قابىلدانعان جەدەل شارالارعا قاراماستان وبلىس اۋماعىندا كوروناۆيرۋستىڭ 4 532 جاعدايى تىركەلىپ وتىر. الايدا ينفەكتسيالىق ستاتسيوناردان 4 232 ازامات ساۋىعىپ شىققان بولسا, وكىنىشكە قاراي 61 ناۋقاس قايتىس بولعان. ەڭ ءبىرىنشى كەزەكتە ادامنىڭ ءومىرى اسا قۇندى ەكەنىن ەسكەرسەك, بۇل از شىعىن ەمەس. جامبىل وبلىستىق دەنساۋلىق ساقتاۋ باسقارماسىنىڭ باسشىسى اسەت قاليەۆتىڭ ايتۋىنشا, ءبىر اپتانىڭ ىشىندە وڭىردە كوروناۆيرۋس ىندەتىن جۇقتىرۋدىڭ 110 دەرەگى انىقتالىپتى.
«قازىرگى تاڭدا وبلىستا كوروناۆيرۋس ينفەكتسياسىنا پوليمەرازدى تىزبەكتى رەاكتسيا جۇرگىزۋ ارقىلى تەستىلەۋ 9 زەرتحانادا وتكىزىلەدى. جالپى, وبلىس بويىنشا تاۋلىكتىك قۋات 2 740-تى قۇراپ وتىر. سونىمەن قاتار ينفەكتسياعا پوليمەرازدى تىزبەكتى رەاكتسيا جۇرگىزۋ ارقىلى تەستىلەۋدىڭ كولەمىن ۇلعايتۋ ماقساتىندا وبلىستاعى ەمدەۋ, الدىن الۋ ۇيىمدارىندا اپتاسىنا 9 مىڭ تەستىلەۋ وتكىزۋ تاپسىرىلدى», دەيدى ول. ەلىمىزدەگى «قىزىل ايماققا» ەنگەن بىرقاتار وبلىس جانە قالالارداعى احۋال بۇگىندە تۇراقتالىپ كەلەدى. بۇل ماسەلە بويىنشا دا ءتيىستى شارالار قابىلدانىپ, جۇمىستار جۇرگىزىلگەن. الايدا جامبىل وبلىسىندا توتەنشە جاعداي رەجىمى توقتاتىلعاننان كەيىن, بارلىق كارانتين شارالارى بوساڭسىپ كەتكەن. شىنىندا دا قازىر قالا كوشەلەرىنەن مەديتسينالىق بەتپەردە تاعىپ جۇرگەن ادامداردى كەزدەستىرۋ قيىن. بۇدان بولەك, ادامدار كوپ شوعىرلاناتىن مەيرامحانا سياقتى قوعامدىق ورىندار مەن قوعامدىق كولىكتەردىڭ جۇمىسى تاعى بار. سالدارىنان وبلىس ورتالىعى مەن بىرقاتار اۋداندا قايتادان ىندەت ءورشي باستادى. وبلىس اكىمى بەردىبەك ساپارباەۆ تا بۇل رەتتە مونيتورينگتىك توپتاردىڭ جۇمىسىنىڭ وتە ناشار ەكەنىن, تارتىپكە باعىنباعاندارعا قاتاڭ جازا قولدانۋ قاجەتتىگىن, قوعامدىق كولىكتەردىڭ جۇمىسىن دا باقىلاۋعا الۋ كەرەگىن ايتقان بولاتىن. شىنىندا دا, قازىر قالا ىشىندە ءجۇرىپ جاتقان قوعامدىق كولىكتەردىڭ جۇمىسىنا رەتتىلىك كەرەك بولىپ تۇر. ماسەلەن, جيىرما ورىندىق كولىك بولسا, وعان وتىز, قىرىق شاقتى ادام ءمىنىپ الادى. بۇل دا قاۋىپتى ىندەتتىڭ قايتا ورشۋىنە اكەلىپ سوعۋى مۇمكىن جاعدايلار. سونىمەن قاتار وڭىردە سوڭعى ايلاردا دەزينفەكتسيا جۇمىستارى مۇلدەم ۇمىتىلعان. جاۋاپتى مەكەمە باسشىلارىنىڭ سوزىنە سەنسەك, ءبارى دە ساقاداي-ساي, كەرەمەت. بىراق ناقتى ءىس جۇزىندە ولاي بولماي وتىر. تاپسىرما بەرىلگەنىمەن, ونىڭ ورىندالۋى ويداعىداي ەمەس.
بىرقاتار اۋداندارمەن قاتار, تاراز قالاسىندا دا قاۋىپتى ىندەتتىڭ قايتا ءورشي باستاعانىن ايتتىق. بۇل كۇندە وبلىس ورتالىعىنىڭ وزىندە 300 مىڭنان استام حالىق بار. جۋىردا عانا تاراز قالاسىنىڭ اكىمدىگى شاھارداعى قوعامدىق ورىندارعا رەيد جۇرگىزىپ, ىندەت جۇقتىرۋى مۇمكىن بىرقاتار جاعدايدى انىقتادى. ماسەلەن, «دامدەس» سۋپەرماركەتى سياقتى ءىرى ساۋدا ورىندارى مەن وزگە دە دۇكەندەردەگى, «DISKOVERY», «يزيۋم» ءدامدى پالاۋ» سىندى بىرقاتار تاماقتانۋ ورىندارىندا دا داياشىلاردىڭ كەلۋشىلەرگە كارانتين تالاپتارىن ساقتاماي قىزمەت كورسەتكەنى انىقتالعان. كەلۋشىلەر دە بۇل تالاپتاردى ساقتاماعان. بۇل رەتتە تاراز قالاسىنىڭ باس مەملەكەتتىك سانيتارلىق دارىگەرى ريتا التىنباسوۆانىڭ ايتۋىنشا, جىل باسىنان بەرى قالادا 1 990 ادام ىندەت جۇقتىرعان. سوڭعى كەزدە جاعداي ءبىرشاما تۇراقتالعانىمەن, قاراشا ايىنان باستاپ ىندەت جۇقتىرۋ دەرەگى قايتا ورشىگەن. كوروناۆيرۋس سالدارىنان سوڭعى ەكى اپتانىڭ وزىندە تاراز قالاسىندا 11 ادام قايتىس بولعان. سوندىقتان دا جاعداي كۇردەلى بولىپ تۇر.
ەندى جەرگىلىكتى تۇرعىنداردىڭ كوكەيىندە وبلىستاعى كارانتين تالاپتارى قايتادان كۇشەيتىلە مە دەگەن ساۋالدىڭ بار ەكەنى انىق. ەكى ادامنىڭ باسى قوسىلعان جەردە دە وسى ماسەلە تالقىعا تۇسەدى. دەگەنمەن, ءبىر اپتانىڭ ىشىندە وڭىردە ەپيدەميالىق جاعداي تۇراقتالماسا, شەكتەۋ شارالارى قايتادان كۇشەيتىلەتىن بولادى.
جامبىل وبلىسى
