راحيلا ەرجانوۆا اجەي 1924 جىلى بالقاش كولىنىڭ جاعاسىنداعى بالىقشىلار اۋىلى تاسارالدا دۇنيەگە كەلگەن. اۋمالى-توكپەلى زاماندا بەس-اق سىنىپتىق ءبىلىم الىپتى. تۇرمىس قۇرعاننان كەيىن كۇيەۋىمەن بىرگە بالىق اۋلاۋ شارۋاشىلىعىندا ەڭبەك ەتكەن. ەكى بالانى دۇنيەگە اكەلىپ, ولارعا ونەگەلى تاربيە بەرەدى. جۇمىسىنىڭ تىعىزدىعىنا, وقۋىنىڭ ازدىعىنا قاراماستان بار كۇشىن بالالارىنىڭ ءبىلىم الۋىنا جۇمساپ, ولاردىڭ بويىنداعى ادەبيەتكە دەگەن سۇيىسپەنشىلىكتى وياتا بىلگەن.
كەيۋانانىڭ قىزى بايان اياشبەكوۆا اناسىنىڭ اباي شىعارمالارىنا ەرەكشە قۇنت قوياتىنىن ماقتانىشپەن ايتادى.
– ول زاماندا وقي الاتىن ايەلدەر از بولعان عوي. كوبى تەك قانا ءۇي شارۋاشىلىعىمەن اينالىستى. بىراق مەنىڭ انام جۇرتتان جاسىرسا دا, ءوز بەتىمەن وقۋعا تىرىسىپ, ءبىلىمىن جەتىلدىرىپ وتىرعان. قازاق اقىندارىنىڭ شىعارمالارىن, اسىرەسە ابايدى ءسۇيىپ وقيدى, – دەيدى ول.
بۇگىنگى كۇندە راحيلا اجەيدىڭ 9 نەمەرەسى مەن 16 شوبەرەسى بار. ولاردىڭ بارلىعى دا ونەرلى, كوبى ولەڭگە قۇمار, ءان سالعاندى ۇناتادى. ال كەيۋانانىڭ ءوزى كوز جانارىنىڭ كومەسكى تارتقانىنا قاراماستان, ابايدىڭ كىتابىن قولىنان تاستاماي, ۇزبەي وقىپ وتىرادى.
قاراعاندى وبلىسى,
بالقاش قالاسى
