اباي • 26 جەلتوقسان، 2020

«ابايدىڭ العاشقى كىتابى» دەرەكتى ءفيلمى كورسەتىلەدى

51 رەت كورسەتىلدى

«ابايدىڭ العاشقى كىتابى» ەكى ءبولىمدى دەرەكتى ءفيلمى ەفيرگە شىعادى، دەپ حابارلايدى Egemen.kz.

«Qazaqstan» ۇلتتىق تەلەارناسىنىڭ حابارلاۋىنشا، فيلم  26-27 جەلتوقسان كۇندەرى 17:40-تا كورسەتىلەدى.

فيلم ابايدىڭ 1909 جىلى سانكت پەتەربۋرگتەگى يلياس بوراگانسكي باسپاسىندا باسىلعان العاشقى شىعارمالار جيناعىنىڭ جارىق كورۋ تاريحىنا ارنالادى.

اباي دۇنيەدەن وتكەن سوڭ، تۇراعۇل اباي ۇلى مەن كاكىتاي ىسقاق ۇلىنىڭ ۇيىمداستىرۋىمەن ەل ىشىندەگى ابايدىڭ قاعاز بەتىنە تۇسكەن شىعارمالارى جيناقتالا باستايدى. ابايدىڭ شاكىرتتەرى كوكباي، ءۋايىس، بەيسەمباي اۋزىنان نەگىزگى ولەڭدەرى جازىلىپ الىنادى. جيناقتالعان، جۇيەلەنگەن شىعارمالاردى مۇرسەيىت بىكە ۇلى مەن ۇلى تۇراعۇل كوشىرىپ، قاعاز بەتىنە تۇسىرەدى. بۇل ۋاقىتتا احمەت بايتۇرسىنوۆتىڭ «قازاق» گازەتىنە اباي تۋرالى «قازاقتىڭ باس اقىنى» دەگەن ماقالاسى جارىق كورەدى.

دەرەكتى فيلمدە اباي شىعارمالارىن جيناقتاپ، باسپاعا بەرۋ ىسىنە ءاليحان بوكەيحانوۆتىڭ اتسالىسقانى تۋرالى ايتىلادى. سول ۋاقىتتاعى مۇسىلمان ادەبيەتتەرىن شىعاراتىن يلياس بوراگانسكي ءاليحان بوكەيحانوۆتىڭ وتىنىشىمەن كىتاپقا اتاقتى تۇركولوگ پلاتون مەليورانسكيدى جاۋاپتى رەداكتور ەتىپ بەكىتكەنى تۋرالى دەرەكتەر كەلتىرىلەدى. فيلم وسىلايشا ۇلى اباي مۇراسىنىڭ قاعاز بەتىنە تاڭبالانۋ تاريحىن جان-جاقتى باياندايدى.

ۇلتتىق ارنا دەرەكتى ءفيلمنىڭ ءتۇسىرىم جۇمىستارىن شىڭعىستاۋ ءوڭىرى، سەمەي، ومبى، قازان، سانكت-پەتەربۋرگ قالالارىندا جۇرگىزدى.

جوبادا قۇندى مۇرا تاريحى تۋرالى «جيدەباي-ءبورىلى» قورىق-مۇراجايىنىڭ ديرەكتورى تۇردىعۇل شاڭبايدىڭ، تاريحشى سۇلتان حان اققۇل ۇلى مەن ابايتانۋشى عالىم تۇرسىن جۇرتبايدىڭ پىكىرلەرى بەرىلگەن. 

سوڭعى جاڭالىقتار

ءالتىنساريننىڭ ادامي بولمىسى

رۋحانيات • بۇگىن، 00:01

ۋاقىت جاراتقان ۇلى جىر

ادەبيەت • كەشە

ۇقساس جاڭالىقتار