الەۋمەتتىك جوبانىڭ ماقساتى جاسوسپىرىمدەردىڭ رەپرودۋكتيۆتى دەنساۋلىعىنىڭ ەرەكشە قاجەتتىلىكتەرىن قاناعاتتاندىرۋ ءۇشىن مەديتسينا قىزمەتكەرلەرىنىڭ بىلىكتىلىگىن ارتتىرۋ بولدى, دەپ حابارلايدى ماڭعىستاۋ وبلىستىق دەنساۋلىق ساقتاۋ باسقارماسىنىڭ ءباسپاسوز قىزمەتى.
مەديتسينا قىزمەتكەرلەرىن وقىتۋعا رەسپۋبليكالىق دەڭگەيدەگى ساراپشىلار شاقىرىلدى: نۇر-سۇلتان قالاسىنان مەديتسينا عىلىمدارىنىڭ كانديداتى, «بولاشاق» باعدارلاماسىنىڭ ستيپەندياتى, «University Medical Center» كق رەسپۋبليكالىق دياگنوستيكالىق ورتالىعىنىڭ گينەكولوگيا ءبولىمىنىڭ مەڭگەرۋشىسى, الماتى قالاسىنان جانە وبلىس ورتالىعىنان قازاقستاندىق جىنىستىق جانە رەپرودۋكتيۆتى دەنساۋلىق قاۋىمداستىعىنىڭ حالىقارالىق ساراپشىسى, ەۋروپالىق كونتراتسەپتسيا جانە رەپرودۋكتيۆتى دەنساۋلىق قوعامىنىڭ ديرەكتورلار كەڭەسىنىڭ مۇشەسى. جاسوسپىرىمدەرگە كەڭەس بەرۋ ءۇشىن ەرتە جاستاعى رەپرودۋكتيۆتى دەنساۋلىق نەگىزدەرى تۋرالى نۇسقاۋلىق شىعارىلدى.
جوبا اياسىندا 20 گينەكولوگقا ارنالعان جاسوسپىرىمدەردىڭ رەپرودۋكتيۆتى دەنساۋلىعىنىڭ كلينيكالىق ەرەكشەلىكتەرى مەن كوممۋنيكاتيۆتى قۇزىرەتتىلىگىن ارتتىرۋ ترەنينگى جانە مەكتەپ مەدبيكەلەرىمەن جوعارعى سىنىپ وقۋشىلار اراسىندا رەپرودۋكتيۆتى دەنساۋلىق نەگىزدەرى بويىنشا اقپاراتتىق ءىس-شارالار جۇرگىزۋ جونىندە 5 وقىتۋ سەسسيالارى وتكىزىلدى. جوبانىڭ قاتىسۋشىلارى اقتاۋ, فورت-شەۆچەنكو قالالارىنىڭ, باۋتينو, قۇرىق جانە بورانقۇل اۋىلدارىنىڭ مەديتسينالىق قىزمەتكەرلەرى بولدى.
مەديتسينا قىزمەتكەرلەرىنىڭ بىلىكتىلىگىن ارتتىرۋ جاسوسپىرىمدەرگە كورسەتىلەتىن مەديتسينالىق كومەكتىڭ ساپاسىنا جانە ولاردىڭ ءارى قاراي دامۋىنا اسەر ەتەدى.
«ونلاين فورماتقا قاراماستان, ترەنينگ تەك ءدارىس وقۋمەن شەكتەلمەي بەلسەندى ديالوگتا ءوتتى. العان ءبىلىمىز ءۇشىن العىسىمدى ايتامىن. ءبىز كوپتەگەن پايدالى اقپارات الدىق, وقۋشىلارمەن كۇندەلىكتى جۇمىسىمىزدا كەزدەسەتىن سۇراقتارعا, كەيدە ءوزىمىز بىلمەيتىن بالالاردىڭ سۇراقتارىنا دۇرىس جاۋاپتار الدىق», دەپ ءبولىستى اقتاۋ قالاسىنداعى №7 ورتا مەكتەپتىڭ مەدبيكەسى ءزۇلفيا كيباشەۆا.
جوبانى ماڭعىستاۋ وبلىسىنداعى الەۋمەتتىك ينۆەستيتسيالار باعدارلاماسى شەڭبەرىندە «تەڭىزشەۆرويل» جشس-ءنىڭ قارجىلىق قولداۋىمەن «اقبوبەك» جەكە مەكەمەسى جۇزەگە اسىردى.
تشو-نىڭ الەۋمەتتىك ينۆەستيتسيالار باعدارلاماسى جەرگىلىكتى قوعامداستىقتىڭ قاجەتتىلىكتەرىن قاناعاتتاندىرۋ ءۇشىن جاساقتالعان. كومپانيا ءوز الدىنا الەۋمەتتىك ينۆەستيتسيالار ارقىلى ءوڭىردىڭ ەكونوميكالىق دامۋىن ىنتالاندىرۋ, ءبىلىم بەرۋ مەن وقىتۋدىڭ قول جەتىمدىلىگى مەن ساپاسىن ارتتىرۋ, سونداي-اق حالىق دەنساۋلىعىن جاقسارتۋ مىندەتىن قويادى.
«مەديتسينالىق قىزمەتتەردىڭ قول جەتىمدىلىگى مەن ساپاسىن جاقسارتۋ جانە دەنساۋلىق پەن اۋرۋدىڭ الدىن الۋ تۋرالى اقپارات تشو-نىڭ الەۋمەتتىك ينۆەستيتسيالار باعدارلاماسىنداعى ماقساتتاردىڭ ءبىرى بولىپ تابىلادى. ءبىز وسىنداي جاسوسپىرىمدەر مەن جاستاردىڭ رەپرودۋكتيۆتى دەنساۋلىعىن قورعاۋ جونىندەگى جوبانى قولداپ وتىرعانىمىزعا قۋانىشتىمىز, ويتكەنى بۇنىڭ الەۋمەتتىك ماڭىزدىلىعى زور جانە كەلەسى جىلدارداعى دەموگرافيالىق پروتسەستەرگە تىكەلەي اسەر ەتەتىن بولادى. سونىمەن قاتار, 2018-2020 جىلدار ارالىعىندا «تەڭىزشەۆرويل» جشس ماڭعىستاۋ وبلىسىنىڭ اۋماعىندا 13 الەۋمەتتىك جوبانى, ونىڭ ىشىندە دەنساۋلىق ساقتاۋ سالاسىندا جالپى سوماسى 2,2 ملن اقش دوللارىن قۇرايتىن 2 جوبانى جۇزەگە اسىرعانىن اتاپ وتكىم كەلىپ وتىر», دەپ تولىقتىردى رزابەك ارتىعاليەۆ, تشو ۇكىمەتپەن جانە جۇرتشىلىقپەن بايلانىس ءبولىمىنىڭ باس مەنەدجەرى.
