وبلىستىق ىشكى ساياسات باسقارماسى باسشىسىنىڭ ورىنباسارى ماقپال دوسىمبەكوۆا مەملەكەت باسشىسىنىڭ قولداۋىمەن وڭىردە «بەيبىتشىلىك پەن كەلىسىم» جوباسى جۇزەگە اسىرىلۋدا ەكەنىن, تۇرعىنداردىڭ نارازىلىعىن تۋدىرۋى مۇمكىن وزەكتى ماسەلەلەردى ەسكەرە وتىرىپ, قاۋىپ-قاتەرلەر كارتاسى ازىرلەنگەنىن, «اسارلاتىپ ءۇي سالۋ» جوباسى اياسىندا 123 ءۇيدىڭ قۇرىلىسى باستالىپ, بۇگىنگى تاڭدا 60 ءۇيدىڭ كىلتى تابىستالعانىن, ال «ۇلگىلى اۋىل» بايقاۋىنا 13 اۋىل قاتىسقانىن باياندادى. سونىمەن قاتار وبلىستىق دەنە شىنىقتىرۋ جانە سپورت باسقارماسىنىڭ باسشىسى نۇربول جۇنىسبەكوۆتىڭ ايتۋىنشا, بيىل اتالعان سالانى دامىتۋعا 5,8 ميلليارد تەڭگە بولىنگەن. سپورتپەن جۇيەلى شۇعىلداناتىن جامبىلدىقتاردىڭ سانى 359,3 مىڭ ادامدى قۇرايدى. بۇل ورايدا, وبلىس تۇرعىندارى ءۇشىن قولجەتىمدى 2 590 سپورت نىسانى جۇمىس ىستەپ تۇر. سپورتتىڭ ءار ءتۇرى بويىنشا ەلىمىزدىڭ ۇلتتىق قۇراماسىنا 1 121 جامبىلدىق سپورتشى ەنگەن. باسقارما باسشىسى ءبىر جاتتىقتىرۋشىعا قازاقستان رەسپۋبليكاسىنىڭ ەڭبەك سىڭىرگەن جاتتىقتىرۋشىسى, 42 سپورتشىعا ەلىمىزدىڭ سپورت شەبەرى, ەكى سپورتشىعا حالىقارالىق دارەجەدەگى سپورت شەبەرى, ءبىر مامانعا ۇلتتىق سپورت تۇرلەرى بويىنشا سپورت شەبەرى اتاعى بەرىلگەنىن جەتكىزدى. ال 23 مامان جوعارى ساناتتاعى جاتتىقتىرۋشى اتانعان. سونداي-اق توكيو وليمپياداسىنا جولداما العان دزيۋدوشى ەلدوس سمەتوۆ, ەركىن كۇرەس شەبەرى الىشەر ەرعالي, بوكسشى ءابىلحان امانقۇل ءوڭىر ماقتانىشى ەكەنىن دە اتاپ ءوتتى.
وبلىستىق مادەنيەت, ارحيۆتەر جانە قۇجاتتاما باسقارماسى باسشىسىنىڭ مىندەتىن اتقارۋشى سارا ماديەۆا بيىل وبلىستىڭ مادەنيەت سالاسىنا 7,1 ميلليارد تەڭگە, ال «جۇمىسپەن قامتۋدىڭ جول كارتاسى-2020» باعدارلاماسى اياسىندا 499,4 ميلليون تەڭگە يگەرىلۋدە ەكەنىن ايتتى. «اۋىل – ەل بەسىگى» باعدارلاماسى بويىنشا جالپى كولەمى 660 ميلليون تەڭگەگە ءۇش مادەني نىساننىڭ قۇرىلىسى جۇزەگە اسىرىلۋدا. ال «تسيفرلى قازاقستان» كەشەندى باعدارلاماسى شەڭبەرىندە 139 اۋىلدىق وكرۋگتە كىتاپحانالار جانىنان 202 تسيفرلاندىرىلعان اقپاراتتىق جانە كوۆوركينگ ورتالىقتارى اشىلعان. كارانتين تالاپتارىنىڭ ەنگىزىلۋىنە بايلانىستى بيىلعى ناۋرىز ايىنان باستاپ ونلاين رەجىمدە 10 444 ءىس-شارا ۇيىمداستىرىلعان. ءوز سوزىندە وبلىستىق ءدىن ىستەرى باسقارماسىنىڭ باسشىسى جانگەلدى وماروۆ وڭىردە 358 ءدىني بىرلەستىك پەن فيليال, 312 مەشىت جانە 46 شىركەۋ جۇمىس ىستەيتىنىن حابارلادى. قازىر كوپتەگەن ادامدار ءوز پىكىرلەرىن الەۋمەتتىك جەلى ارقىلى بىلدىرۋدە. كوپتەگەن سىندار ايتىلۋدا. ولاردىكى ورىندى. الايدا تۇرعىندار كوبىنە ايماقتا جۇزەگە اسىپ جاتقان اۋقىمدى شارالار تۋرالى بىلە بەرمەيدى. سوندىقتان ىشكى ساياسات باسقارماسى الەۋمەتتىك جەلىلەرمەن جۇمىس ىستەۋى ءتيىس. سونىمەن قاتار ۇكىمەتتىك ەمەس ۇيىمداردىڭ قىزمەتىن باقىلاۋعا الۋ قاجەت. ولارعا جەتكىلىكتى دەڭگەيدە قاراجات بولىنۋدە. جۇمىس تا سوعان ساي بولۋى كەرەك. نەگە وبلىستىق فيلارمونيا اۋىلدارعا بارىپ, اۋىل تۇرعىندارىنا ونەر كورسەتپەيدى؟ وسىعان نازار اۋدارۋىڭىزدى سۇرايمىن», دەدى ب.ساپارباەۆ.
جالپى, اعىمداعى جىلدىڭ 11 ايىنىڭ قورىتىندىسى بويىنشا جامبىل وبلىسى جوعارى الەۋمەتتىك-ەكونوميكالىق كورسەتكىشتەرگە قول جەتكىزىپ وتىر. وڭىردەگى ونەركاسىپ, اۋىل شارۋاشىلىعى, قۇرىلىس, ساۋدا, كولىك جانە بايلانىس سەكىلدى التى نەگىزگى سالانىڭ دامۋ ديناميكاسى ايرىقشا ماڭىزدى. وبلىستىق ەكونوميكا جانە بيۋدجەتتىك جوسپارلاۋ باسقارماسىنىڭ باسشىسى گۇلدانا جاۋىنبەكوۆانىڭ ايتۋىنشا, ونىڭ قىسقامەرزىمدى ەكونوميكالىق ينديكاتورى 102,5 پايىزدى قۇراعان. سونداي-اق ول ەل ۇكىمەتى مەن وبلىس اكىمى اراسىنداعى مەموراندۋمدا بەلگىلەنگەن ينديكاتورلاردىڭ ورىندالۋى تۋرالى بايانداپ, بۇگىنگى تاڭدا 22 ينديكاتوردىڭ 18-ىنە قول جەتكىزىلسە, بىرەۋىنىڭ اسىرا ورىندالعانىن ايتتى. ال 3 ينديكاتورعا قول جەتكىزىلمەگەن. ونەركاسىپ ونىمدەرىنىڭ ەكسپورتى مەن نەگىزگى كاپيتالعا سالىنعان ينۆەستيتسيالاردىڭ ءوسۋ كورسەتكىشتەرى تومەن. ال ءۇشىنشى ينديكاتوردىڭ ورىندالماۋىنا انا ءولىمى اسەر ەتكەن. وتكەن كەزەڭدە وبلىستىق بيۋدجەتتىڭ اتقارىلۋى كىرىستەر بويىنشا 102 پايىزدى قۇراپ, سالىقتىق تۇسىمدەر 110,3 پايىزعا قامتاماسىز ەتىلدى. بۇل رەتتە وبلىس بويىنشا بيۋدجەت قاراجاتىن يگەرۋ 99,4 پايىزدى قۇراعان. وبلىستىق قارجى باسقارماسىنىڭ باسشىسى روزا يساەۆا بۇگىنگى تاڭدا يگەرىلمەگەن 2 ميلليارد 493 ميلليون تەڭگە قالىپ وتىرعانىن, وسى ورايدا شۋ اۋدانىنىڭ جۇمىسى باياۋ ەكەنىن, وندا يگەرىلمەگەن بيۋدجەت قاراجاتىنىڭ كولەمى 329,7 ميلليون تەڭگەنى قۇراپ وتىرعانىن جەتكىزدى. ال الدىن الا ەسەپتەۋلەر بويىنشا وبلىستىق دەنساۋلىق ساقتاۋ باسقارماسىندا 364 ميلليون تەڭگەدەن استام قاراجات يگەرىلمەي قالۋ ىقتيمالدىلىعى دا ايتىلدى. بۇل تىزىمگە تاراز قالاسى, بايزاق اۋدانى مەن وبلىستىق كاسىپكەرلىك جانە يندۋستريالدى-يننوۆاتسيالىق دامىتۋ باسقارماسى دا ەنەدى. بۇل ورايدا, ب.ساپارباەۆ تاراز قالاسى مەن اۋدان اكىمدەرىنە بولىنگەن بيۋدجەت قاراجاتىن يگەرۋگە جانە 2020 جىلعا بەلگىلەنگەن مىندەتتەمەلەردى ورىنداۋعا بار كۇش-جىگەرىن سالۋدى تاپسىردى. سونداي-اق وبلىس اكىمى كوروناۆيرۋس بويىنشا جاعداي ءالى دە الاڭداتارلىق كۇيدە ەكەنىن اتاپ ءوتتى. وڭىردەگى باس دارىگەرلەرگە تۇرعىندار ساپالى مەديتسينالىق قىزمەت الۋى ءۇشىن باسقا ەلگە سابىلماۋى كەرەكتىگىن ەسكەرتتى.
ب.ساپارباەۆ وبلىستىق پەريناتالدىق ورتالىقتا وتكەن كەزدەسۋگە دە قاتىسىپ, دەنساۋلىق ساقتاۋ سالاسىنداعى جاعدايمەن تانىستى. وبلىستىق دەنساۋلىق ساقتاۋ باسقارماسىنىڭ باسشىسى اسەت قاليەۆتىڭ ايتۋىنشا, اتالعان سالانى دامىتۋعا 90 ميلليارد تەڭگەدەن استام قاراجات بولىنگەن. وبلىستىق كوپبەيىندى اۋرۋحانانىڭ بازاسىندا دۇرىس تاماقتانۋ ورتالىعى, كوپبەيىندى بالالار اۋرۋحاناسى بازاسىندا «قامقورلىق» وڭالتۋ ورتالىعى اشىلعان. جەدەل جاردەم ماشينالارى GPS ناۆيگاتسياسىمەن جابدىقتالعان. سونداي-اق 18 رەانيموبيل, 8 جىلجىمالى مەديتسينالىق كەشەن جانە 70 سانيتارلىق اۆتوموبيل ساتىپ الىنىپ, 1 069 079 تۇرعىننىڭ ەلەكتروندى دەنساۋلىق پاسپورتى راسىمدەلگەن. «جۇمىسپەن قامتۋدىڭ جول كارتاسى» باعدارلاماسى اياسىندا 10 دەنساۋلىق ساقتاۋ نىسانى كۇردەلى جوندەۋدەن, 4 نىسان اعىمداعى جوندەۋدەن وتكەن. الايدا وكىنىشكە قاراي, انا ءولىمى, ونكولوگيالىق اۋرۋلاردان بولاتىن ءولىم-ءجىتىم كورسەتكىشى ارتقان. بۇل رەتتە اكىم دارىگەرلەر جۇكتى ايەلدەردىڭ ەسەبىن جۇرگىزىپ, ولاردىڭ ۋاقتىلى تەكسەرۋدەن ءوتۋىن قاداعالاۋ كەرەگىن تاپسىردى. سونىمەن قاتار بۇگىندە جالپى 4 مىڭنان استام توسەكتىك ورىن ازىرلەنىپ, ءدارى-دارمەكتىڭ ەكى ايلىق قورى جاساقتالعان. جاز ايىمەن سالىستىرعاندا قازىر مەديتسينالىق جابدىقتاردىڭ سانى ارتتى. الايدا مەديتسينا مامانداردىڭ جەتىسپەۋشىلىگى ءسوز بولدى. وبلىسقا 194 جاس مامان كەلسە, ونىڭ 76-سى تاراز قالاسىندا, 118-ءى اۋدانداردا جۇمىسقا ورنالاسقان. 98 مامانعا الەۋمەتتىك كومەك كورسەتىلىپ, ولاردىڭ 15-ءى تۇرعىن ۇيمەن قامتاماسىز ەتىلگەن. ماماندار ماسەلەسىن شەشۋ ءۇشىن تاراز قالالىق كوپسالالى اۋرۋحانا بازاسىندا س.اسفەندياروۆ اتىنداعى قازاق ۇلتتىق مەديتسينالىق ۋنيۆەرسيتەتىنىڭ فيليالى اشىلاتىن بولدى. ال كەلەر جىلى ونكولوگيالىق ورتالىق اشىلادى. ونىڭ جانىنان مەملەكەت-جەكەمەنشىك ارىپتەستىك اياسىندا كوپسالالى اۋرۋحانا سالىنادى. ب.ساپارباەۆ باسقا وڭىرلەردىڭ تاجىريبەسىن نەگىزگە الىپ, مۇعالىمدەر مەن دارىگەرلەردى تۇرعىن ۇيمەن قامتاماسىز ەتۋ جۇزەگە اسىرىلاتىنىن, مەملەكەت باسشىسىنىڭ تاپسىرماسىنا سايكەس, مەديتسينا قىزمەتكەرلەرىنىڭ جالاقىسىن كەزەڭ-كەزەڭىمەن ارتتىرۋ جوسپارلانۋدا ەكەنىن اتاپ ءوتتى. سونداي-اق بارلىق قابىلدانىپ جاتقان قولداۋ شارالارىنا قاراماستان, دەنساۋلىق ساقتاۋ سالاسىنىڭ قازىرگى جاي-كۇيى كوڭىل كونشىتپەيتىنىن باسا ايتتى.
جامبىل وبلىسى
