بۇل – جاس تەرگەۋشى ءۇشىن ۇلكەن تابىس. ويتكەنى الاياق ايەل بارىنشا اككى, ادامداردىڭ سەنىمىنە وڭاي كىرگەن. سوندىقتان ونى مويىنداتۋ ءۇشىن بۇلتارتپاس زاتتىق دەرەكتەر مەن ايعاقتاردى تابۋ كەرەك بولدى. جابىرلەنۋشىلەردە تەك قانا ونىڭ بەرگەن قولحاتى بولعان.
الاياق ايەل جابىرلەنۋشىلەردەن «ديپلوم جاساپ بەرەمىن» دەپ 350 مىڭ تەڭگەدەن الىپ وتىرعان. ۋنيۆەرسيتەتتە ادىسكەر بولىپ ىستەيتىنىن ايتىپ, جابىرلەنۋشىنى جەدەلدەتىلگەن باعدارلاما بويىنشا ءبىر-اق جىلدا ديپلوم الۋعا بولاتىنىن ايتىپ سەندىرەدى. «تەك اقىسى 350 مىڭ تەڭگە» دەگەن. ءوزىنىڭ سوزىنە سەندىرۋ ءۇشىن «كليەنتتى» ۋنيۆەرسيتەتكە اكەلىپ, كورپۋستاردى ارالاتىپ, ەكسكۋرسيا دا جاساتقان. ءتىپتى ديپلوم تابىس ەتىلەتىن كۇندى دە ايتىپ, جابىرلەنۋشىنىڭ كۇدىگىن سەيىلتە تۇسكەن.
بۇل ارادا جابىرلەنۋشىلەردىڭ دە قۇقىق بۇزۋشىلىققا ءوز ەركىمەن بارعاندارىن ايتپاي كەتۋگە بولمايدى. ويتكەنى ولار وڭاي جولمەن جوعارى ءبىلىمنىڭ ديپلومىنا وقىماي-اق قول جەتكىسى كەلگەن. سوندىقتان ولاردىڭ كوبى اقشالارىنان نە سەبەپتى ايىرىلىپ قالعاندارىن پوليتسياعا جازىپ بەرۋدەن باس تارتقان.
تەك 2019 جىلدىڭ قازان ايىندا عانا قالانىڭ ەكى تۇرعىنى اقشالارىن قولدى قىلعان ايەلدىڭ ۇستىنەن پەتروپاۆل قالالىق پوليتسيا باسقارماسىنا ارىز تۇسىرگەن. وڭاي ديپلوم الۋدىڭ اۋىلى الىستاپ كەتكەنىن كورگەن سوڭ عانا ەكى جابىرلەنۋشى پوليتسياعا شاعىنۋعا ءماجبۇر بولعان. مىنە, وسى قايشىلىقتى قىلمىستى اشۋ جاس تەرگەۋشى كاميلا ماكيناعا جۇكتەلەدى.
تۇراتىن مەكەنجايى, تولقۇجاتىنىڭ دەرەكتەرى بەلگىلى بولعان الاياق ايەلدى تابۋ قيىنعا تۇسكەن جوق. ول ءتىپتى بوي جاسىرۋدى دا ويلاماعان. ءوز ۇيىندە كۇيەۋى جانە ەكى قىزىمەن بىرگە تۇرىپ جاتقان. تالاي ادامدى قان قاقساتىپ, بارلىعى 20 ملن تەڭگەدەي قاراجاتتى زاڭسىز يەلەنگەن ايەلگە مۇلدە ۇقسامايدى. سىپايى, ۇستامدى 39 جاستاعى كەلىنشەك. «ونى كورگەن ساتتە مەن بۇل ايەلدىڭ الداۋىنا ءتۇسىپ قالماۋدى الدىمەن ويلادىم. ونىڭ ادەپتىلىكپەن ايتقان وتىرىكتەرىن بويىما دارىتپاۋعا تىرىستىم. ەگەر مەن ءسال-ءپال عانا پسيحولوگيالىق بوساڭدىق جاساسام ول مەنى ارباپ الار ەدى», دەيدى كاميلا ماكينا.
وسى ساتتەن باستاپ جاس تەرگەۋشى قىلمىستىڭ دالەلدەرى مەن دەرەكتەرىن ىزدەۋگە كىرىسەدى. ءۇش ايعا سوزىلعان تەرگەۋ ناتيجەلەرى بويىنشا جابىرلەنۋشىلەردىڭ كورسەتپەلەرى, زاتتىق ايعاقتار, اقشانى قاي جەردە, قاي ۋاقىتتا, قانداي جاعدايدا العانى جانە ت.ب. تولىق جينالادى. بۇلتارتپاس دالەل ايەلدى قىلمىسىن تولىق مويىنداپ, تەرگەۋشىنىڭ ايتقان تالاپتارىن ورىنداۋىنا ءماجبۇر ەتەدى. «ايەل ارتىنان ايلالى ارەكەتتەرىنىڭ بۇگە-شۇگەسىن قالدىرماي ءوز اۋزىنان ايتىپ بەردى. ناقتى دەرەكتەر مەن دايەكتەردەن بۇلتارا الماي, ەكى جىل بويى ادامداردى قالاي الداعانىن ايتىپ بەرىپ, قىلمىسىن مويىنداۋعا ءماجبۇر بولدى. كەرىسىنشە, جابىرلەنۋشىلەردىڭ ءبارى بىردەي جاۋاپ بەرۋگە قۇلشىنىس تانىتپادى. بۇلتارتپاس دالەلدەردەن كەيىن عانا وزدەرىنىڭ جوو ديپلومىن نەمەسە سەرتيفيكاتتارىن وڭاي جولمەن العىسى كەلگەندەرىن مويىندادى. جۇرگىزۋشى كۋالىگىن قايتارۋعا كومەكتەسەمىن دەگەنگە اقشا تولەگەندەر بولعان», دەدى اعا لەيتەنانت ك.ماكينا.
وزىنە جۇكتەلگەن مىندەتتى كاسىبي شەبەرلىكپەن جوعارى دەڭگەيدە اتقارعان جاس تەرگەۋشى ارىپتەستەرى اراسىندا زور قۇرمەتكە بولەندى. وعان مەرزىمىنەن بۇرىن «اعا لەيتەنانت» شەنى بەرىلدى. «الاياقتىققا بايلانىستى قىلمىستىق ىستەردى تەرگەۋ اسا كۇردەلى. كوپ تومدى بۇل ىستەر جۇمىستى جاڭادان باستاعان تەرگەۋشى ءۇشىن وڭاي بولعان جوق. ارينە وعان اعا بۋىن ارىپتەستەرى كومەكتەستى. تەرگەۋدىڭ نۇكتەسىن قويۋ ءۇشىن ءتۇن جارىمىنا دەيىن جۇمىس ىستەپ, ءتۇرلى ادامداردىڭ تاعدىرىمەن تانىسۋىنا تۋرا كەلدى. مۇنىڭ ءبارى جاس قىزمەتكەرگە ءومىر مەكتەبىنە اينالدى», دەيدى ءوز ويىمەن بولىسكەن تەرگەۋ ءبولىمىنىڭ باستىعى نۇرجان وماروۆ.
وسى ۋاقىتقا دەيىن كاميلا ماكينا 50-دەن استام قىلمىستىق ءىستىڭ سوتقا دەيىنگى تەرگەۋىن اياقتاعان. قازىر ول باسقارماداعى بىلىكتى تەرگەۋشى بولىپ سانالادى.
پەتروپاۆل
