13 جەلتوقساندا ءىىم الماتى اكادەمياسى اسحاناسىنىڭ قوسالقى بولمەلەرىنىڭ بىرىندە 19 جاستاعى سالامات وتەگەنوۆ اسىلىپ قالعان. ونى شەشىپ العاندا, ول ءتىرى بولعان, بىراق كەيىنىرەك كەلگەن جەدەل جاردەم بريگاداسى جىگىتتى قۇتقارا المادى. ول الماتى ۋاقىتىمەن ساعات 16:52-دە قايتىس بولعان.
سول كۇنى, كەشكى ساعات 19-دا سالاماتتىڭ اتا-اناسىنا ءىىم اكادەمياسىنان قوڭىراۋ شالىپ, بالاسى ءوز-وزىنە قول جۇمسادى دەپ حابار بەرگەن. 15 جەلتوقساندا سالاماتتىڭ ءمايىتىن اكادەميانىڭ ەكى وفيتسەرى ورال قالاسىنا جەتكىزىپ بەرەدى. 16 جەلتوقسان كۇنى سالامات تۋعان جەرى اقجايىق اۋدانى, شابدارجاپ اۋىلىنداعى زيراتقا جەرلەندى.
ۇلىنان ايىرىلىپ, قارا جامىلىپ وتىرعان بەكزات يمانعاليەۆانىڭ ايتۋىنشا, سالاماتتىڭ بالا كەزىنەن تەحنيكاعا قىزىعۋشىلىعى جوعارى بولىپتى. ول 10 سىنىبىندا ءىىم الماتى اكادەمياسىنىڭ جانىنان باعدارلامالاۋ, تەحنيكا جانە راديوبايلانىسپەن بايلانىستى تەحنيكالىق فاكۋلتەت اشىلاتىنىن ەسىتىپ, سول فاكۋلتەتتىڭ العاشقى كۋرسانتى بولۋعا نيەتتەنىپ, 2018 جىلى وقۋعا تۇسەدى.
مەملەكەتتىك گرانتپەن ءبىلىم الىپ جاتسا دا, اناسى ۇلىنىڭ وتە ءجيى اقشا سۇرايتىنىن بايقاعانىن جاسىرمادى. بۇل جاعداي كۋرستانتتاردىڭ اتا-اناسى اراسىندا دا تالقىلانعان ەكەن. ولار بالالارى ءۇشىن اكادەميا تاراپىنان سۇرالعان (زاڭسىز) اقشانى امال جوق بەرىپ وتىرعان. ماسەلەن اكادەميادا كيەتىن ارنايى كيىمنەن باستاپ, ازىق-ت ۇلىك پەن تۇرمىستىق تەحنيكا ءۇشىن دە كۋرسانتتار ءوز قالتاسىنان قاراجات شىعارىپ كەلىپتى. سايكەسىنشە مارقۇمنىڭ تۋىستارى دا بالاسىنا بۇل سومانى ءجيى جىبەرىپ وتىرىپتى.
ولار ەمتيحان كەزىندە وقىتۋشىلار تاراپىنان سالاماتتان سەسسيانى جوعارى ۇپايمەن تاپسىرسا دا, جاقسى باعا الۋ ءۇشىن 80 مىڭ تەڭگە, كەيبىر كەزدەرى ودان دا كوپ سومادا قاراجات تالاپ ەتىپ كەلگەنىن, ال ناريادقا ءتۇسۋ ءۇشىن ول بىرەۋگە 2,5 مىڭ تەڭگەدەن بەرۋ كەرەك ەكەنىن ەسكە الىپ وتىر. تۋىستارى مۇنداي جاعداي ءوز بالاسىنىڭ باسىندا عانا ەمەس ەكەنىنە دە سەنىمدى.
- سالامات وقۋعا كەتەر كەزدە دە ءار جولى وعان جاڭا ارنايى كيىم مەن اياق كيىم الىپ بەرىپ وتىردىق. دەسە دە ول الماتىعا بارعان سوڭ ىلعي ەسكى ءارى باسقا بىرەۋدىڭ كيىمىمەن جۇرەتىنىن بايقايتىنبىز. بۇل ءبىر رەت بولعان جاعداي ەمەس. سونداي-اق وقۋدان ورالعاندا توزىعى جەتىپ, جىرتىلىپ قالعان باسقا اياق كيىممەن قايتاتىن, دەيدى اتا-اناسى.
ولاردىڭ پايىمىنشا, وسىنشا ۋاقىت بويى سالاماتقا قىسىم كورسەتىلىپ كەلگەن. ويتكەنى مارقۇم كۋرسانت سوڭعى رەت ۇيىنە كەلگەندە اكادەمياعا قايتقىسى كەلمەيتىنىن اشىق ايتقان. ول وقۋىن ورالداعى جەرگىلىكتى جوو-عا اۋىستىرۋعا نيەتتى ەكەنىن دە جاسىرماپتى. ەشتەڭەدەن كۇدىكتەنە قويماعان اناسى, ۇلىنىڭ ول نيەتىنە ءمان بەرە قويماپتى.
سالامات اكادەمياعا بارعان سوڭ اقشا سۇراۋى قايتادان جيىلەي تۇسكەن. بۇل جولى 10-20 مىڭ تەڭگە ەمەس, 100 مىڭنان باستالاتىن قاراجات قاجەت ەتكەن.
- مەن ءبىر كۇنى ودان نەگە ۇنەمى وسىنداي قوماقتى قاراجات كەرەك ەكەنىن سۇرادىم. بالام ماعان جاۋاپ رەتىندە: «اپا, ەگەر ءسىز ماعان قازىر كەشكە 100 مىڭ جىبەرمەسەڭىز, تاڭەرتەڭ مەن 200 مىڭ تەڭگە قارىز بولىپ قالامىن», دەدى. مەن ول كەزدە ۇلىمدى «ەسەپتەگىشكە» وتىرعىزعانىن بىردەن تۇسىنە قويمادىم. 100 مىڭ تەڭگە تاپتىم. كەيىنىرەك ول 100 مىڭ ەمەس, 200 مىڭ بەرۋىمدى سۇرادى. بۇل جولى شىدامىم تاۋسىلدى, مەن ول بۇدان ارتىق اقشا المايتىنىن ايتىپ ەدىم», دەپ ەسكە الادى ايەل.
اناسىنىڭ بۇل سۇراعىنا سالامات «بۇل تۋرالى بىرەۋگە ايتار بولساڭىزدار مەنى ۇمىتىڭىزدار» نەمەسە «وسىنشا قاراجات جىبەرمەسەڭىزدەر قول-اياعىمنان ايىرىلۋىم مۇمكىن» دەگەن سوزدەر دە ايتقان. كەيىنگى 3,5 ايدىڭ وزىندە تۋىستارى سالاماتقا 630 مىڭ تەڭگە اۋدارىپتى.
سالامات وتەگەنوۆ ءومىرىنىڭ سوڭعى كۇنىندە ساعات 11.00-دەن باستاپ اعاسىنا 300 مىڭ تەڭگەنى الماتى ۋاقىتى بويىنشا ساعات 17.00-گە دەيىن جىبەرۋىن سۇراپ تىنىمسىز حابارلاما جىبەرگەن. ال اعاسى سالاماتتىڭ حابارلامالارىن تەك كەشكە كورىپتى. سالاماتتان سوڭعى حابارلاما 16:31-دە كەلگەن. «مەن كەتتىم» دەگەن ءماتىن راسىندا جاس كۋرسانتتىڭ تۋىستارىنا ايتقان سوڭعى ءسوزى ەكەن.
مارقۇمنىڭ تۋىستارى ايتقان اكادەمياداعى كۋرسانتتاردان ۇنەمى اقشا جيناۋعا قاتىستى ءىىم اكادەمياسى جاۋاپ بەرگەن جوق. دەسە دە بۇل جاعدايلار ىشكى ىستەر مينيسترلىگى تاراپىنان تەكسەرىلىپ جاتىر. سونداي-اق مينيسترلىكتىڭ ءباسپاسوز قىزمەتى اكادەميا باستىعى و.ح.سمايىلوۆتىڭ قىزمەتىنىنەن بوساتىلعانىن جانە كۋرسانتتىڭ قۇپيا ولىمىنە قاتىستى تەكسەرۋ امالدارى ءجۇرىپ جاتقانىن حابارلادى.
