سەناتورلار ورتالىق دارىگەرلەرىمەن كەزدەسۋ بارىسىندا مەديتسينالىق قىزمەتتىڭ ساپاسىن ارتتىرۋ ءۇشىن اۋرۋحانانى جابدىقتاۋ ماسەلەلەرىن تالقىلادى. ودان بولەك, مامان تاپشىلىعى, دارىگەر-نەانتولوگ, بالالار اريتمولوگى سياقتى ماماندىقتاردى تاڭدايتىن بولاشاق دارىگەرلەردى ىنتالاندىرۋ ماسەلەلەرى دە ءسوز بولدى.
«وسى جىلدىڭ باسىنان باستاپ مەديتسينا قىزمەتكەرلەرىنىڭ جالاقىسى كەزەڭ-كەزەڭمەن كوبەيتىلەدى. بۇعان دەيىن مەملەكەت باسشىسى دارىگەرلەر مەن سانيتاريا-ەپيدەميولوگيا سالاسى قىزمەتكەرلەرىنىڭ جالاقىسىن 2023 جىلعى دەيىن ەكونوميكاداعى ورتاشا جالاقىدان 2 ەسەدەن جوعارى دەڭگەيگە كەزەڭ-كەزەڭمەن ءوسىرۋدى تاپسىردى», – دەدى نۇرلان ءابدىروۆ.
سونىمەن قاتار سەنات دەپۋتاتتارى قازاق ۇلتتىق اگرارلىق زەرتتەۋ ۋنيۆەرسيتەتىندە بولدى. ول جەردە سەناتورلار اگرارلىق سالا ماماندارىمەن بىرگە اۋىلشارۋاشىلىق وندىرىسىنە ءىت-تەحنولوگيانى ەنگىزۋ جانە وندىرىستە عىلىمي يننوۆاتسيانى قولدانۋ ماسەلەلەرىن تالقىلادى. سونداي-اق, ينۆەستيتسيا تارتۋ جانە اۋىل شارۋاشىلىعى ءۇشىن بىلىكتى ماماندار دايارلاۋ ءىسىن دامىتۋ بويىنشا پرەزيدەنت انىقتاپ بەرگەن مىندەتتى ىسكە اسىرۋ جايىن ءسوز ەتتى.
«سەنات اۋىلدىق جەرلەردى, شاعىن جانە ورتا كاسىپكەرلىكتى دامىتۋعا ارنالعان پارلامەنتتىك تىڭداۋ وتكىزدى. سونىڭ بارىسىندا ءبىز اۋىلداردى جانە ول جەردە بيزنەستى دامىتۋ ماسەلەلەرىن تالقىلادىق. تىڭداۋ قورىتىندىسى بويىنشا ۇكىمەتكە, سالالىق مينيسترلىكتەرگە جانە «اتامەكەن» ۇلتتىق كاسىپكەرلەر پالاتاسىنا ءتيىستى ۇسىنىمدار جولداندى. اگرارلىق سالاعا قاتىستى بۇگىن ايتىلعان ماسەلەلەردى دە ءبىز الداعى جۇمىسىمىزدا ەسكەرەتىن بولامىز», – دەدى پالاتا ۆيتسە-سپيكەرى.
ساپار اياسىندا سەناتورلار نيدەرلاندىنىڭ ۆاگەنينگەن ۋنيۆەرسيتەتىمەن جۇمىس جونىندەگى ينستيتۋتتىڭ جانە فرانتسيانىڭ مونپەلە ۋنيۆەرسيتەتىمەن بىرلەسكەن ءسۇت جانە ءسۇت ونىمدەرىنىڭ رەفەرەنتتىك زەرتحاناسىنىڭ اشىلۋ راسىمىنە قاتىستى. مۇنداي يننوۆاتسيالىق ورتالىقتار وتاندىق ماماندار دايارلاۋ ىسىنە جانە عىلىمي جوبالاردى ناتيجەلى جۇرگىزۋگە تىڭ سەرپىن بەرەدى.
نىسانداردى ارالاۋ بارىسىندا سەنات توراعاسىنىڭ ورىنباسارى نۇرلان ءابدىروۆ اگروونەركاسىپتىك كەشەننىڭ ءتۇرلى باعىتتارى بويىنشا 49 زەرتتەۋ زەرتحاناسىنىڭ جانە ەلىمىزدىڭ اگروسەكتورىنا ەنگىزىلىپ جاتقان 18 حالىقارالىق جوبانىڭ جۇمىسىمەن دە تانىستى.
