تاريحي دەرەكتەرگە سۇيەنسەك, قوجا احمەت ياساۋي كەسەنەسىندەگى كىتاپحانا بولمەسى 1950 جىلدارعا دەيىن جۇمىس ىستەگەن ەكەن. وندا ەسكى كىتاپتار مەن ءدىني ەڭبەكتەر ءيىن تىرەسىپ تۇراتىن دەيدى ەسكى كوزدەر.
ال قازىرگى تاڭدا قورىق-مۋزەيى قورىندا 3 000-عا جۋىق جازبا ەسكەرتكىش ساقتالسا, ونىڭ ىشىندە: 440 دانا كونە كىتاپ, 160 دانا تۇپنۇسقا قولجازبا, 21 دانا تاريحي قۇجات, ت.ب. بار كورىنەدى.
وسىلاردىڭ ىشىنەن, جوعارىداعى مۋزەيلەندىرىلگەن كىتاپحانا بولمەسىنە: «ديۋاني حيكمەت» ءىلىمىنىڭ تۇپنۇسقا قولجازباسى جانە 1887-1901 جىلدارى قازاندا, 1901 جىلى ىستامبۇلدا, 1902-1911 جىلدارى تاشكەنتتە جارىق كورگەن نۇسقالارىمەن قاتار, «ريساللا دار ادابي تاريقات», «پاقىرناما», «ميراتۋل قۋلۋب» سەكىلدى وتە سيرەك كەزدەسەتىن قولجازبالار, قوجا احمەت ءياساۋيدىڭ اتاقتى شاكىرتتەرى س.باقىرعانيدىڭ «ديۋان» قولجازبا ەڭبەگى, شەيح حۋدايداد تاش-مۋحاممەد ءال-ءبۋحاريدىڭ «بۋستان ۋل مۋحيببين» اتتى تۇركى تىلىندە جازىلعان ەڭبەگى, ءا.ءناۋايدىڭ «عازالدارى», ءفيزۋليدىڭ شىعارمالارى, فاريد اد-دين مۇحامماد يبن يبراحيم اتتاردىڭ «تازكيرات ۋل-اۋليا», سوفى اللاياردىڭ «مۋسليك ال-مۋتتاكين», اۋليە بيدەلدىڭ «ديۋان» قاتارلى قۇندى دۇنيەلەرى قويىلعان ەكەن. بۇل كىتاپتاردان باسقا قۇندى تاپسىرلەر, مۇحتاسار, قۇراندار, «عاياس ال-لۋعات مۋنتاحاب ال-لۋعات» اتتى ءتىل ءبىلىمى تۋرالى ەڭبەك, «ريساقاتۋن ۋافياتۋن في يسلامي ابني اعي» دەيتىن اراب ءتىلى گرامماتيكاسى, «شارحۋلۋيقاياتي, ۋمۋراتۋ رياتي» اتتى شاريعي تالداۋ جانە كەسەنەدە جەرلەنگەن تۇلعالارعا قاتىستى سەريالى باسپا ونىمدەرى دە سورەدەن ورىن الىپتى. سونداي-اق وزبەكستاندىق عۇلاما عالىم شايىق مۇحامماد سادىق مۇحاممماد يۋسۋفتىڭ جەكە كىتاپحاناسىنان مۋزەي قورىنا سىيعا بەرىلگەن 85 دانا قۇندى تۋىندىلار دا كوپشىلىك نازارىنا ۇسىنىلدى.
