وبلىس اكىمى وڭداسىن ورازالين وبلىس ورتالىعىنان 450 شاقىرىم جانىس بي اۋىلىنا كەلىپ كوگىلدىر وتىنعا قول جەتكىزگەن تۇرعىنداردىڭ قۋانىشىن ءبولىستى. وسىعان دەيىن كومىر جاعىپ, كۇل شىعارىپ كەلگەن جانىس بي اۋىلىنداعى ءاربىر وتباسى قىسقا شامامەن 8-10 توننا كومىر ساتىپ السا, قازىر اقتوبەدەن تاسىمالداۋشىلار ونىڭ ءار تونناسىن اۋىلعا 25 مىڭ تەڭگەدەن اكەلىپ ساتىپ جاتىر. كوگىلدىر وتىنعا قول جەتكىزگەن جانىس بي اۋىلىنىڭ ادامدارى ءۇشىن ءبىر جاعىنان كومىر جاعىپ, كۇل شىعارۋدىڭ بەينەتى ازايسا, ەكىنشى جاعىنان گازدىڭ تولەمى كومىر باعاسىنان الدەقايدا ارزانعا تۇسەدى دەپ قۋانىپ وتىر.
وسىدان ءۇش جىل بۇرىن ىرعىز اۋدانىنا قاراي ماگيسترالدى گاز قۇبىرى شالقار اۋدانىنىڭ شەتىرعىز ەلدى مەكەنىنەن جۇرگىزىلە باستاعان ەدى. گاز قۇبىرىنىڭ ءبىر تارماعى جانىس اۋىلىنىڭ شەتىنە جەتىپ, اۋىلىشىلىك تاراتۋ جەلىلەرىنىڭ جۇرگىزىلۋى كىدىرىڭكىرەپ قالعاندا, وسى جىلدىڭ سوڭىندا وبلىستىق بيۋدجەتتەن قوسىمشا 188 ملن تەڭگە ءبولىندى. وسى قاراجاتقا ەڭ الدىمەن جانىس بي اۋىلىنىڭ ىشىندەگى گاز تاراتۋ جەلىلەرى تولىق اياقتالىپ, تۇرعىن ۇيلەرگە كوگىلدىر وتىن قوسىلدى. ەندى جانىس بي اۋىلىنان 25 شاقىرىم جەردەگى شەڭبەرتال اۋىلىن گازداندىرۋ جۇمىستارى جالعاسادى. ارا قاشىقتىعى 30-40 شاقىرىم بولاتىن وسى اۋىلدار تولىق كوگىلدىر وتىن جەلىسىنە قوسىلسا, وندا تۇرعىندارىنىڭ سانى 15 مىڭنان اساتىن ىرعىز اۋدانىنىڭ تابيعي گازبەن قامتىلۋ دەڭگەيى 60 پايىزدان اسپاقشى. بۇگىندە بۇل كورسەتكىش اۋدان كولەمىندە 40,8%-عا جەتكەن.
شەڭبەرتالدان سوڭ ء ارى قاراي قۇرىلىس, اقشي اۋىلدارىنىڭ ۇيلەرىنە گاز كىرگىزىلەدى. قازىر قىس مەزگىلىندەگى اۋا رايىنىڭ قولايسىزدىعىنا بايلانىستى قۇرىلىس-مونتاجداۋ جۇمىستارى باياۋلاعانىمەن, كوكتەم شىعا وسى ءۇش اۋىلعا گاز قۇبىرىن تارتۋ جۇمىستارى قايتا جاندانادى دەپ كۇتىلۋدە.
وسىلايشا اقتوبە وبلىسىندا تۇرعىندارىنىڭ سانى 1000 ادامنان اساتىن ەلدى مەكەندەرگە گاز قۇبىرىن تارتۋ جۇمىستارى قارقىندى جۇزەگە اسىپ جاتىر. وڭداسىن ورازالين اۋدان تۇرعىندارىمەن كەزدەسۋىندە 2021 جىلى ىرعىز ەلدى مەكەنىنەن قۇتيكول مەن جارما اۋىلدارىنا قاراي ماگيسترالدى گاز قۇبىرىن تارتۋ جۇمىستارى باستالاتىنىن جەتكىزدى.
كەلەسى جىلى اقتوبە وبلىسىندا 6400 تۇرعىنى بار 10 ەلدى مەكەندى گازداندىرۋ جوباسى قولعا الىنىپ, وعان 1,8 ملرد تەڭگە قارجى قاراستىرىلدى. جوسپار تولىعىمەن ىسكە اسسا, 2021 جىلدىڭ سوڭىنا قاراي اقتوبە وبلىسىنىڭ ەلدى مەكەندەرىن گازبەن جابدىقتاۋ كورسەتكىشى 92,1%-عا جەتەدى.
