قازاقستان فۋتبول فەدەراتسياسى 1994 جىلى فيفا قۇرامىنا ەنگەلى بەرى بۇگىنگە دەيىن التى رەت الەم چەمپيوناتىنىڭ ىرىكتەۋ كەزەڭىندە باق سىناعان. ونىڭ ەكەۋىنە ازيا فۋتبول كونفەدەراتسياسىندا (افك) جۇرگەنىندە قاتىسسا, قالعان تورتەۋىندە ۋەفا اياسىندا ونەر كوسەتىپ كەلەدى. جاھاندىق دودانىڭ ىرىكتەۋىنە التى رەت قاتىسساق تا, وكىنىشكە قاراي, بارلىعىندا ءساتسىز وينادىق. ەڭ ءبىر اۋىز تولتىرىپ ايتارلىقتاي ناتيجەمىز دەپ 2002 جىلعى وڭتۇستىك كورەيا مەن جاپونيادا وتكەن بىرىنشىلىكتىڭ ىرىكتەۋىن ايتا الامىز. ازيا قۇرلىعىنداعى ىرىكتەۋدىڭ ەكىنشى اينالىمىندا يراك قۇراماسىمەن بىردەي ۇپاي جيناپ, جەكە كورسەتكىش بويىنشا قارسىلاستارىمىزعا جول بەرىپ, كەلەسى اينالىمنان قۇر قالعان بولاتىنبىز.
ەندى, مىنە جەتىنشى ىرىكتەۋ كەزەڭىنە دە اياق باستىق. بالكىم, كيەلى ساننىڭ كەزەگىندە فۋتبولشىلارىمىز جاھاندىق دودانىڭ نەگىزگى كەزەڭىنە جولداما الماسا دا, الەم فۋتبولىن ءدۇر سىلكىندىرىپ قالار دەپ سەنەمىز. بيىلعى ىرىكتەۋدە D توبىنا تۇسكەن جەرلەستەرىمىز فرانتسيا, ۋكراينا, بوسنيا جانە گەرتسەگوۆينا, فينليانديا قۇرامالارىمەن الەم چەمپيوناتىنىڭ جولداماسىن ساراپقا سالادى. ءبىزدىڭ توپتاعى فينليانديادان باسقا قۇرامالاردىڭ بارلىعى الەم چەمپيوناتىنىڭ فينالدىق كەزەڭىنە شىعىپ, فۋتبول تويىنىڭ كۋاگەرىنە اينالعان. ماسەلەن, فرانتسيا قۇراماسىنىڭ 2018 جىلى رەسەيدە وتكەن الەمدىك بىرىنشىلىكتە جەڭىمپاز اتانعانىن فۋتبول جانكۇيەرلەرى جاقسى بىلەدى. سونداي-اق ۋكراينا مۇنداي ءىرى جارىسقا ەڭ العاش 2006 جىلى قاتىسسا دا, سول جىلى قاناتىن كەڭگە جايىپ شيرەك فينالعا دەيىن جەتكەن. بوسنيا جانە گەرتسەگوۆينا – برازيلياداعى دوداعا قاتىسۋشى.
ال جوعارىداعى ءتورت قۇرامانىڭ تەك ەكەۋى عانا قازاقستاندىق فۋتبول جانكۇيەرلەرىنە جاقسى تانىس. سەبەبى الەم چەمپيوناتىنىڭ ءار جىلدارداعى ىرىكتەۋ كەزەڭدەرىندە وتانداستارىمىز ۋكراينا جانە فينليانديا قۇرامالارىمەن جاسىل الاڭدا كەزدەسكەن. ال فرانتسيا جانە بوسنيا جانە گەرتسەگوۆينامەن العاش رەت ويناعالى تۇرمىز.
فرانتسيا. ەڭ كەيىنگى الەم چەمپيوندارىن تانىستىرىپ جاتۋدىڭ ءوزى ارتىق بولار. قۇرامى كيلليان مباپپە, پول پوگبا, انتۋان گريزمانن, رافاەل ۆاران سەكىلدى كىل مىقتى فۋتبولشىلارمەن جاساقتالعان ء«ۇش جولاقتى» ەل ازىرگە الەم فۋتبولىندا قارسىلاس شىداتار ەمەس. رەسمي ماتچتاردا ەڭ سوڭعى رەت 2020 جىلعى ەۋروپا چەمپيوناتىنىڭ ىرىكتەۋ كەزەڭىندە تۇركيا فۋتبولشىلارىنان جەڭىلگەن. 2019 جىلدىڭ ماۋسىم ايىندا وتكەن كەزدەسۋدە تۇرىك اعايىندارىمىز 2:0 ەسەبىمەن باسىم تۇسكەن-ءدى. فرانتسيامەن وتەتىن ەكى ويىندا دا جەرلەستەرىمىز ۇپاي الا المايتىنى بەلگىلى. تەك قازاقستان قىزدار قۇراماسى سياقتى ءبىر ويىندا 12 گول وتكىزىپ الىپ, الەم الدىندا تاعى دا ماسقارا بولماساق يگى ەدى.
ۋكراينا. ايگىلى شابۋىلشى اندرەي شەۆچەنكو جاتتىقتىراتىن ۋكراينا قۇراماسى فرانتسيادان كەيىنگى باستى قارسىلاسىمىز سانالادى. ءبىزدىڭ جىگىتتەر ۋكراينا فۋتبولشىلارىمەن بۇگىنگە دەيىن جاسىل الاڭدا ءتورت رەت جولىقتى. بارلىعى دا الەم بىرىنشىلىگىنىڭ ىرىكتەۋ ويىندارى. ەكى رەت 2006 جىلعى, ەكى رەت 2010 جىلعى الەم چەمپيوناتىنىڭ ىرىكتەۋ كەزەڭىندەگى توپتىق كەزەڭنىڭ باسەكەلەرى. ەكى قۇرامانىڭ ەڭ العاشقى «تانىستىعى» 2004 جىلى باستالدى. 8 قىركۇيەكتە الماتىداعى ورتالىق ستاديوندا وتكەن ويىننىڭ ءبىرىنشى تايمىندا جەرلەستەرىمىز 1:1 ناتيجەسىمەن تەڭ تۇسكەنىمەن, ەكىنشى تايمدا تاعى ءبىر گول وتكىزىپ الىپ 1:2 ەسەبىمەن جول بەردى. كەلەسى جىلدىڭ ماۋسىم ايىندا جەرلەستەرىمىز ۋكرايناعا ساپار شەگىپ, كيەۆتەگى وليمپيادالىق ستاديوندا الاڭ يەلەرى ءبىزدىڭ قاقپاعا جاۋاپسىز ەكى گول سوعىپ, كەزەكتى جەڭىسىنە قول جەتكىزدى. اراعا ءۇش جىل سالىپ قوس قۇرامانىڭ جولى الەم چەمپيوناتىنىڭ توپتىق كەزەڭدە تاعى دا ءتۇيىستى. وكىنىشكە قاراي, بۇل ىرىكتەۋدىڭ دە ەكى كەزدەسۋىندە ۋكراينالىقتاردىڭ مەرەيى ۇستەم بولدى. العاش الماتىداعى ماتچتا 3:1 ەسەبىمەن, ۋكراينادا 2:1 ناتيجەسىمەن جەڭىلدىك.
الەكساندر زينچەنكو («مانچەستەر سيتي», انگليا), اندرەي يارمولەنكو («ۆەست حەم», انگليا), رۋسلان مالينوۆسكي («اتالانتا», يتاليا) سەكىلدى شوق جۇلدىزدارى بار ۋكراينا قۇراماسى قازىرگى تاڭدا فيفا رەيتينگىندە 24-ورىندا كەلەدى.
فينليانديا. بۇل ەلدىڭ ۇلتتىق قۇراماسى دا, ەۋروكۋبوكتا باق سىنايتىن كوماندالارى دا قازاقستاندىق جانكۇيەرلەرگە جاقسى تانىس. ازىرگە ەكى ەلدىڭ فۋتبولشىلارى تاريحتا ءۇش رەت كەزدەسكەن. ەڭ العاش قازاقستان مەن فينليانديا 2006 جىلى اقپاندا كيپردە وتكەن حالىقارالىق تۋرنيردە جولىعىپ, نەگىزگى ۋاقىتتا جەڭىمپاز انىقتالماعان. ال ويىننان كەيىنگى پەنالتي سەرياسىندا قارسىلاستارىمىزدىڭ جولى بولدى. ەسەپ – 3:1. كەيىننەن ەكى قۇراما 2008 جىلى اۋستريا مەن شۆەيتساريادا وتكەن ەۋروپا چەمپيوناتىنىڭ ىرىكتەۋ كەزەڭى اياسىندا ءبىر توپقا ءتۇستى. 2006 جىلدىڭ قازان ايىندا الماتىدا وتكەن ويىندا قوناقتار 2:0 ەسەبىمەن جەڭىسكە جەتتى. 2007 جىلى سىرت الاڭداعى كەزدەسۋدە دە جەرلەستەرىمىز قارسىلاستارىنا جول بەردى. بۇل جولعى ماتچ 2:1 ەسەبىمەن الاڭ يەلەرىنىڭ پايداسىنا شەشىلدى. قازىرگى تاڭدا فينليانديا فيفا رەيتينگىندە 54-ورىندا تۇر.
توپتاعى سوڭعى قارسىلاسىمىز – بوسنيا جانە گەرتسەگوۆينا. ازىرگە ەكى ەلدىڭ ۇلتتىق قۇرامالارى جاسىل الاڭدا كەزدەسپەسە دە, بالقان تۇبەگىندەگى ەلدەردىڭ ويىنى بىزگە جاقسى تانىس. ارينە, قازىر بوسنيا جانە گەرتسەگوۆينانىڭ كورسەتىپ جۇرگەن ويىنى اسا ءماز ەمەس. كەيىنگى جەتى ويىننان بەرى جەڭىس نە ەكەنىن بىلمەي كەلەدى. تەك وتكەن جىلدىڭ قاراشا ايىندا عانا ۇلتتار ليگاسى اياسىندا سىرت الاڭدا ليحتەنشتەين قۇراماسىن 3:0 ەسەبىمەن جەڭگەن.
قازاقستان ۇلتتىق قۇراماسىنىڭ ماتچتارىنىڭ كۇنتىزبەسى
28.03.2021 قازاقستان – فرانتسيا
01.04.2021 ۋكراينا – قازاقستان
01.09.2021 قازاقستان – ۋكراينا
04.09.2021 فينليانديا – قازاقستان
08.09.2021 بوسنيا جانە گەرتسەگوۆينا – قازاقستان
09.10.2021 قازاقستان – بوسنيا جانە گەرتسەگوۆينا
12.10.2021 قازاقستان – فينليانديا
14.11.2021 فرانتسيا – قازاقستان
قارسىلاستار نە دەيدى؟
جەرەبە تارتۋ راسىمىنەن كەيىن ءبىزدىڭ توپتاعى ۇلتتىق قۇرامالاردىڭ باس باپكەرى مەن اتاقتى فۋتبولشىلارى قارسىلاستاردىڭ قارىمى تۋرالى ءوز ويلارىن ورتاعا سالدى.
ديدە دەشام,
فرانتسيا ۇلتتىق قۇراماسىنىڭ باس باپكەرى:
– ءبىز بۇگىنگە دەيىن قازاقستان قۇراماسىمەن بىردە-ءبىر ويىن وتكىزگەن جوقپىز. قازاقستان مەن بوسنيا جانە گەرتسەگوۆيناعا قاراعاندا ۋكراينا مەن فينليانديا فۋتبولشىلارى بىزگە ءبىراز قيىندىق تۋدىرادى. ونى جەرەبەدە ورنالاسقان سەبەتىنە جانە كەيىنگى ويىندارىنا قاراپ ايتىپ وتىرمىن. وتكەن ويىندا فينليانديا بىزگە قارسى وتە جاقسى وينادى. بىراق بۇل ۇجىمدى ابدەن زەرتتەپ ۇلگەردىم.
اندرەي شەۆچەنكو,
ۋكراينا ۇلتتىق قۇراماسىنىڭ باس باپكەرى:
– بىردەن ايتايىن, ءبىز وتە قيىن قارسىلاستارعا تاپ بولدىق. الەم چەمپيونىمەن وتەتىن ەكى ويىندا ۇپاي الۋعا تىرىسامىز. بوسنيا جانە گەرتسەگوۆينا كومانداسىن ءتورتىنشى سەبەتتەگى ەڭ مىقتى ۇجىم دەپ اتاۋعا بولادى. فينليانديا دا بىزگە بەيتانىس قۇراما ەمەس. 2018 جىلعى الەم چەمپيوناتىنىڭ ىرىكتەۋ كەزەڭىندە دە ءبىر توپتا وينادىق. قازىر بۇل كوماندا العا جىلجىپ كەلەدى. كەلەر جىلعى ەۋروپا چەمپيوناتىنا قاتىسۋعا مۇمكىندىك العانىنىڭ ءوزى ىلگەرىلەۋىنىڭ دالەلى. قازاقستاندى ەستەن دە, ەسەپتەن دە شىعارۋعا بولمايدى.
مارككۋ كانەرۆا,
فينليانديا قۇراماسىنىڭ باس باپكەرى:
– جەرەبە ءبىز ءۇشىن ءساتتى ءتۇستى دەپ ايتا المايمىن. ءار ءتۇرلى شەكتەۋلەرگە بايلانىستى قارسىلاستار ۇنەمى توپتان توپقا اۋىسىپ وتىردى. كەلەسى جىل ءبىز ءۇشىن وڭايعا سوقپايىن دەپ تۇر. ناۋرىز ايىندا الەم بىرىنشىلىگىنىڭ ىرىكتەۋىن باستاساق, جاز مەزگىلىندە ەۋروپا چەمپيوناتىندا باق سىنايمىز. توپتاعى بارلىق قارسىلاس مىقتى, وسالى جوق. ءتىپتى قازاقستان قۇراماسى دا بىزگە وڭايلىقپەن ۇپاي بەرمەيتىنى انىق. دەگەنمەن ءبىز الەم چەمپيوناتىنا قاتىسقىمىز كەلەدى. سول ماقساتتا الاڭعا شىعىپ, ارمانىمىزعا قول جەتكىزەمىز دەپ ويلايمىن.
ەدين دجەكو,
بوسنيا جانە گەرتسەگوۆينا قۇراماسىنىڭ كاپيتانى:
– وكىنىشكە قاراي, وتە قيىن توپقا تۇستىك. فرانتسيا – توپتا ءبىرىنشى ورىنعا ۇمىتكەر جالعىز قۇراما. كەيىنگى جىلدارى جاقسى ويىن ورنەگىن كورسەتىپ كەلە جاتقان ۋكراينا مەن فينليانديا قۇرامالارى دا بىزگە لايىقتى قارسىلىق كورسەتەدى. قازاقستان قۇراماسى دا وسى توپتاعى ەڭ قيىن قارسىلاستىڭ ءبىرى.
