اتىراۋ وبلىسىندا مەملەكەتتىڭ يەلىگىندەگى ورماننىڭ قورى 52 400 گەكتاردى قۇرايدى. ونىڭ ىشىندە ورماندى القاپ – 15 100 گەكتار. ورمان القاپتارى جايىق پەن قيعاش وزەندەرىنىڭ جاعاسىندا عانا وسىرىلەدى.
«ەكولوگيا, گەولوگيا جانە تابيعي رەسۋرستار مينيسترلىگىمەن بىرلەسە جاساقتالعان ورمانداردى تولىقتىرۋ, ورمان ءوسىرۋ كولەمىن ۇلعايتۋعا قاتىستى قادامدىق جوسپار جاساقتالدى. سوعان سايكەس وبلىستا 2020-2025 جىلدارى ارالىعىندا 2 800 گەكتار ورمان القابىندا 7 ميلليوننان استام كوشەتىن ەگۋ جوسپارلاندى», - دەيدى وبلىس اكىمى ماحامبەت دوسمۇحامبەتوۆ.
اكىمنىڭ پىكىرىنشە, جايىق وزەنىنىڭ بويىنداعى توعايلاردى قالپىنا كەلتىرۋ, جايىلما القاپتاردى جاسىل جەلەكپەن كومكەرۋ اتىراۋ ءوڭىرىنىڭ ەكولوگيالىق احۋالىن جاقسارتۋعا وڭ اسەرىن تيگىزەدى.
«قازىر مەجەلەنگەن جوسپارعا سايكەس, ءاربىر ورمان شارۋاشىلىعى مەكەمەسى كوشەت ەگىلەتىن ۋچاسكەلەر مەن اعاش تۇرلەرى انىقتالىپ, ناقتى جوسپار جاسالدى. مۇنداي اۋقىمدى جۇمىستى اتقارۋ ورمان شارۋاشىلىعى مەكەمەلەرىن ماتەريالدىق-تەحنيكالىق جاراقتاندىرۋ دەڭگەيىنە بايلانىستى بولىپ وتىر. سوڭعى ءۇش جىلدا جەرگىلىكتى بيۋدجەتتەن 427 ملن تەڭگەگە 3 ورمان مەكەمەسىنە ماشينا-تراكتور پاركى, ءورت ءسوندىرۋ ستانتسيالارى, جۇمىس كەستەسى بار كەشەندەر, 2 ءورت باقىلاۋ مۇناراسى سالىنىپ, پايدالانۋعا بەرىلدى», - دەيدى اكىم.
سونداي-اق ورمان مەكەمەلەرىن جاراقتاندىرۋعا جەرگىلىكتى بيۋدجەتتەن 206 ملن تەڭگە ءبولىندى. ال 2020-2025 جىلدارعا ارنالعان قادامدىق جوسپاردى ىسكە اسىرۋعا قاجەتتى قارجى كولەمى 769 ملن تەڭگەنى قۇرايدى.
