ارداق وتورباەۆ قۇرىلعىعا پاتەنت الۋعا ارنالعان قۇجاتتار پاكەتىن 2020 جىلدىڭ باسىندا وتكىزگەن بولاتىن. كوماندامەن بىرگە ول بارلىق شارتتاردى ورىنداپ, قاجەتتى قۇجاتتاردىڭ بارلىعىن ۇسىنعان. ناتيجەسىندە ۇلتتىق زياتكەرلىك مەنشىك ينستيتۋتى ونەرتاپقىشقا پاتەنت بەرگەن كورىنەدى.
ەلىمىزدىڭ كليماتى كەيدە جاڭبىرلى, بىردە قار جاۋىپ, ارتىنشا ول ەرىپ, مۇگەدەكتەر ارباسىن پايدالانۋشىلارعا قولايسىزدىق تۋعىزىپ جاتادى. اربانىڭ دوڭگەلەكتەرى تەز لاستانعاندىقتان ءۇي-جايلاردا دا ىڭعايسىز جاعداي بولاتىنى بەلگىلى.
ارداق وتورباەۆتىڭ ايتۋىنشا, مۇگەدەكتەر ارباسىنىڭ دوڭگەلەكتەرىن مەحانيكالىق قۇرىلعىمەن جۋ ارقىلى ءبىرشاما ۋاقىتتى ۇنەمدەۋگە بولادى, قوسىمشا كۇش-جىگەر مەن ىڭعايسىزدىقتى قاجەت ەتپەگەندىكتەن ادامنىڭ پسيحولوگيالىق جاعدايى دا جاقسارادى. مۇنداي جابدىقتار الەۋمەتتىك جانە مەديتسينالىق مەكەمەلەردە, سپورت كەشەندەرىندە, حالىققا قىزمەت كورسەتۋ ورتالىقتارىندا جانە باسقا دا قوعامدىق ورىنداردا ورناتىلسا, قۇبا-قۇپ بولار ەدى.
ا. وتورباەۆ مۇگەدەكتىگى بار ادام بولعاندىقتان ەرەكشە قاجەتتىلىكتەرى بار ادامداردىڭ ءومىر ءسۇرۋ جاعدايلارىن جاقسارتۋ قانشالىقتى ماڭىزدى ەكەنىن باسقالاردان ارتىق تۇسىنەدى. ءوزى جوعارى ءبىلىمدى, اربامەن سپورتتىق بي بيلەۋدەن حالىقارالىق دارەجەدەگى سپورت شەبەرى, الەم چەمپيوناتتارى مەن پارازيادالىق ويىنداردىڭ بىرنەشە دۇركىن جۇلدەگەرى, قازاقستان پاراليمپيادالىق قۇراماسىنىڭ مۇشەسى.
قازىر ول «دوس» تاۋەلسىز ءومىر» مۇگەدەكتەر قوعامدىق بىرلەستىگىنىڭ اتقارۋشى ديرەكتورى بولىپ جۇمىس ىستەيدى جانە مۇگەدەكتەر ارباسىنداعى ادامداردىڭ ءومىرىن نەعۇرلىم ىڭعايلى جانە تاۋەلسىز ەتۋ ءۇشىن جاڭا پايدالى مودەلدەر ويلاپ تاپقان كونسترۋكتورلىق بيۋرونى باسقارادى. سونىمەن قاتار ارداق بۇگىندە ءۇش بالانى تاربيەلەپ وتىر.
«مەن ءۇشىن اربا – بۇل مەنىڭ ارمانىمدى جۇزەگە اسىراتىن, جۇمىس ىستەيتىن, بالالاردى تاربيەلەيتىن, سپورتپەن اينالىساتىن, ءوز سەزىمدەرىم مەن ويلارىمدى بىلدىرەتىن, ءبىر سوزبەن ايتقاندا ءومىردى ونىڭ بارلىق كورىنىستەرىندە جاقسى كورەتىن ءومىر سالتىم», دەيدى ول.
ول مەكتەپ جاسىنان باستاپ تەحنيكانى جوندەۋمەن اينالىسا باستاعان. سول كەزدەن-اق اكەسىنىڭ كولىگىن جوندەۋگە, مەكتەپتە سىنعان جيھازدى قالپىنا كەلتىرۋگە كومەك قولىن سوزاتىن. ۋاقىت وتە كەلە ول اۆتومەحانيكامەن كاسىبي تۇردە اينالىسۋدى قولعا العان.
ء«وزىمنىڭ اربامدى جوندەۋ پروتسەسى مەنى ەلوردامىزدا مۇگەدەكتەر تەحنيكاسىن جوندەۋ بويىنشا قىزمەتتەر جوق دەگەن ويعا الىپ كەلدى. وسىلايشا, مۇگەدەكتەر تەحنيكاسىنا قىزمەت كورسەتۋ بويىنشا «ينۆا ستو» بىرىڭعاي سەرۆيستىك ورتالىعىن قۇرۋ يدەياسى تۋدى, وندا ءبىز اربالاردى جوندەۋدەن باستاپ جاڭعىرتۋعا دەيىن, جاڭا كونسترۋكتورلىق شەشىمدەر ويلاپ تابۋعا دەيىنگى قىزمەتتەردى ۇسىنامىز. بىزدە جالعا بەرۋ قىزمەتى دە بار», دەيدى كونسترۋكتور.
يدەيانى ىسكە اسىرۋ «Samruk Kazyna Trust» الەۋمەتتىك جوبالاردى دامىتۋ قورى مەن الەۋمەتتىك كاسىپكەرلىكتى دامىتۋعا باعىتتالعان «ارەكەت» جوباسىنىڭ ارقاسىندا مۇمكىن بولدى. 2019 جىلى قوعامدىق بىرلەستىك قوردىڭ گرانتىن جەڭىپ الىپ, ورتالىقتىڭ ماتەريالدىق-تەحنيكالىق بازاسىن نىعايتىپ, ارباداعى مۇگەدەكتەردىڭ جەكە قاجەتتىلىكتەرى ءۇشىن مۇگەدەكتەر اربالارىن جاڭعىرتۋ جانە وڭالتۋدىڭ قوسىمشا قۇرالدارىن قۇرۋ قىزمەتتەرىن ىسكە قوستى.
«الەۋمەتتىك كاسىپكەرلىك - بۇل تابىس تابۋ كوزى ەمەس, ول الەۋمەتتىك ماقساتتارعا قول جەتكىزۋدىڭ قۇرالى بولىپ تابىلاتىن الەۋمەتتىك ماقساتتار مەن كوممەرتسيالىق قۇراۋىشتىڭ تەڭگەرىمى. مىسالى, ءبىز مۇگەدەك ادامدارعا اربالاردى جوندەۋگە كومەكتەسۋ ارقىلى ماسەلەنى شەشەمىز. سونىمەن قاتار ءبىز جوبامىزعا ەرەكشە قاجەتتىلىكتەرى بار ادامداردى جۇمىسقا ورنالاستىردىق, ياعني جۇمىسسىزدىق ماسەلەسىن شەشىپ قانا قويماي, وسىنداي ادامداردىڭ قوعامدا الەۋمەتتەنۋىنە كومەكتەسەمىز», دەيدى ا. وتورباەۆ.
ونىڭ ايتۋىنشا, الىنعان تابىس الەۋمەتتىك ماسەلەلەردى شەشۋگە, مىسالى, مۇقتاجدارعا ارنالعان مۇگەدەكتەر اربالارىن وتەۋسىز جوندەۋگە, حالىقتىڭ وسال توپتارىنا ماتەريالدىق كومەك كورسەتۋگە, ەرەكشە بالالارعا ارنالعان شەبەرلىك ساباقتارىنا, مۇگەدەكتىگى بار ادامدار ءۇشىن نۇر-سۇلتاننىڭ كورىكتى جەرلەرى بويىنشا ەكسكۋرسيالار ۇيىمداستىرۋعا باعىتتالادى.
