جىل بويى 8 جىلجىمالى مەديتسينالىق كەشەن ساتىپ الىنىپ, الىس اۋداندار تۇرعىندارىنىڭ دەنساۋلىقتارىن قاداعالاۋ مۇمكىندىگى ارتتى. قازىر وبلىستىق اۋرۋحانادا تسيفرلى انگيوگرافتى ورنالاستىرۋ جۇمىستارى ءجۇرىپ جاتىر. بۇل قان تامىرلارىن كونتراستى زەرتتەۋ تاسىلدەرىن ءبىر ارناعا شوعىرلاندىراتىن, ءوزىنىڭ قۇرامىنا رەنتگەن, كومپيۋتەرلىك توموگرافيا, ماگنيتتى-رەزونانستى توموگرافيا سياقتى زەرتتەۋلەردىڭ ءبارىنىڭ باسىن قۇراپ, ءبىر قورىتىندى شىعاراتىن قۇرال. جاڭا اپپارات دياگنوزدى بارىنشا دۇرىس قويا الاتىندىعىمەن بەلگىلى. وسى قىمبات قۇرال وبلىستىق اۋرۋحاناعا ورناتىلىپ, ءوڭىر تۇرعىندارىنا قىزمەت كورسەتە باستايدى. سونىمەن بىرگە جاڭادان تاعى ءبىر مرت (ماگنيتتى-رەزونانستى توموگرافيا) ساتىپ الىنباق. وعان دا ءتيىستى قاراجات بولىنگەن, الداعى اقپان ايىندا وبلىسقا جەتكىزىلەدى.
ارينە مەديتسينا سالاسىنداعى بارلىق جاعداي وتە جاقسى دەپ ايتا المايمىز. ماسەلەن, 250 ادامدى بىردەن قابىلداي الادى دەلىنگەن جاڭا ەمحانانىڭ قۇرىلىسى بەلگىلەنگەن مەرزىمىندە اياقتالمادى. ونىڭ قۇرىلىسىنىڭ كەستەگە ساي جۇرگىزىلۋىنە ءبىرىنشى كەزەكتە ىندەت كەسىرىن تيگىزدى. كورشى ەلدەردەن جەتكىزىلۋگە ءتيىستى قۇرىلىس ماتەريالدارى كارانتيننىڭ الەگىنەن ۋاقىتىنان كەشىكتىرىلدى. ەندى ونىڭ قۇرىلىسىن اياقتاۋ بيىلعا قالىپ وتىر. تۇرىك كومپانياسى سالىپ جاتقان 480 ورىنعا ارنالعان كوپ بەيىندى اۋرۋحانانىڭ قۇرىلىسى دا وسى سەبەپتى سىزبادان قالىپ كەلەدى.
سونداي-اق وڭىردە دارىگەرلەردىڭ ەڭبەكاقىسى 31 پايىزعا كوتەرىلدى. ال ورتا دەڭگەيدەگى مەديتسينالىق پەرسونالداردىڭ جالاقىسى 20 پايىزعا ارتتى. پاندەميا ىندەتىنە قارسى كۇرەسكەن مەديتسينا قىزمەتكەرلەرىنىڭ بارىنە دەنساۋلىق ساقتاۋ مينيسترلىگى بەكىتكەن كاتەگوريالارعا سايكەس قوسىمشا اقى تولىق تولەندى. بيىل دارىگەرلەردىڭ ەڭبەكاقىسى اتقارعان قىزمەتىنە سايكەس تاعى دا ارتا تۇسپەك.
مەديتسينانىڭ جاس كادرلارىن دايىنداۋعا دا نازار ءبولىنىپ وتىر. 2021 جىلى قالاداعى مەديتسينالىق كوللەدجدىڭ وقۋشىلارىنا ارنالعان 344 ورىندى زاماناۋي جاتاحانا تۇرعىزۋ جوسپارلانىپ وتىر. بۇل جاتاقحانانىڭ شىعىنى وسى جىلدىڭ بيۋدجەتىندە قاراستىرىلعان. جاتاقحانا اۋىل جاستارىنىڭ وقۋعا دەگەن مۇمكىندىگىن ارتتىرارى ءسوزسىز.
سولتۇستىك قازاقستان وبلىسى
