قوعام • 28 جەلتوقسان، 2020

وتاندىق ۆاكتسينا كوروناۆيرۋستىڭ تارالۋىن توقتاتۋعا كومەكتەسەدى - بەردىبەك ساپارباەۆ

جامبىل وبلىسىنىڭ قورداي اۋدانىندا ورنالاسقان بيولوگيالىق قاۋىپسىزدىك پروبلەمالارىنىڭ عىلىمي-زەرتتەۋ ينستيتۋتىندا ازىرلەنگەن كوروناۆيرۋستىق ينفەكتسياعا قارسى QazCovid-in ۆاكتسيناسىن كلينيكالىق زەرتتەۋدىڭ ءۇشىنشى كەزەڭى وتۋدە، دەپ حابارلايدى Egemen.kz جامبىل وبلىسى اكىمىنىڭ ءباسپاسوز قىزمەتىنە سىلتەمە جاساپ.

Marzhan Tileubekova

26 جەلتوقسان، سەنبى كۇنى ايماق باسشىسى بەردىبەك ساپارباەۆ تاراز قالالىق كوپبەيىندى اۋرۋحاناسىندا بولىپ، دارىگەرلەرمەن ۆاكتسيناتسيا بارىسىن تالقىلادى. وبلىستىق دەنساۋلىق ساقتاۋ باسقارماسىنىڭ باسشىسى اسەت قاليەۆ ەرىكتىلەرگە ۆاكتسينا ەگۋ جۇرگىزىلىپ جاتقانىن جەتكىزدى. ولاردىڭ دەنساۋلىقتارى تولىعىمەن جاقسى، اۋرۋدىڭ سوزىلمالى تۇرلەرى جانە اللەرگيالىق رەاكتسيالارى بولماۋى كەرەك.

«ون كۇن ىشىندە مىڭ جامبىلدىقتى ۆاكتسينامەن قامتۋ جوسپارلانۋدا. ەرىكتىلەرمەن كەلىسىمشار جاسالىنادى. ينەكتسيادان كەيىن سۋبەكتىلەردىڭ انتيدەنەلەرى مەن يممۋنيتەتى تەكسەرىستەن وتەدى. ءبىرىنشى جانە ەكىنشى كەزەڭ بارىسىندا 244 قازاقستاندىق تەستىلەۋگە تارتىلدى دەسەك، ولاردىڭ بارلىعىندا ءساتتى ءوتتى. جاعىمسىز رەاكتسيالار نەمەسە اسقىنۋلار بايقالعان جوق»، - دەدى ول.

بەردىبەك ساپارباەۆ ۆاكتسيناتسياعا كەلىسكەن ەرىكتىلەردى اڭگىمەگە تارتتى. ولار وزدەرىن جاقسى سەزىنەتىندەرىن جانە تۋىستارىن دا ۆاكتسيناتسيالاۋ ءۇشىن اكەلگىسى كەلەتىندەرىن جەتكىزدى.

«ۆاكتسينا - حالىقتى ءارتۇرلى اۋرۋلاردان قورعاۋدىڭ ەڭ ءتيىمدى ادىستەرىنىڭ ءبىرى بولىپ قالا بەرەدى. ءبىزدىڭ وتاندىق ۆاكتسينا كوروناۆيرۋستىڭ تارالۋىن توقتاتۋعا كومەكتەسەدى»، - دەدى وبلىس اكىمى.

دارىگەرلەرمەن اڭگىمە بارىسىندا بەردىبەك ساپارباەۆ ۆاكتسيناتسيا پاندەميانى ەڭسەرۋدىڭ ماڭىزدى قادامى ەكەنىن اتاپ ءوتتى.

«مەملەكەت باسشىسىنىڭ تاپسىرماسى بويىنشا قورداي اۋدانىندا ءتۇرلى ۆاكتسينالار ونىڭ ىشىندە سovid-19-عا قارسى ۆاكتسينا شىعاراتىن بيوفارماتسەۆتيكالىق زاۋىت سالىنىپ جاتقانى بارشاعا ءمالىم. سوندىقتان ءدال وسى زەرتتەۋلەر ءبىزدىڭ وبلىسىمىزدا جۇرگىزىلۋدە. كلينيكالىق سىناقتار ءوندىرىستى مۇمكىندىگىنشە تەز ىسكە قوسۋعا مۇمكىندىك بەرەدى. جامبىل وبلىسى ورتا ازيا اۋماعىندا العاشقىلاردىڭ ءبىرى بولىپ قاۋىپتى ىندەتكە قارسى ءوز ۆاكتسيناسىن شىعارعالى وتىر. بۇل ورايدا كوپ دۇنيە دارىگەرلەرگە بايلانىستى. سىزدەرگە دە وڭاي ەمەس ەكەنىن تۇسىنەمىز. ازاماتتاردىڭ قاۋىپسىزدىگى مەن دەنساۋلىعى سىزدەردىڭ قولدارىڭىزدا ەكەنىن ۇمىتپاۋلارىڭىزدى سۇرايمىز. ءوز كەزەگىندە، وبلىس باسشىلىعى دا سىزدەر ءۇشىن بارلىق جاعدايدى جاساۋعا تىرىسادى»، - دەدى ايماق باسشىسى دارىگەرلەرگە.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز