«ازاماتتاردى قابىلدادىم. جالپى, بيىل 1 مىڭنان استام تۇرعىندى قابىلداپپىن. پاندەميا باستالعاننان بەرى كەزدەسۋلەر ونلاين رەجيمگە اۋىستى. اي سايىنعى قابىلداۋلاردى اپتا سايىنعىعا اۋىستىرىپ, قابىلدانعان ادامدار سانىن ارتتىردىق.
ماسەلەلەر ءارتۇرلى, بىراق نەگىزىنەن باسپانا, قوسىمشا ءبىلىم الۋ, جۇمىسقا ورنالاسۋ, ەلدى مەكەندەردى دامىتۋ جانە تاعى باسقالارعا قاتىستى.
وسىنداي سۇراقتارمەن كەلەتىندەردىڭ بارىنە كومەك كورسەتۋ ءۇشىن جۇيەلى شارالار قابىلدادىق.
مىسالى, كۇزدە تۇرعىن ءۇي سالاسىندا قىزمەت كورسەتەتىن بىرىڭعاي ورتالىق اشتىق (رەسپۋبليكا داڭعىلى, 32). ول جەردەن باسپاناعا كەزەك ءنومىرىن, كەزەككە قالاي تۇرۋدى, ءتۇرلى تۇرعىن ءۇي باعدارلامالارى مەحانيزمدەرىن جانە تاعى باسقا ماسەلەلەردى بىلۋگە بولادى. بۇعان قوسا, باسپانا باعدارلامالارىنا, تۇرعىن ءۇي سەرتيفيكاتى مولشەرىنە جانە تاعى باسقالارىنا بىرقاتار وزگەرىس ەنگىزدىك.
بىزگە الەۋمەتتىك ماسەلەلەردى شەشۋگە «جانۇيا» وتباسى ينستيتۋتىن قولداۋ ورتالىعى كومەكتەسەدى (بەيبىتشىلىك كوشەسى, 14). ول جەردەن قالالىقتارعا ء«بىر تەرەزە» قاعيداتى بويىنشا 70-تەن استام مەملەكەتتىك قىزمەت كورسەتىلەدى. اشىلعان ساتتەن, ياعني 2019 جىلدىڭ تامىزىنان باستاپ - 41,5 مىڭ ازامات كومەك سۇراپ كەلدى.
بيىل «جۇمىسپەن قامتۋدىڭ جول كارتاسى» باعدارلاماسى بويىنشا 15 مىڭنان استام ادامدى جۇمىسقا ورنالاستىردىق. بۇل باعدارلاما بويىنشا بىرقاتار ماڭىزدى الەۋمەتتىك جوبانى جۇزەگە اسىردىق. سونداي-اق وقۋ ورىندارى تۇلەكتەرى ءۇشىن گرانتتار سانىن ارتتىرىپ, تۇرعىندارعا جاقىن جەرلەردەن ء«ۇي ماڭىنداعى دارىگەر» اتتى 29 نىسان اشتىق. بۇل تاعى 180 مىڭ قالا ازاماتىن قامتۋعا مۇمكىندىك بەردى.
سونىمەن قاتار, ەرەكشە بالالار تاربيەلەپ وتىرعان اتا-انالاردىڭ ءوتىنىشىن ەسكەرىپ, بيىل 5 وڭالتۋ ورتالىعىن اشتىق.
بۇعان قوسا, قالانى ارالاۋ كەزىندە تۇرعىندارمەن كەزدەسىپ, ولاردىڭ وتىنىشتەرى بويىنشا جۇمىس اتقارامىز. بۇل شارانىڭ ءبارى مەملەكەت باسشىسىنىڭ «حالىق ۇنىنە قۇلاق اساتىن مەملەكەت» تۇجىرىمداماسىنا كوشۋ بويىنشا مىندەتتەردى جۇزەگە اسىرۋعا مۇمكىندىك بەرەدى»,– دەپ جازدى التاي كولگىنوۆ.
