"ەۋرازيا بارىسىنىڭ" بەلدەسۋلەرى باستالدى

تارازداعى "تاراز ارەنا" سپورت سارايىندا «ەۋرازيا بارىسى» باستالدى. بۇل تۋرالى www.egemen.kz ءتىلشىسى حابارلادى.

تۋرنيرگە قازاقستان, موڭعوليا, تۇركيا, يران, تاجىكستان, پولشا, رەسەي مەن قىتاي ەلىنىڭ قۇرمالارى قاتىسادى. جاڭا عانا جارىستىڭ اشىلۋ سالتاناتىندا جەرەبە تاستاۋ ءراسىمى ءوتتى. ءتۋرنيردى جامبىل وبلىسىنىڭ اكىمى قانات بوزىمباەۆ اشتى. ەندى بەلدەسۋلەر شامالى ۋاقىتتان كەيىن باستالادى. قازاقستان قۇراماسىن بەيبىت ىستىباەۆ باستاپ شىعادى. ودان باسقا ءبىزدىڭ كوماندادا ابزال ارىستانبەكوۆ, ەرلان ەستەك, ەرسىن مۇحامەدجانوۆ پەن مۇحيت ءتۇرسىنوۆ كۇش سىناسادى. موڭعوليا كومانداسىندا بويى 194 سم, سالماعى 160 كيلو سۇعارجالعال بولدپرۋەۆ دەگەن بالۋان كۇرەسەدى. فينالدا ەكى ەلدىڭ قۇراماسى كەزدەسسە, بەيبىتكە وسى بالۋان قارسىلاس بولادى. رەسەي كومانداسىندا اعايىندى ارتەم مەن دميتري كوۆالەۆسكيلەر بولسا, تۇركيانىڭ تۋىن اعايىندى ەردال مەن بيۋلەنت دوعاندار الىپ شىعادى. قىتاي قۇراماسىنىڭ بالۋاندارىنىڭ ءبارى موڭعول.

ءبىرىنشى بولىپ قازاقستان مەن يران بالۋاندارى بەلدەستى. بۇل كەزدەسۋدە قازاق بالۋاندارى 5:0 ەسەبىمەن جەڭىسكە جەتتى. قازىر تاجىكستان مەن پولشا بالۋاندارى كىلەمگە شىقتى.

داستان كەنجالين.

دەرەككوز: Egemen.kz.