باسپانا باستى نازاردا
وبلىس ورتالىعىندا ورىن تەپكەن حالىقتىڭ باستى ماسەلەسى باسپانا ەدى. بۇگىندە ءارتۇرلى مەملەكەتتىك باعدارلامالاردىڭ اياسىندا تۇرعىن ۇيگە قول جەتكىزۋ ەداۋىر جەڭىلدەدى. بيىل كەزەكتە تۇرعان كوپ بالالى وتباسىلاردىڭ 320-سى باسپانامەن قامتىلدى. ەسەپتەپ قاراساق, سوڭعى ون جىلدا حالىققا جالپى سانى 834 جالدامالى پاتەر بەرىلسە, بيىل 627 پاتەر تۇرعىندار يگىلىگىنە تابىستالعان.
2020 جىلى كوپتەگەن تۇرعىن ءۇي سالىنعانىمەن, جوبالاردىڭ ءبىر بولىگى كەلەسى جىلعا كوشتى. بيىل «نۇرلى جول» شاعىن اۋدانىنداعى ساياباقتىڭ جانىندا 8 كوپ قاباتتى تۇرعىن ءۇي پايدالانۋعا بەرىلىپ, قالانىڭ تۇرعىن ءۇي قورىنا 1 مىڭنان استام جاڭا پاتەر قوسىلادى.
البەتتە, قالا حالقى وسكەن سايىن كوشەلەردەگى كولىك اعىمى دا ارتادى. بۇل رەتتە وسكەمەندەگى بىرقاتار كوشە كەڭەيتىلىپ, جوندەۋدەن ءوتتى. اتاپ ايتساق, ق.ساتباەۆ داڭعىلى ارقىلى سامار تاس جولىنا شىعاتىن ءتورت جانە التى باعىتتىق جول سالىندى. جيەكتەرى ويۋ-ورنەكتى تەمىر شارباقپەن قورشالىپ, بويىنا 200 تۇپتەن استام شىرشا وتىرعىزىلدى. جاياۋ جۇرگىنشىلەرگە ارنالعان جولاعى دا بار. سونىمەن قاتار ءى.ەسەنبەرلين داڭعىلىنان جىبەك جولى كوشەسىنە دەيىنگى بولىگى جۋىقتا قولدانىسقا بەرىلدى. بۇل جول كولىك كەپتەلىسىن ەداۋىر ازايتارى ءسوزسىز. كەلەسى جىلى ءاسفالتى تۇسكەن جولدىڭ جيەكتەرىن اباتتاندىرۋ, جارىقتاندىرۋ سياقتى جۇمىستار قالا باسشىلىعىنىڭ جوسپارىندا تۇر.
– جىل سوڭىندا قولعا الىنعان جاڭا جوبا اياسىندا قالا كوشەلەرىن جارىقتاندىرۋ جۇمىستارى باستالعان. بۇل وبلىس ورتالىعىنىڭ 400 كوشەسىن قامتيدى. ءبارى ويداعىداي بولسا, كەلەسى جىلدىڭ سوڭىنا دەيىن 14 مىڭ جارىق نۇكتەسى اۋىستىرىلادى. ەسكى شامداردىڭ ورنىنا كۇننىڭ ۋاقىتىنا بايلانىستى وزدىكتەرىنەن رەتتەلەتىن زاماناۋي ۇنەمدى جارىق ديودتارى ورناتىلادى, – دەدى قالا باسشىسى جاقسىلىق ومار.
سونداي-اق تۇرعىنداردىڭ وتىنىشتەرىمەن 10 شاقىرىم جاياۋ جۇرگىنشىلەردىڭ جولدارى توسەلدى. قوسىمشا تاعى 12 شاقىرىم تروتۋار جوندەلدى. ال قالا كوشەلەرىنىڭ 50 شاقىرىمنان استامىنا جوندەۋ, جاڭعىرتۋ جۇمىستارى جۇرگىزىلدى. رابوچي, پرومىشەلەننىي كوشەلەرى مەن وسكەمەن – سەمەي اۆتوجولىنداعى جوندەۋلەر اياقتالدى. وسى ۋاقىتقا دەيىن ءبىر باعىتتىق قانا بولعان شاكارىم داڭعىلىنا قاراما-قارسى باعىت قوسىلىپ, كەڭەيتىلدى. بۇدان باسقا دا كوشەلەر, ترامۆاي رەلستەرى جوندەۋدەن ءوتتى.
اۋلالار اباتتاندىرىلدى
جاڭارعان, جاڭعىرعان نىساندار از ەمەس. اباتتاندىرىلعان 55 اۋلانىڭ باسىم بولىگى بالالارعا ارنالعان ويىن الاڭى بولسا, بەسەۋى سپورتتىق نىسان. 19 شاعىن اۋدانعا دا كوپ كوڭىل ءبولىنىپ كەلەدى. اتالعان شاعىن اۋداننىڭ 10 اۋلاسىنا اباتتاندىرۋ جۇمىستارى جۇرگىزىلىپ, 3 فۋتبول الاڭى سالىندى. از ۋاقىت ىشىندە جاياۋ جۇرگىنشىلەرگە ارنالعان اللەيا ءتۇستى. اسىر سالعان بالالار ءۇشىن ويىن الاڭى بوي كوتەردى. اسىرەسە جازدىڭ كۇنى كەشكى سالقىنمەن سەرۋەندەۋگە تاپتىرماس ورىن. ايتپاقشى, اللەيانىڭ باس جاعىنا «التايدىڭ بوكتەرىندەگى وسكەمەن» دەگەن وي سالاتىن ۇلكەن كومپوزيتسيالىق لوگوتيپ ورناتىلدى. قالا اتاۋى بىرىڭعاي Óskemen دەپ لاتىنشا جازىلدى. ءدال وسىنداي كومپوزيتسيا قالانىڭ كىرەبەرىسىنەن دە كورىنىس تاۋىپ, ۇلتتىق رۋحتى سەزىندىرگەندەي بولدى.
ساياباقتار ن.نازارباەۆ داڭعىلى بويىنان دا اشىلدى. كوممۋنالدىق قىزمەتكەرلەر قالانىڭ باستى كوشەسىندە ءۇش باعىتتا جۇمىس ىستەدى. بىرىنشىدەن, داڭعىل بويىندا ءۇش سكۆەر ۇيىمداستىرىلدى. ەكىنشىدەن, كۆارتالداعى ەسكى عيماراتتاردىڭ قاسبەتتەرى مەن جەكە سەكتوردىڭ قورشاۋلارى بىرىڭعاي ساۋلەتتىك ستيلگە كەلتىرىلدى. ۇشىنشىدەن, ستاحانوۆسكي كوشەسىنەن مەتاللۋرگتەردىڭ قيىلىسىنا دەيىنگى 550 مەترلىك ۋچاسكەدە جاياۋ جۇرگىنشىلەر اللەياسى پايدا بولدى.
ءبىلىمدى جاستارعا جايلى جاعداي
بولاشاق بىرلىكتە, بىلىمدە دەيمىز. ال ارتىق ءبىلىم كىتاپتا ەمەس پە؟! وسى رەتتە ايتا كەتەيىك, قالا كىتاپحانالارى دا نازاردان تىس قالعان جوق. «جۇمىسپەن قامتۋدىڭ جول كارتاسى-2020» باعدارلاماسى اياسىندا و.بوكەي اتىنداعى كىتاپحاناعا, ورتالىق بالالار كىتاپحاناسىنا جانە №2 فيليالعا اعىمداعى جوندەۋ جۇمىستارى جۇرگىزىلدى. باسا ايتا كەتەرلىگى, و.بوكەي اتىنداعى كىتاپحانادا ءجاسوسپىرىم وقىرماندار ءۇشىن تۇڭعىش رەت VR-كيىز ءۇي اشىلدى. سونىمەن قاتار لينگۆيستيكالىق ورتالىعىندا تەگىن ءتىل ۇيرەنۋگە بولادى.
بيىلعى وقۋ جىلى قاشىقتان باستالسا دا, قىركۇيەككە دەيىن قالاداعى 37 مەكتەپ, 24 بالاباقشا جانە 2 مەكتەپكە دەيىنگى ءبىلىم بەرۋ مەكەمەسى جوندەلدى. «زەرەك» ورتالىعى جۇمىسىن كۇردەلى جوندەۋدەن وتكەن عيماراتتا باستادى. بۇل بالالارعا اۋە, سۋ, قۇرىلىس تەحنيكالارىنىڭ مودەلدەرىن جاساۋدى ۇيرەتەتىن جالعىز تەحنيكالىق شىعارماشىلىق ورتالىق.
سالاماتتى ءومىر سالتىن ۇستانامىن دەسەڭىز...
جارتى الەمدى جايلاعان ىندەت دەنساۋلىقتىڭ قادىرىن ۇعىندىرعانداي بولدى. حالىق اۋىرىپ ەم ىزدەگەنشە, اۋىرماۋدىڭ جولىن ىزدەدى. ءيا, اۋىرماۋدىڭ بىردەن ءبىر جولى – سالاماتتى ءومىر سالتىن ۇستانۋ, سپورتپەن اينالىسۋ. نيەت بولسا, وبلىس ورتالىعىندا سپورتپەن اينالىسۋعا مۇمكىندىك مول, ورتالىقتار جەتكىلىكتى. ونىڭ ەكەۋى بيىل «جۇمىسپەن قامتۋدىڭ جول كارتاسى-2020» باعدارلاماسى اياسىندا جوندەۋدەن ءوتتى. ءبىرى ستاحانوۆسكي كوشەسىندەگى دەنە شىنىقتىرۋ-ساۋىقتىرۋ كەشەنى بولسا, ەندى ءبىرى نەگىزگى سپورتتىق شارالار وتەتىن «التاي» ستاديونى. 1959 جىلى سالىنعان ستاديوننىڭ كىرەبەرىس قاقپاسىنان باستاپ عيماراتىنا دەيىن تولىقتاي جاڭارتىلدى. ستاحانوۆسكي كوشەسىندەگى دەنە شىنىقتىرۋ-ساۋىقتىرۋ كەشەنى دە كىرسە-شىققىسىز.
مەملەكەتتىك قىزمەتتىڭ 17 ءتۇرى كورسەتىلەدى
«جۇمىسپەن قامتۋدىڭ جول كارتاسى-2020» باعدارلاماسى اياسىندا جوندەۋدەن وتكەن بۇرىنعى «بسمپ» عيماراتىنا جۇمىسپەن قامتۋ جانە الەۋمەتتىك باعدارلامالار ءبولىمى ورنالاستى. مۇندا كوپ بالالى, تولىق ەمەس وتباسىلارعا, از قامتىلعاندارعا, اتا-اناسىنىڭ قامقورلىعىنسىز قالعاندارعا, مۇگەدەكتەرگە كەشەندى كەڭەس بەرىلەدى. اتالعان بولىمدە مەملەكەتتىك قىزمەتتىڭ 17 ءتۇرى كورسەتىلەدى.
تۇرعىنداردىڭ الەۋمەتتىك ءال-اۋقاتىن ارتتىرۋ ءۇشىن از شارۋا اتقارىلىپ جاتقان جوق. ءتۇيىندى پروبلەمالار دا وڭ شەشىمىن تاۋىپ كەلەدى. ماسەلەن, سەۆەرنوە كەنتىندە 2,9 شاقىرىم سۋ قۇبىرى تارتىلىپ, 350-دەن استام ادام اۋىز سۋعا قول جەتكىزدى. مەنوۆنىي جانە احمەر شاعىن اۋداندارىندا سۋمەن جابدىقتاۋ جۇيەلەرىن قايتا قۇرۋ جۇمىستارى اياقتالىپ قالدى. قازىرگى ۋاقىتتا سۋ قۇبىرىن دەزينفەكتسيالاۋ جۇرگىزىلىپ جاتىر.
وسكەمەن
