«پرەزيدەنت تاپسىرماسىنا سايكەس, «بيزنەسكە ارنالعان ۇكىمەت» جوباسى جۇزەگە اسىرىلدى. قازىر كاسىپكەرلەرگە ءبىر عيماراتتا بىرنەشە قىزمەت ءتۇرىن كورسەتۋ, كەڭەس بەرۋ مۇمكىندىگىنە قول جەتكىزىلدى. جىل سايىن وبلىستا شاعىن جانە ورتا كاسىپكەرلىك سۋبەكتىلەرىنىڭ سانى ارتىپ كەلەدى. وسى سالادا جۇمىسپەن قامتىلعاندار سانى 127,2 مىڭ ادامدى قۇرادى», دەدى ماحامبەت دوسمۇحامبەتوۆ.
اكىمنىڭ ايتۋىنشا, مەملەكەتتىك باعدارلامالار مەن قابىلدانعان شارالار كاسىپكەرلىكتىڭ دامۋىنا وڭ سەرپىن بەرىپ وتىر. بيىل وسىنداي مەملەكەتتىك جانە وڭىرلىك باعدارلامالار شەڭبەرىندە كاسىپكەرلەردى قولداۋعا 4,9 ملرد تەڭگە ءبولىنىپ, 5 مىڭعا جۋىق كاسىپكەرلىك سۋبەكتىسى كومەك الدى. ناتيجەسىندە 3371 جۇمىس ورنى ساقتالدى. ەندى جاڭادان 680 جۇمىس ورنى قۇرىلماق.
سونداي-اق, وڭىردە ەكونوميكانى تۇراقتاندىرۋ, بيزنەسكە قولداۋ ءبىلدىرۋ ءۇشىن سالىقتىق ىنتالاندىرۋ ماقساتىندا تالداۋ جۇرگىزىلىپتى. ناتيجەسىندە جەكەلەگەن ساناتقا كىرەتىن 20 833 كاسىپكەرلىك سۋبەكتىسىنە 5,8 ملرد. تەڭگە كولەمىندە سالىقتىق جەڭىلدىكتەر قاراستىرىلىپتى.
