كەشە, 6 جەلتوقسان كۇنى قازاقستان رەسپۋبليكاسىنىڭ باس پروكۋرورى اسحات داۋىلباەۆ امەريكا قۇراما شتاتتارىنا ساپارى بارىسىندا اقش باس پروكۋرورى ەريك حولدەرمەن كەزدەستى. بۇل تۋرالى قازاقستان رەسپۋبليكاسى باس پروكۋراتۋراسىنىڭ ءباسپاسوز قىزمەتى حابارلادى.
كەزدەسى ۆاشينگتون قالاسىندا ءوتتى. ونىڭ بارىسىندا ەكىجاقتى قۇقىقتىق ىنتىماقتاستىقتىڭ كەڭ اۋقىمى, ونىڭ ىشىندە كەلىسىم-شارت بازاسىن كەڭەيتىپ, نىعايتۋ جانە قىلمىستىق-قۇقىق سالاسىنداعى قۇقىقتىق كومەك كورسەتۋ ماسەلەلەرى تالقىلاندى. تاراپتار ءوزارا ءىس-قيمىل جاساسۋدىڭ قول جەتكىزىلگەن دەڭگەيىنە قاناعاتتانۋشىلىق ءبىلدىردى.
ا.داۋىلباەۆ قازاقستاننىڭ باس پروكۋراتۋراسى قىلمىستىق ىستەردى تەرگەۋ ىسىنە كومەك كورسەتە وتىرىپ, امەريكالىق قۇزىرلى ورگاندارمەن بەلسەندى ىنتىماقتاستىقتا جۇمىس جۇرگىزىپ وتىرعانىن اتاپ كورسەتتى. سونىمەن قاتار فەدەرالدىق تەرگەۋ بيۋروسى مەن ەسىرتكىلەرمەن كۇرەس جونىندەگى فەدەرالدىق اگەنتتىكتىڭ تاراپتارىنان قازاقستاننىڭ قۇقىق قورعاۋ ورگاندارىنا كورسەتىپ وتىرعان كومەكتەرى ءۇشىن العىس ءبىلدىردى.
باس پروكۋرورلار ۇيىمداسقان جانە ترانسۇلتتىق قىلمىستارمەن, تەرروريزممەن جانە ەكسترەميزممەن, كيبەرقىلمىستارمەن, ەسىرتكىنىڭ زاڭسىز اينالىمىمەن جانە قىلمىستىق جولمەن تابىلعان پايدانىڭ زاڭداستىرىلۋىمەن كۇرەس سياقتى سالالار بويىنشا سىندارلى بايلانىستى ورناتۋ مەن دامىتۋعا, تاجىريبە جانە ماماندار الماسۋعا ەكى مەملەكەتتىڭ قۇقىق قورعاۋ ورگاندارىنىڭ ءوزارا قىزىعۋشىلىعى زور ەكەندىگىن ايتتى.
كەزدەسۋدىڭ قورىتىندىسى بويىنشا قازاقستان مەن اقش باس پروكۋرورلارى ءوزارا تۇسىنىستىك پەن ىنتىماقتاستىق تۋرالى ۆەدومستۆوارالىق مەموراندۋم بەكىتۋ ماسەلەسىن پىسىقتاۋ تۋرالى كەلىسىمگە كەلدى.
ساكەن مايلىباي.
دەرەككوز: قازاقستان رەسپۋبليكاسى باس پروكۋراتۋراسىنىڭ ءباسپاسوز قىزمەتى.
