قالا اكىمدىگى ۇسىنعان اقپارات بويىنشا, نىسان قۇرىلىسىنا جالپى كولەمى 1,5 ملرد تەڭگە ينۆەستيتسيا سالىنسا, سونىڭ 700 ميلليونى «بيزنەستىڭ جول كارتاسى» ارقىلى بولىنگەن. ناتيجەسىندە 435 جۇمىس ورنى قۇرىلىپتى. ساۋدا ورتالىعىندا وتاندىق جانە شەتەلدىك وندىرۋشىلەردىڭ نان-توقاش ونىمدەرى, باكالەيا ونىمدەرى, جەمىستەر, كوكونىستەر, ەت, بالىق جانە وزگە دە تاۋارلاردىڭ كەڭ اسسورتيمەنتى ۇسىنىلماق.
– مۇندا جەرگىلىكتى ءوندىرىس تاۋارلارىن: فەرمەرلىك جانە اۋىل شارۋاشىلىعى, كوكونىستەر, جەمىستەر جانە باسقا دا ونىمدەردى ساتۋمەن اينالىسامىز. سونىمەن قاتار ەۋروپادا وندىرىلگەن تاۋارلار دا ءبىزدىڭ سورەمىزدەن تابىلادى. ارنايى زەرتحانا تاۋارلاردى گمو-عا تەكسەرۋمەن اينالىسادى جانە سەرتيفيكاتتارعا قارايدى, – دەيدى «كەرۋەن» ساۋدا-وندىرىستىك ورتالىعىنىڭ باسشىسى ەرلان سۇلتانوۆ.
ورتالىقتىڭ باسقارۋشى ديرەكتورى بەرىك ابىلقانوۆتىڭ ايتۋىنشا, ورتالىقتا جالعا الۋشىلاردىڭ كوپشىلىگى ءوز ونىمدەرىن قولايلى باعامەن ۇسىنا الادى.
– بۇگىنگى تاڭدا بىزدە بارلىق جالعا بەرۋ ورىندارى بوس ەمەس. وسى اپتادا ساۋدا-وندىرىستىك ورتالىعىمىزدى تولىعىمەن ىسكە قوسۋدى جوسپارلاپ وتىرمىز. مۇندا ىڭعايلى ساۋدا ءۇشىن بارلىق جاعداي جاسالعان. سونداي-اق سورەلەرىمىزگە تىكەلەي تاۋار وندىرۋشىلەردىڭ ونىمدەرى قويىلادى. تۇرعىندار ءۇشىن بۇل باعا مەن ساپا جاعىنان دا ءتيىمدى, – دەدى ول.
قالا اكىمدىگىنىڭ حابارلاۋىنشا, قالادا پاندەمياعا قاراماستان بيزنەستى قولداۋ شارالارى بەلسەندى تۇردە كورسەتىلۋدە. 1 جەلتوقسانداعى جاعداي بويىنشا بارلىعى 77,6 مىڭ جاڭا جۇمىس ورنى, ونىڭ ىشىندە 36,9 مىڭ تۇراقتى جۇمىس ورنى قۇرىلعان. كاسىپكەرلىك سۋبەكتىلەرىمەن 29,8 مىڭ جۇمىس ورنى اشىلسا, مەملەكەتتىك باعدارلامالار اياسىندا 47,8 مىڭ جۇمىس ورنى قۇرىلدى.
جالپى اۋماعى 7264 شارشى مەتر بولاتىن نىساندا 234 ساۋدا ورنى ورنالاسقان. ورتالىق جەتىسۋ-4 ىقشام اۋدانىندا, 32 ءۇي مەكەن-جايىندا تۇر.
الماتى
