قازاقستان ەلشىسى ا.كامالدينوۆ قازاقستان مەن كانادا اراسىندا قالىپتاسقان قاتىناستاردىڭ جوعارى دەڭگەيىن جانە ولارداعى ەكى ەلدىڭ پارلامەنتتەرى دەڭگەيىندەگى ديالوگتىڭ ەرەكشە ماڭىزدىلىعىن اتاپ ءوتتى.
قازاقستاندىق ديپلومات كانادا پارلامەنتىنىڭ توراعاسىنا قازاقستانداعى ساياسي وزگەرىستەر مەن پرەزيدەنت ق.توقاەۆتىڭ ەلدە جۇرگىزىپ وتىرعان دەموكراتيالىق رەفورمالار تۋرالى حاباردار ەتتى, سونداي-اق 2021 جىلعى 10 قاڭتارعا جوسپارلانعان قازاقستان پارلامەنتى ءماجىلىسىنىڭ كەزەكتى سايلاۋى وتەتىندىگىن ايتتى. ا.كامالدينوۆ كانادالىق دەپۋتاتتىڭ نازارىن 2019 جانە 2020 جىلدارى قازاقستاندا بىرقاتار زاڭدارعا ەنگىزىلگەن تۇزەتۋلەر ازاماتتىق قوعامدى دامىتۋ, كوپپارتيالى جۇيەنى قۇرۋ, ساياسي باسەكەلەستىكتى جانە قازاقستانداعى پىكىرلەردىڭ ءپليۋراليزمىن قامتاماسىز ەتۋ جولىندا ماڭىزدى جەتىستىكتەر بولىپ تابىلادى دەدى.
Cۇحبات بارىسىندا پارلامەنتارالىق ىنتىماقتاستىق ماسەلەلەرى بويىنشا جان-جاقتى پىكىر الماسۋلار بولدى. تاراپتار كەلەسى جىلى وتەتىن ەكىجاقتى ءىس-شارالاردىڭ كۇن تارتىبىنە, سونداي-اق قازاقستان-كانادا پارلامەنتتىك دوستىق توبىنىڭ قىزمەتىن قالپىنا كەلتىرۋگە ەرەكشە نازار اۋداردى.
دج.فيۋري قازاقستاندى كانادانىڭ سەنىمدى جانە تۇراقتى سەرىكتەسى دەپ اتادى جانە ەلدىڭ ساياسي جۇيەسىن جاڭارتۋ ماقساتىندا جۇرگىزىلىپ جاتقان رەفورمالارعا وڭ باعا بەردى. ونىڭ ايتۋىنشا, قازاقستان كانادانىڭ ورتالىق ازياداعى ەڭ ءىرى سەرىكتەسى بولىپ تابىلادى جانە ءبىزدىڭ ەلدەرىمىز تاۋار اينالىمىن ودان ءارى ارتتىرۋ ءۇشىن ۇلكەن الەۋەتكە يە. سەنات توراعاسى سونىمەن قاتار قازاقستان مەن كانادا اراسىنداعى پارلامەنتتىك ديالوگتى دامىتۋعا ىقپال ەتۋگە دايىن ەكەنىن ءبىلدىردى.
سۇحباتتىڭ سوڭىندا دج.فيۋري جان-جاقتى پىكىر الماسقانى ءۇشىن العىسىن ءبىلدىرىپ, كەلە جاتقان قازاقستان تاۋەلسىزدىگىنىڭ 29 جىلدىعى مەرەكەسىمەن قۇتتىقتادى.
