تەڭ مۇمكىندىكتەر ءۇشىن كۇرەسىپ, مۇگەدەكتىگى بار بالالارعا قول ۇشىن بەرىپ كەلە جاتقان ۇيىمداردىڭ ءبىرى – «بولاشاق ك» قوعامدىق قورى. ۇيىم اتىراۋ وبلىسى بويىنشا جۇمىس جاسايدى, ەرەسەكتەر مەن بالالارعا ارنالعان ورتالىقتا وڭالتۋ قىزمەتتەرىن ۇسىنادى.
ء«بىزدىڭ ۇيىم 20 جىلعا جۋىق الەۋمەتتىك جوبالار اياسىندا ايماق تۇرعىندارىنا كومەك بەرىپ كەلۋدە. دەگەنمەن تەحنولوگيانىڭ دامىپ تۇرعان زامانىندا تەك ءداستۇرلى وڭالتۋ ءادىسىن قولدانۋ بالالاردى اياققا تۇرعىزۋ ۋاقىتىن تەجەيتىنىن تۇسىندىك. ورتالىقتىڭ جۇمىس ىستەۋ تيىمدىلىگىن ارتتىرۋ, سونداي-اق ەمدەلۋشى بالالاردىڭ سانىن كوبەيتۋ ماسەلەلەرىن شەشۋدىڭ جاڭا جولىن قاراستىرۋ كەرەك بولدى. قولداۋ كوزىن ىزدەپ ءجۇرىپ, «ارەكەت» گرانتتار بايقاۋى جايىندا ەستىدىك», - دەپ اڭگىمە ءوربىتتى ۇيىم باسشىسى جىبەك بيسەنوۆا.
ۇيىم قىزمەتكەرلەرى كوپ ويلانباستان بەرىلگەن مۇمكىندىكتى قولدانۋ كەرەك دەپ شەشتى. وسىلايشا ولار بايقاۋدىڭ العاشقى كەزەڭىنە «الەۋمەت ءۇشىن ارەكەت» جوباسىنىڭ ءوتىنىمىن جولدادى. ايماقتىق كەزەڭدەردەن ءساتتى وتكەن جوبا يدەيا اۆتورلارىنا ەلورداعا جولداما سىيلادى. بايقاۋدىڭ سوڭعى كەزەڭىندە بارلىق كوممەرتسيالىق ەمەس ۇيىمدار وقۋدان ءوتىپ, العان بىلىمدەرىن جوبانى ۇسىنۋ جانە جۇزەگە اسىرۋ كەزەڭدەرىندە قولدانۋعا مۇمكىندىك الدى. ناتيجەسىندە «بولاشاق ك» قورى كومانداسى «Samruk-Kazyna Trsut» قورى ۇيىمداستىرعان بايقاۋدا ۇزدىك دەپ تانىلعان 27 كەۇ قاتارىنا ىلىكتى. كوپ ۇزاماي قور مۇشەلەرى جوبانىڭ العاشقى قادامدارىن باستاپ كەتتى.
جوبا اياسىندا ورتالىق جاڭا فيزيوتەراپيالىق ەمدەۋ جابدىقتارىمەن جاراقتاندىرىلدى. زاماناۋي ءپورتاتيۆتى ەلەكتروتەراپەۆتيكالىق اپپاراتتاردا وڭالتۋ شارالارىن جۇرگىزۋ بويىنشا ورتالىقتىڭ 3 مامانى وقىتىلدى. بۇنىڭ بارلىعى قىزمەت كورسەتۋ ساپاسىن جاقسارتۋعا جانە ەرەكشە قاجەتتىلىكتەرى بار بالالاردى كوبىرەك قامتۋعا مۇمكىندىك بەردى.
«بالامنىڭ دياگنوزى تسەرەبرالدى مي سالدانۋى ەكەنىن بىلگەندە ونىڭ ومىرىندە وڭالتۋ شارالارىنىڭ قانشالىقتى ماڭىزدى بولاتىنىن ەلەستەتكەن جوقپىن. قىزىم تۇراقتى تۇردە جىلىنا بىرنەشە رەت وڭالتۋ كۋرستارىن الىپ تۇرۋ كەرەك. مۇنداي جيىلىكپەن مەملەكەتتىك مەكەمەلەردە كومەك الۋ مۇمكىن ەمەس, سەبەبى كەزەك اقىرىن جىلجيدى. ال قىمبات وڭالتۋدى قالتامىز كوتەرە بەرمەيدى. بىراق «بولاشاق» ورتالىعىندا بىزگە جەڭىلدىك قاراستىرىلعان. ول ءۇشىن ءبىز ەرەكشە العىس بىلدىرەمىز», - دەيدى نەسىبەلىنىڭ اناسى.
ورتالىقتا كەشەندى كومەك كورسەتىلەدى: رەابيليتولوگ, نەۆرولوگ, پەدياتر ماماندارىنىڭ كەڭەسى مەن ەم جۇرگىزۋى, ەمدىك دەنە شىنىقتىرۋ, ۆويت جانە بوبات ادىستەرىن قولدانىپ وڭالتۋ, كينەستەتيكس جانە كينەزيوتەراپيا. سونىمەن قاتار پەداگوگيكالىق تۇزەتۋ دە قاراستىرىلعان - لوگوپەد, دەفەكتولوگ, ەرگوتەراپەۆت ماماندارىنىڭ كوررەكتسيالىق ساباقتارى مەن جانە پسيحولوگيالىق قولداۋ.
«الەۋمەت ءۇشىن ارەكەت» جوباسى اياسىندا اتىراۋلىق ەرەكشە قاجەتتىلىگى بار بالالارعا, اتاپ ايتقاندا تسەرەبرالدى مي سالدانۋى بار (4 فورماسى), اۋتيزم سپەكترى بۇزىلعان, داۋن سيندرومى بار بالالارعا جانە ت.ب. وڭالتۋ كۋرستارى ۇسىنىلدى. كۋرس 10-15 كۇن جۇرگىزىلەدى, وعان مامانداردىڭ ساباقتارى مەن كەڭەستەرى, ماسساج تۇرلەرى, جاتتىعۋلار, جاڭا جابدىقتاردا جاسالاتىن ەم شارالار سىندى كەشەندى قىزمەت تۇرلەرى جاتادى. جوبانىڭ ارقاسىندا اقىلى كورسەتىلگەن قىزمەتتەردىڭ ەسەبىنەن 28 «ەرەكشە» بالاعا تەگىن كومەك كورسەتىلدى.
«الەۋمەتتىك كاسىپكەرلىكتى دامىتا كەلە ءبىز تۇرمىس جاعدايى تومەن, الەۋمەتتىك وسال وتباسىلاردان شىققان بالالارعا تەگىن قىزمەت كورسەتە الامىز – ءبىزدى باقىتتى ەتەتىنى دە وسى. ال جوبامىزدىڭ قارجىلاي تۇراقتىلىعى اقىلى قىزمەتتەردى كورسەتۋمەن نەگىزدەلگەن», - دەيدى ۇيىم باسشىسى جىبەك.
ورتالىق ۇجىمى قازىرگى جەتىستىكتەرمەن شەكتەلىپ قالماق ەمەس. ۇيىم مۇشەلەرى «Samruk-Kazyna Trust» قورى «ارەكەت» جوباسى اياسىندا ۇيىمداستىرعان وقۋ باعدارلامالارىندا العان بىلىمدەرىن شىڭداپ, تاجىريبەدە جۇزەگە اسىرۋعا ىنتىق. سوڭعى بولعان جاعدايلارعا قاراماستان ورتالىق جۇمىس تۇراقتىلىعىن ساقتاپ قالا الدى. قازىرگى تاڭدا ۇيىم بارلىق كارانتيندىك شارالاردى ساقتاي وتىرىپ جۇمىس جاسايدى.
