وسىدان بىرەر اپتا بۇرىن عانا سارىباستاۋ اۋىلىندا 90 ورىندى بوبەكجاي بالاباقشاسى كۇردەلى جوندەۋدەن وتكىزىلىپ, قولدانىسقا بەرىلسە, ەندى, مىنە, بەس مىڭ حالقى بار سارىجاز اۋىلىندا 140 ورىندى «كۇنشۋاق» بوبەكجاي بالاباقشاسى كۇردەلى جوندەۋدەن كەيىن ىسكە قوسىلدى.
اۋىل تۇرعىندارىنىڭ قۋانىشىن بولىسۋگە ارنايى بارعان اۋدان اكىمى نۇرجان قۇدايبەرگەنوۆ بيىلدىڭ وزىندە اۋدان ورتالىعىن ايتپاعاندا, ەلدى مەكەندەردە بىرقاتار نىساندار ىسكە قوسىلعانىن اتاپ ءوتتى. ماسەلەن, م.ماقاتاەۆ, ق.شورمانوۆ, ش.ءۋاليحانوۆ اتىنداعى ورتا مەكتەپتەر كۇردەلى جوندەۋدەن وتكىزىلگەن, قاقپاق, جامبىل اۋىلدارىندا جاڭادان دارىگەرلىك امبۋلاتوريالار پايدالانۋعا بەرىلگەن. «بۇگىن, مىنە, سارىجاز اۋىلىندا قاراۋسىز بوس تۇرعان بۇرىنعى بالاباقشا جاڭا زامانعا ساي قايتا جاڭعىرتىلىپ, بوبەكجاي بالاباقشاسى رەتىندە اشىلىپ وتىر», دەگەن اۋدان باسشىسى تۇرعىنداردى قۋانىشتارىمەن قۇتتىقتادى.
سونىمەن قاتار وسى عيماراتتى كۇردەلى جوندەۋدەن وتكىزىپ, جۇمىستى ساپالى اتقارعان «ەڭبەك» جشس-ءنىڭ ديرەكتورى ابىلداەۆ قۇربان ءتالىپحان ۇلى باستاعان قۇرىلىسشىلار قاۋىمىنىڭ اتىنا جۇرەكجاردى العىسىن ايتتى.
سالتاناتتى ساتتە اۋداندىق ءماسليحاتتىڭ حاتشىسى ەرلان قۇداباەۆ, اۋداندىق اقساقالدار كەڭەسىنىڭ توراعاسى بەكبولات بىرباەۆ, اۋداندىق «قامقور-2» كاسىپوداعىنىڭ توراعاسى ۇلىقپان ابەكوۆ, «ەڭبەك» جشس-ءنىڭ ديرەكتورى قۇربان ابىلداەۆ ءسوز الىپ, اۋىل تۇرعىندارىنا جىلى لەبىزدەرىن جەتكىزدى.
جالپى «كۇنشۋاق» بوبەكجاي بالاباقشاسىندا 6 توپتا 140 بالاپان مەكتەپالدى ءتالىم-تاربيە الاتىن بولادى. عيماراتتىڭ كۇردەلى جوندەۋىنە بيۋدجەتتەن بيۋدجەتتەن 277 ميلليون تەڭگە قاراجات بولىنگەن.
ەسكە سالساق, وسىدان ەكى جارىم جىل بۇرىن ەلباسىنىڭ جارلىعىمەن قايتا قۇرىلعان رايىمبەك اۋدانى قازىر وركەندەۋ ۇستىندە. اۋداندى دامىتۋ ءۇشىن بيۋدجەتتەن 18 ملرد تەڭگەگە جۋىق قارجى بولىنگەن. بيىلعى جىلدىڭ وزىندە عانا قۇرىلىس جۇمىستارىنا 8 ملرد. تەڭگەدەي قاراستىرىلدى, سونىڭ 3 ملرد تەڭگەسى «جۇمىسپەن قامتۋ جول كارتاسى» اياسىندا ءبولىندى.
