سونداي-اق, ءتورت فۋتبول الاڭى جاڭارتىلىپ, اكىمشىلىك عيمارات جوندەۋدەن ءوتتى. تارازدىق تۇرعىنداردىڭ قۋانىشىنا جامبىل وبلىسىنىڭ اكىمى بەردىبەك ساپارباەۆ ورتاقتاسىپ, كوپشىلىكتى ارنايى كەلىپ قۇتتىقتادى.
اكىم ءوز سوزىندە بۇگىندە جامبىلدىقتاردىڭ 32 پايىزى بۇقارالىق سپورتپەن اينالىساتىنىن جەتكىزدى.
ء«بىزدىڭ ماقساتىمىز – بۇل كورسەتكىشتى ارتتىرا ءتۇسۋ. ويتكەنى كەز كەلگەن ەلدىڭ جەتىستىگى, ەڭ الدىمەن, ۇلتتىڭ دەنساۋلىعىنا بايلانىستى. وسى ورايدا وبلىسىمىزدا جاڭا سپورت نىساندارى سالىنىپ, ەسكىلەرى قايتا جاڭعىرتىلۋدا. «ۇلان» ستاديونى بۇعان دەيىن توزىپ, ايانىشتى كۇيدە بولعان. تريبۋنالار, فۋتبول الاڭى, ءبارى ەسكىرگەن ەدى. بالالار ەسكى دوپتارمەن ويناپ جۇرگەن. ەندى, مىنە, بىرنەشە ايدىڭ ىشىندە ستاديوننىڭ ادام تانىماستاي وزگەرگەنىن كورىپ تۇرمىز. جاقىن ماڭداعى ساياباق تا كوپ ۇزاماي جاڭا كەيىپكە ەنەتىن بولادى. اتا-انالار بالالارى ستاديوندا شىنىعىپ جاتقاندا, سول ساياباقتا تىنىعىپ ۋاقىت وتكىزەتىن بولادى», بەردىبەك ساپارباەۆ.
سونىمەن قاتار ستاديون اۋماعىندا ەكى قاباتتى جەكپە-جەك زالى بوي كوتەردى. جاس سپورتشىلار مۇندا فۋتبول, جەڭىل اتلەتيكا, ەركىن كۇرەس, دزيۋدو, ارمرەستلينگ, ۇستەل تەننيسى, كاراتە جانە بوكسپەن اينالىسا الادى. بۇرىن ولار ىنعايلاستىرىلعان نىساندا جاتتىققان بولسا, ەندى ولار ءۇشىن زاماناۋي كوپفۋنكتسيونالدى عيماراتتا اينالىسا الادى.
تۇرعىنداردى كوپتەن كۇتكەن قۋانىشىمەن قازاقستاندىق تاەكۆوندوشى رۋسلان جاپاروۆ تا ارنايى كەلىپ قۇتتىقتادى.
«بالا كەزىمدە مەنىڭ كوپ جاتتىعۋىم وسى جەردە وتكەن بولاتىن. مەن ستاديوننىڭ جاڭارتىلعانىنا شىن جۇرەكتەن قۋانىشتىمىن. ەندى بالالار قولايلى جاعدايدا سپورتپەن شۇعىلداناتىن بولادى», دەدى ول.
1988 جىلى سالىنعان سپورت كەشەنى 5 مامانداندىرىلعان بالالار مەن جاسوسپىرىمدەر سپورت مەكتەبىنىڭ بالانسىندا. بۇل رەتتە اتالعان مەكەمەنىڭ ديرەكتورى, گرەك-ريم كۇرەسىنەن سپورت شەبەرى, وليمپيادا ويىندارىنىڭ جۇلدەگەرى اقجۇرەك تاڭاتاروۆ جامبىلدىق بالۋاندار, دزيۋدوشىلار, بوكسشىلار ءتۇرلى جارىستاردا جەڭىمپازدار قاتارىنان كورىنىپ جۇرگەنىن, ەندى ءوزى باسقارىپ وتىرعان سپورت نىسانى وسى باعىتتا ءارى قاراي دامىپ, وليمپيادا چەمپيوندارىن دايىنداۋعا نيەتتى ەكەنىن جەتكىزدى.
