ديسنەيلىك ءفيلمنىڭ الدىن الا كورسەتىلىمىندە سويلەگەن سوزىندە باۋىرجان بايبەك قازاقستان رەسپۋبليكاسىنىڭ تۇڭعىش پرەزيدەنتى نۇرسۇلتان نازارباەۆتىڭ ەل تاۋەلسىزدىگىن جاريالاعان ساتتەن باستاپ مەملەكەتتىك ءتىلدىڭ قولدانۋ اياسىن كەڭەيتۋ, بىلىكتى دە ءبىلىمدى جاستاردىڭ قاتارىن ارتتىرۋ, قازاق تىلىندەگى ساپالى اقپاراتتىق ونىمدەردى كوبەيتۋ سەكىلدى ماڭىزدى ماسەلەلەرگە ەرەكشە نازار اۋدارىپ, باسىمدىق بەرگەنىنە توقتالدى.
«وسى ماقساتتا ەل ەكونوميكاسى نىعايا قويماعان كەزدىڭ وزىندە 1993 جىلى «بولاشاق» باعدارلاماسىن قۇرىپ, تالاپتى دا دارىندى جاستاردىڭ الەمدەگى ۇزدىك وقۋ وردالارىندا ءبىلىم الۋىنا جول اشتى. قازاق مەكتەپتەرى مەن بالاباقشالارىنىڭ سانىن ارتتىردى. وسى باعىتتاعى جۇيەلى جۇمىستاردىڭ ناتيجەسىندە مەملەكەتتىك ءتىلدىڭ قولدانىلۋ اياسى كەڭەيىپ, مازمۇندىق بازاسى نىعايىپ كەلەدى. قازىرگى تاڭدا پرەزيدەنتتىك «بولاشاق» باعدارلاماسى بويىنشا ءبىلىم العان 14 مىڭعا جۋىق ازامات ەلىمىزدىڭ يگىلىگى جولىندا جەمىستى قىزمەت ەتىپ جاتىر. اتالعان باعدارلاما تۇلەكتەرى قۇرعان «بولاشاق» كورپوراتيۆتىك قورى ەلىمىزدىڭ زياتكەرلىك الەۋەتىن كوتەرۋدى ماقسات ەتكەن ءتۇرلى جوبالاردى ىسكە اسىرۋدا. سولاردىڭ ءبىرى – قازاق تىلىندەگى ساپالى كونتەنتتى كوبەيتۋگە باعىتتالعان «وزىڭەن باستا» جوباسى», - دەدى باۋىرجان بايبەك.
ايتا كەتەيىك, «بولاشاق» كورپوراتيۆتىك قورى بۇل جوبانى 2011 جىلى قولعا الىپ, Disney كينوستۋدياسىمەن ىنتىماقتاستىعىن باستاعان بولاتىن. وسى جىلدار ىشىندە قوردىڭ قولداۋىمەن شەتەلدىك 34 ۇزدىك فيلمگە دۋبلياج جاسالىپ, سونىڭ ارقاسىندا قازاق ءتىلى Disney ستۋدياسىنىڭ 39-شى ءتىلى جانە Sony Pictures ستۋدياسىنىڭ 7-ءشى ءتىلى بولدى.
«قوردىڭ بۇل جوباسىنا ەلباسى ارنايى نازار اۋدارىپ, قولداۋ ءبىلدىردى. بۇگىن وسى جوبا اياسىندا قازاق تىلىندە دۋبلياجدالعان Disney ستۋدياسىنىڭ «مۋلان» ءفيلمى كورەرمەنگە ۇسىنىلىپ وتىر. بۇل – اتالعان قوردىڭ قازاق تىلىنە دۋبلياجداپ, كينوپروكاتقا شىعارعان 35-ءشى ءفيلمى. ياعني «بولاشاقتىقتار» قازاق تىلىندەگى ساپالى كونتەنتتى كوبەيتۋدە مول تاجىريبە جيناپ, ۇلكەن بەلەستى باعىندىرىپ وتىر», - دەگەن باۋىرجان بايبەك وسى ىسكە اتسالىسقان ازاماتتارعا العىسىن ءبىلدىردى.
سونداي-اق, ول ءسوزىنىڭ سوڭىندا وسى جوبا ارقىلى وتاندىق كينو سالاسى جاڭا فيلمدەرمەن تولىعىپ قانا قويماي, سونىمەن بىرگە قازاق تىلىندە دۋبلياجداۋ ءىسى دە ورىستەگەنىن اتاپ ءوتتى. ونىڭ ايتۋىنشا, بۇل باعىتتاعى جۇمىستار ارى قاراي دا ءوز جالعاسىن تابادى.
