م.س.باقبەرگەنوۆ تاجىك كسر-ءىنىڭ قورعانتوبە وبلىسىندا دۇنيەگە كەلدى, ءوزىنىڭ بورىشىن كەڭەس اسكەرىندە وتەپ, ۇلتتىق شارۋاشىلىقتا جۇمىس ىستەدى. جەكە قايسارلىعى مەن ەڭبەكسۇيگىشتىگى ارقاسىندا حالىقارالىق قاتىناستار ماماندىعى بويىنشا ماسكەۋدە وقىپ, شىعىس ەلدەرىنىڭ رەفەرەنتى بىلىكتىلىگىن الدى.
م.س.باقبەرگەنوۆ تاجىك كسر-ءىنىڭ قورعانتوبە وبلىسىندا دۇنيەگە كەلدى, ءوزىنىڭ بورىشىن كەڭەس اسكەرىندە وتەپ, ۇلتتىق شارۋاشىلىقتا جۇمىس ىستەدى. جەكە قايسارلىعى مەن ەڭبەكسۇيگىشتىگى ارقاسىندا حالىقارالىق قاتىناستار ماماندىعى بويىنشا ماسكەۋدە وقىپ, شىعىس ەلدەرىنىڭ رەفەرەنتى بىلىكتىلىگىن الدى.
مۇقان سارسەن ۇلى تاۋەلسىز قازاقستاننىڭ اۋعانستانداعى ديپلوماتيالىق وكىلدىگىنىڭ العاشقى باسشىسى ەدى. ەكى ەل اراسىنداعى ديپلوماتيالىق بايلانىستار ءدال ونىڭ تاعايىندالۋىنان كەيىن باستالدى دەۋگە بولادى. قازاقستان ازامات سوعىسىن باسىنان كەشكەن اۋعانستاندى قالپىنا كەلتىرۋ جانە دامىتۋ بويىنشا حالىقارالىق قاۋىمداستىقتىڭ ءىس-ارەكەتىن قولداپ, وعان بەلسەندى اتسالىستى. بۇل شارا وسى ەلدەن شىعاتىن لاڭكەستىك, ەكسترەميزم مەن ەسىرتكى بيزنەسىن قازاقستاندا بولدىرتپاۋ ءۇشىن قاجەت ەدى.
وسى جەردە مۇقان ءسارسەن ۇلىنىڭ قىسىلتاياڭ جاعدايلاردان جول تابا بىلەتىن جەكە جانە ىسكەرلىك قاسيەتتەرى ايرىقشا كورىندى. ول ءبىزدىڭ ديپلوماتيالىق ميسسيامىزدىڭ ۇزاق مەرزىمگە جۇمىس ىستەۋىنە ءتيىستى جاعداي جاسادى. كۇيزەلىستى احۋالدىڭ سالدارىنان اۋعان ۇكىمەتىنىڭ قازاقستاننىڭ ەلشىلىگىنە عيمارات بەرۋ مۇمكىنشىلىگى بولمادى. ونىڭ ۇستىنە, كابۋلدا ءبىزدىڭ ديپلوماتتار تۇرا الاتىن قوناق ءۇي, نەمەسە ءتيىستى جەكەمەنشىك ءۇي دە بولمادى. مۇقان سارسەن ۇلىنىڭ تاجىك ديپلوماتتارىمەن دوستىق قارىم-قاتىناسىنىڭ ارقاسىندا, قازاقستان ديپوكىلدىگىنىڭ قىزمەتكەرلەرى العاشقى ۋاقىتتا سول ەلدىڭ ەلشىلىگىندە تۇرىپ, جۇمىس ىستەدى.
كابۋل قالاسىنداعى قازاقستان ەلشىلىگى قىزمەتكەرلەرىنىڭ ۇيىمداستىرۋىمەن وتكىزىلگەن اس بەرۋدە مۇقان سارسەن ۇلى تۋرالى كوپتەگەن جىلى سوزدەر مەن ەسكە الۋلار ايتىلدى. ماسەلەن, اير پارلامەنتى تومەنگى پالاتاسىنىڭ دەپۋتاتى بوز موحامماد دجاۋزدجاني اۋعان پارلامەنتاريلەرى توبى اتىنان سويلەگەن سوزىندە, ەكىجاقتى بايلانىستاردى ۇلكەن تاباندىلىقپەن ورناتقان م.باقبەرگەنوۆتىڭ ءومىرلىك ۇستانىمدارىن, بەلسەندىلىگىن ايرىقشا اتاپ ءوتتى. قازاقستاندىق ديپلومات اۋعانستاننىڭ بيلىك جانە باسقارۋ ورگاندارىندا لايىقتى بەدەلگە يە ەدى, دەدى ول.
اۋعانستانداعى قازاق دياسپوراسىنىڭ اقساقالى مامۋر جاليل تاريحي وتانىنا 200 ەتنوستىق قازاقتى كوشىرۋدى ۇيىمداستىرۋعا مۇقان سارسەن ۇلىنىڭ جەكە قاتىسقانىن ريزاشىلىقپەن ايتىپ ءوتتى. اۋعانستان مەن قازاقستان اراسىندا تىعىز بايلانىس ورناتۋعا ۇلكەن ۇلەس قوسقان ديپلوماتتى اۋعاندىقتار وسى كۇنگە دەيىن ىقىلاسپەن ەسكە الادى. مۇنى م.باقبەرگەنوۆپەن ۇزاق ۋاقىت بويى دوستىق جانە ىسكەرلىك ءوزارا بايلانىستا بولعان اۋعانستاننىڭ قازاقستان رەسپۋبليكاسىنداعى ءبىرىنشى ەلشىسى ازيزۋللا رۋزي دە اڭگىمەسىنە ارقاۋ ەتتى. قازاقستاننىڭ اۋعانستانعا جىبەرگەن ءبىرىنشى گۋمانيتارلىق كومەگى مەن ەكى ەلدىڭ ىسكەرلىك توپتارى اراسىندا قارىم-قاتىناستار ورناتۋ ءدال وسى قازاقستان ديپلوماتىنىڭ اتىمەن تىعىز بايلانىستى, دەدى ا.رۋزي ءوز سوزىندە.
تاجىكستاننىڭ اۋعانستانداعى ەلشىسى شارافۋددين يموموۆ كۇنى بۇگىنگە دەيىن كۇردەلى كەزدەردى باستان كەشىپ وتىرعان اۋعانستانعا م.باقبەرگەنوۆتىڭ 2003 جىلى كەلگەنىن ەسكە الدى. شەتەلدىك ديپلوماتتار مەكتەپ پەن اۋرۋحانالاردىڭ بولماۋى سياقتى تۇرمىستىق پروبلەمالارعا دۋشار بولاتىن, ولاردىڭ جۇمىستارى دا ايتارلىقتاي قاۋىپ-قاتەرلەرگە تولى ەدى.
مۇقان سارسەن ۇلىمەن تىعىز قاتىناسقان بۇۇ ميسسياسىنىڭ اۋعانستانداعى جەتەكشى قىزمەتكەرى تالاتبەك ماسادىكوۆ تا قازاقستاندىق ديپلوماتتىڭ وسى ەلدەگى ىشكى قوعامدىق-ساياسي جانە الەۋمەتتىك-ەكونوميكالىق جاعدايدى, جەرگىلىكتى حالىقتىڭ ءدىلىن, مىنەز-قۇلقى مەن ويلاۋ ستەرەوتيپتەرىن جاقسى مەڭگەرگەنىن اتاپ ءوتتى. وسىنىڭ ءبارى م.باقبەرگەنوۆتىڭ كابۋلدا جەمىستى قىزمەت ەتۋىنە مۇمكىندىك بەردى, دەدى ول.
«كام گرۋپپ» كومپانياسىنىڭ پرەزيدەنتى ز.كامگار اتاپ وتكەندەي, م.باقبەرگەنوۆ اۋعان ىسكەرلىك توپتارىنىڭ ىشىندە قۇرمەت پەن ابىرويعا يە بولعان. ساۋدا-ەكونوميكا سالاسىنداعى ەكىجاقتى قاتىناستار وسى كىسىنىڭ بەلسەندى قاتىسۋىمەن ايتارلىقتاي وسكەن. اۋعانستان ساۋدا جانە ونەركاسىپ ءمينيسترىنىڭ ءمىندەتىن اتقارۋشى ش.كارگار مۇقان سارسەن ۇلىنىڭ ەكى ەل اراسىنداعى ءتۇرلى سالالارداعى ىنتىماقتاستىقتىڭ قۇقىقتىق نەگىزىن قۇرۋعا كوپ ەڭبەك سىڭىرگەنىن باسا ايتتى.
ءوڭىر تۇرعىندارىنىڭ سالت-داستۇرلەرى مەن ادەت-عۇرىپتارىن ءبىلۋ, داري, پارسى, وزبەك, تۇركىمەن جانە تاجىك تىلدەرىن مەڭگەرۋ, ونىڭ اۋعانستاننىڭ قوعامدىق-ساياسي ومىرىنە بەلسەنە ارالاسۋىنا جاعداي تۋعىزعان. اسىرەسە, جەرگىلىكتى رۋلىق-تايپالىق دەڭگەيدەگى بەدەلدى ادامدارمەن ىسكەرلىك قارىم-قاتىناسى ونىڭ جۇمىسىنا كوپ سەپتىگىن تيگىزگەن. م.باقبەرگەنوۆ كۇندەلىكتى ومىردە اينالاسىنداعىلارمەن ءتىل تابىسا بىلۋىمەن, ىزگىلىكتى ۇستانىمدارىمەن, باسقا دا وڭ قاسيەتتەرىمەن ەرەكشەلەنگەن. قىسقاسى, ونىڭ جوعارى ادامي جانە ىسكەرلىك قاسيەتتەرى وعان وتانىمىز سەنىپ تاپسىرعان قىزمەتتى ابىرويمەن اتقارۋدا ايتارلىقتاي كومەكتەسكەن. م.باقبەرگەنوۆتىڭ قازاقستاننىڭ يرانداعى, اۋعانستانداعى, قىتايداعى, تاجىكستانداعى جانە تۇركىمەنستانداعى ەلشىلىكتەرىندە جاساعان جەمىستى جۇمىستارى ءۇشىن قازاقستان ۇكىمەتى تاراپىنان جوعارى قۇرمەتكە يە بولدى. اتاپ ايتقاندا, ۆەدومستۆو تاراپىنان بىرنەشە رەت گراموتالارمەن, مەدالدارمەن جانە وردەنمەن ماراپاتتالدى.
مۇقان سارسەن ۇلى ءتورت قىز جانە ءبىر ۇل تاربيەلەپ ءوسىرىپ, ولاردىڭ بارلىعىن وتانىنا پايدالى ازاماتتار رەتىندە قالىپتاستىردى. بۇل باعىتتا ونىڭ زايىبى باقىتتىڭ قوسقان ۇلەسى ايتارلىقتاي بولعانىن اتاپ كەتكەن دۇرىس. ويتكەنى, يران مەن اۋعانستانداعى كۇردەلى اسكەري-ساياسي احۋالعا بايلانىستى مۇقان سارسەن ۇلىنىڭ اتالمىش مەملەكەتتەرگە وتباسىن الىپ بارۋىنا مۇمكىنشىلىگى بولمادى. بىرگە جۇرگەن ادامداردىڭ ەستەرىندە ول قامقور اكە, مەملەكەتتىك ديپلوماتيانىڭ جوعارى بىلىكتى قىزمەتكەرى, ءبىلىمدى شىعىستانۋشى جانە سەنىمدى دوس رەتىندە قالماق.
ءسىم ءباسپاسوز قىزمەتى.
