اقتوبە قالاسى, ايتەكە بي, شالقار, مارتوك, تەمىر, ويىل, قوبدا اۋداندارىنداعى ورمان شارۋاشىلىعى مەكەمەلەرىنە جەرگىلىكتى بيۋدجەتتەن بولىنگەن 212 ميلليون تەڭگەگە 6 تراكتور, جەردى تەرەڭدەتىپ جىرتاتىن ارناۋلى تەحنيكا, كوشەت وتىرعىزۋعا ارنالعان 14 سوقا ساتىپ الىندى.
ءوڭىر باسشىسى وڭداسىن ورازالين ورمان شارۋاشىلىعى مەكەمەلەرىنە تەحنيكا كىلتتەرىن تابىستاۋ كەزىندە ەلدى مەكەندەردىڭ ىرگەسىن قۇم باسۋدى توقتاتۋ جۇمىستارىن جانداندىرۋ قاجەتتىگىن ايتتى. ويتكەنى, سوڭعى جىلدارى تابيعات جاناشىرلارى بايعانين, شالقار, ىرعىز, ايتەكە بي, تەمىر اۋداندارىنىڭ كوپتەگەن ەلدى مەكەندەرىن قۇم باسىپ بارا جاتقانى جونىندە دابىل قاعىپ, ونى توقتاتۋ ءۇشىن ءشول جانە شولەيت ايماقتاردا توبىلعى مەن جىڭعىل كوشەتتەرىن كوپتەپ وتىرعىزۋ قاجەتتىگىن ەسكەرتىپ ءجۇر. جاس وسكىندەر جەرسىنىپ كەتكەنشە جاقسىلاپ كۇتىپ-باپتالعاندا عانا ەلدى مەكەندەردىڭ جاپپاي قۇم باسۋىن ەداۋىر تەجەۋگە بولادى, دەيدى ولار.
جاسىل بەلدەۋ ايماعىن قۇرۋ جوباسى بويىنشا كەلەسى جىلدان باستاپ وبلىس اۋماعىنداعى ورمان شارۋاشىلىعى مەكەمەلەرىنىڭ يەلىگىندەگى قاراۋسىز قالعان توعايلار قايتا جاڭارتىلىپ, 2690 گا القاپقا جاسىل جەلەك وتىرعىزىلادى. مۇنىمەن ءبىر كەزدە ەلدى مەكەندەردە 1 ملن ء تۇپ اعاش كوشەتتەرى ەگىلەدى. جاپپاي كوگالداندىرۋ جۇمىستارىن قول كۇشىمەن اتقارۋ قيىن بولعاندىقتان, 2021 جىلى جەرگىلىكتى بيۋدجەت ەسەبىنەن قوسىمشا 1,4 توننالىق 21 تراكتور, 4 سورعىلاۋشى, 9 اعاش وتىرعىزاتىن ارناۋلى تەحنيكا ساتىپ الۋ جوسپارلانعان.
قازىرگى ۋاقىتتا اقتوبە وبلىسىندا ورمان شارۋاشىلىعى قورىنىڭ جالپى اۋدانى 215 814 گەكتاردى قۇراعانىمەن, ونىڭ 50 362 گەكتارىندا عانا توعاي وسكەن. وسىدان كورىنىپ تۇرعانداي, وڭىردەگى ورمان قورىنىڭ ءتورت ەسە ازايىپ كەتۋىنە ورمان شارۋاشىلىعى مەكەمەلەرىنىڭ اتى بار دا, زاتى جوق قۇرىلىمعا اينالىپ, اعاشتاردى قورۋ, ەكپەلەردى كۇتىپ-باپتاۋ جۇمىستارىنىڭ قاداعالانباۋى سەبەپ بولدى. ونىڭ ۇستىنە, اقتوبە قالاسى مەن اۋداندارىندا اعاشتار اياۋسىز كەسىلىپ, ەگىلگەن جاس كوشەتتەر قۋراپ جاتسا دا, وسى كەزگە دەيىن ەشبىر قۇزىرلى مەكەمە جاۋاپ بەرگەن ەمەس.
وبلىستىڭ تابيعات قورعاۋ مەكەمەلەرى ەكولوگيا مينيسترلىگىمەن بىرلەسە وتىرىپ, اقتوبە وبلىسى اۋماعىندا 2021-2025 جىلدارى 30,7 مىڭ گا القاپقا 60,1 ميلليون ءتۇپ جاس كوشەت وتىرعىزۋدى جوسپارعا ەنگىزدى.
كەزەڭ-كەزەڭ بويىنشا ىسكە اسىرىلاتىن جاسىل بەلدەۋ جوباسىنا سايكەس, 2021 جىلى – 1086 گا, 2022 جىلى –7333,1 گا, 2023 جىلى –7142,2 گا, 2024 جىلى – 6558,6 گا, 2025 جىلى –8624,3 گەكتار جەرگە قۇرعاق كليماتقا ءتوزىمدى اعاش پەن بۇتا تۇرلەرى وتىرعىزىلىپ, جاسىل جەلەك كاسىبي ورمانشىلاردىڭ قولىمەن كۇتىپ-باپتالاتىن بولادى.
