كەرەك. بۇعان پرەزيدەنتىمىز ق.توقاەۆتىڭ «...ءتىل يگەرۋ ءۇشىن بالالار ادەبيەتىنىڭ اتقاراتىن ءرولى زور. سوندىقتان, قازاق قالامگەرلەرىنىڭ ۇزدىك شىعارمالارىنا قوسا, بالالارعا ارنالعان شەتەل جازۋشىلارىنىڭ دا تاڭداۋلى تۋىندىلارىن اۋدارىپ, كوپتەپ باسىپ شىعارۋدى جانە تاراتۋدى قولعا العان دۇرىس. وعان سۇرانىس جوعارى» دەۋى دالەل.
