العاش رەت 2014 جىلى جاستاردىڭ الەۋمەتتىك ماسەلەلەرىن شەشۋ ماقساتىندا «ماڭگىلىك ەل جاستارى – يندۋسترياعا!» – «سەرپىن» مەملەكەتتىك باعدارلاماسى قابىلدانعان ەدى. سودان بەرى كوپتەگەن جاس وبلىسىمىزدا وقۋ وقىپ, جۇمىسقا ورنالاستى, وتباسىن قۇردى. ءارتۇرلى سەبەپتەرمەن «اۋىلىم قايداسىڭ؟» دەپ قايتىپ كەتكەندەرى دە جوق ەمەس. دەگەنمەن «سەرپىن» باعدارلاماسىمەن وقۋعا تۇسكەن جاستارعا مەملەكەت تاراپىنان جاعداي جاسالىپ-اق جاتىر. جىل سايىن گرانتتار بولىنەدى, جاقسى وقىعاندارعا ستيپەنديا تاعايىندالعان, جاتاقحانامەن قامتىلعان. كەيىن وقۋ ورىندارىن ءتامامداپ, جۇمىسقا ورنالاسقان سوڭ ءۇي كەزەگىنە تۇرۋعا بولادى. ايتا كەتەرلىگى, الەۋمەتتىك جەڭىلدىكتەرگە سايكەس ولاردىڭ وتىنىشتەرى باسقا وڭىردەن قونىس اۋدارۋشىلار رەتىندە جەكە قارالادى.
شىعىس قازاقستانداعى «سەرپىن-2050» شتابىنىڭ جەتەكشىسى لەيلا تولەۋبايقىزىنىڭ ايتۋىنشا, «سەرپىن» جوباسىنىڭ اياسىندا وبلىستاعى جوعارى ءبىلىمدى مامانداردى دايارلاۋعا 11 وقۋ ورنى قاتىسقان. قازىرگى تاڭدا س.امانجولوۆ اتىنداعى ۋنيۆەرسيتەتتە 689 تۇلەك ءبىلىم الىپ جاتىر. ونىڭ ىشىندە تۇركىستان وبلىسىنان – 302, قىزىلوردا وبلىسىنان – 156, الماتى وبلىسىنان – 193, جامبىل وبلىسىنان – 32, ماڭعىستاۋدان 6 تالاپكەر كەلگەن.
جالپى, جوعارى وقۋ ورنىن بىتىرگەندەردىڭ ءبىرى جۇمىسقا ورنالاسسا, ەندى ءبىرى ءوز قالاۋلارىمەن ءارى قاراي بىلىمدەرىن جالعاستىرادى. مىسالى, س.امانجولوۆ اتىنداعى شىعىس قازاقستان مەملەكەتتىك ۋنيۆەرسيتەتى رەسپۋبليكانىڭ 24 جوعارى وقۋ ورنىمەن بىرگە اتالعان باعدارلامانى جۇزەگە اسىرۋعا قاتىسىپ كەلەدى. مۇندا 22 ماماندىق بويىنشا ءبىلىم بەرىلەدى.
– ءبىز شىعىسقا 2014 جىلى العاشقىلاردىڭ ءبىرى بولىپ كەلدىك. شىنىن ايتۋ كەرەك, ءبىزدىڭ ءبىلىم الۋىمىز ءۇشىن قاجەتتى جاعدايدىڭ بارلىعى جاسالدى. ارينە, و باستا «سەرپىندىكتەر» از ۇپايمەن ءتۇسىپ جاتىر دەگەن ماسەلەنىڭ باسى قىلتيعان. بىراق اركىم ءوز بىلىمىمەن ءتۇستى دەپ ويلايمىن. ديپلومدارىن الىپ, جۇمىسقا ورنالاسىپ, وسىندا تۇراقتاپ قالعان قاتارلاستارىمىز كوپ. ءوزىم دە وسكەمەندە قالاتىن سياقتىمىن, – دەيدى «سەرپىننىڭ» تۇلەگى باقداۋلەت مۇحيتدين ۇلى.
راس, شىعىسقا قونىس اۋدارعاندار كوپ. بىراق قازاق بالاسى ءۇشىن قازاقستاننىڭ قاي پۇشپاعى بولسىن ءوز جەرى, ءوز ەلى ەمەس پە؟! وڭتۇستىكتەن وقۋ وقيمىن دەپ كەلىپ, باقىتىن تاپقانداردىڭ ءبىرى – نازىم ايتۋعانقىزى.
– «سەرپىن» باعدارلاماسىنىڭ جەڭىلدىكتەرى جەتكىلىكتى. ءتورت جىل بويى ستۋدەنتتەر ۇيىمەن قامتاماسىز ەتەدى, جولاقىسى تولەنەدى. مەن وقۋىمدى تامامداعان سوڭ شىعىستا جۇمىسقا ورنالاستىم. سونىمەن قاتار ماگيستراتۋراعا تاپسىردىم. بيىل تۇرمىسقا شىعىپ, وسكەمەننىڭ كەلىنى اتاندىم, – دەيدى قىزىلوردالىق نازىم.
ستاتيستيكالىق مالىمەتتەرگە سۇيەنسەك, بيىل ديپلوم العان تۇلەكتەردىڭ 98 پايىزى شىعىس قازاقستاندا ەڭبەك ەتىپ, وقۋلارىن جالعاستىرۋ ءۇشىن قالعان.
– قازىرگى تاڭدا كوروناۆيرۋس ينفەكتسياسىنا بايلانىستى ستۋدەنتتەر قاشىقتان ءبىلىم الۋعا كوشكەنى بەلگىلى. الايدا ونلاين وقۋعا مۇمكىندىكتەرى جوق «سەرپىندىكتەر» مەن الەۋمەتتىك جاعدايى تومەن ستۋدەنتتەر ءۇشىن جاتاقحانا wi-fi جەلىسىمەن قامتىلىپ, ءتيىستى جاعدايلار جاسالدى, – دەيدى «سەرپىن-2050» جەتەكشىسى.
ال «سەرپىن-2050» مەملەكەتتىك باعدارلاماسى د.سەرىكباەۆ اتىنداعى شىعىس قازاقستان تەحنيكالىق ۋنيۆەرسيتەتىندە 2015 جىلى باستالدى. العاشىندا پەداگوگيكالىق ماماندىقتار وقىتىلىپ, كەيىننەن تەحنيكالىق جانە اۋىلشارۋاشىلىق ماماندارىن دايارلاي باستادى. اۋدان اكىمدىكتەرىمەن بىرلەسىپ, قاجەتتى كادرلار ءتىزىمى بەكىتىلدى. ءبىلىم الىپ جاتقان «سەرپىندىكتەر» وڭىردەگى «كازتسينك», «AES», ء«ۇلبى مەتاللۋرگيا زاۋىتى» اق, وسكەمەن جىلۋ جۇيەلەرى سىندى كاسىپورىنداردا پراكتيكادان وتەدى. بۇگىندە د.سەرىكباەۆ اتىنداعى شقتۋ-دا «سەرپىن-2050» باعدارلاماسى بويىنشا 242 ستۋدەنت وقىپ جاتىر.
سونداي-اق اتالعان باعدارلاما بويىنشا شىعىس قازاقستان وبلىسىنىڭ تەحنيكالىق جانە كاسىپتىك كوللەدجدەرىندە دە گرانتتار بولىنەدى. 2020-2021 وقۋ جىلىندا جالپى 10 كوللەدجدە 276 وقۋشى ءبىلىم الىپ جاتىر. بۇل جوبا نەگىزىندە تەحنيكالىق جانە كاسىپتىك ءبىلىم بەرۋ مەكەمەلەرى ستۋدەنتتەردىڭ وندىرىستىك تاجىريبەدەن ءوتۋى ءۇشىن 87 كاسىپورىنمەن كەلىسىم جاساسقان.
ءيا, و باستا «سەرپىن-2050» باعدارلاماسىنا كۇمانمەن قاراعان اتا-انانىڭ كۇمانى سەيىلدى. كەرىسىنشە, ۇيدەن جىراقتا ءجۇرىپ جىلى ورنىن تاۋىپ جاتقان بالالارىنىڭ ءار جەتىستىگىنە قۋانىپ وتىراتىن بولدى. ەڭ باستىسى, جۇمىس تاپپاي سەندەلىپ جۇرگەن «سەرپىندىكتەر» جوق.
شىعىس قازاقستان وبلىسى
