قۇجات قازاقستاندا اۆتوموبيل شينالارىنىڭ جوعارى تەحنولوگيالىق ءوندىرىسىن اشۋدى, سوعان سايكەس جاڭا جۇمىس ورىندارىن قۇرۋدى, ىشكى نارىقتىڭ قاجەتتىلىگىن قامتاماسىز ەتۋدى جانە ەكسپورتتىق الەۋەتتى دامىتۋدى كوزدەيدى.
كەزدەسۋ بارىسىندا تاراپتار قازاقستانداعى ماشينا جاساۋ سالاسىنداعى وڭ وسىم ديناميكاسىن اتاپ ءوتتى, بۇل رەتتە جاڭا بىرلەسكەن ءوندىرىستى قۇرۋ بولاشاقتا ەكى ەلدىڭ ساۋدا-ەكونوميكالىق جانە ينۆەستيتسيالىق ارىپتەستىگىن ارتتىرۋعا مۇمكىندىك بەرەدى. كاسىپورىننىڭ قۇرىلىس ورنى قاراعاندى وبلىسىنىڭ ساران قالاسىندا ورنالاساتىن بولادى, باس جوبالاۋشى ايقىندالدى, جابدىققا تەحنيكالىق تالداۋ جۇرگىزىلەدى, قۇرىلىس-جوندەۋ جۇمىستارى ءۇشىن مەردىگەرلىك ۇيىمدارعا اككرەديتتەۋ جۇرگىزىلەدى. جوبا شەڭبەرىندە مامانداردى تۇراقتى دايارلاۋ جانە روتاتسيالاۋ ءۇشىن جەرگىلىكتى ءبىلىم بەرۋ مەكەمەلەرىمەن ىنتىماقتاستىق بەلگىلەنگەن. قىزمەتكەرلەردىڭ ءبىرىنشى توبى تاتارستانداعى زاۋىتتا وقۋدان وتەدى. جاڭا قازاقستاندىق كاسىپورىنعا بارلىعى 1100-دەن استام مامان قاجەت.
جوباعا سايكەس شينالاردىڭ پرەمەرالىق پارتياسى قازاقستانداعى كونۆەيەردەن 2022 جىلى شىعادى. زاۋىتتىڭ وندىرىستىك قۋاتى جەڭىل تەحنيكاعا ارنالعان 3 ملن شينا مەن كوممەرتسيالىق تەحنيكا مەن اۆتوبۋستارعا ارنالعان 500 مىڭ شينانى قۇرايدى.
