ءىس-شاراعا شىعارماشىلىق جانە عىلىم, زيالى قاۋىم, ۇلتتىق عىلىم اكادەمياسىنىڭ وكىلدەرى, ازەربايجاندىق ابايتانۋشىلار جانە «ازەربايجان-قازاقستان» دوستىق قوعامىنىڭ باسشىلىعى قاتىستى.
ءوز سوزىندە قازاقستاننىڭ ەلشىسى سەرجان ابدىكارىموۆ مەملەكەت باسشىسىنىڭ جارلىعىنا سايكەس ابايدىڭ مەرەيتويى وسى جىلى حالىقارالىق جانە ۇلتتىق دەڭگەيدە مەرەكەلەنگەنىن ايتتى. ابايتانۋدىڭ جەكە ادەبيەتتانۋ عىلىمى رەتىندە نەگىزىن قالاۋشى, كورنەكتى قازاق جازۋشىسى مۇحتار ومارحان ۇلى اۋەزوۆ ەكەنى اتاپ ءوتىلدى. ونىڭ «اباي جولى» رومان-ەپوپەياسى دۇنيەجۇزى ادەبيەتىنىڭ كىتاپحاناسىنا ەنىپ, الەمنىڭ 116 تىلىنە اۋدارىلىپ, ۇلى قازاق ويشىلىنىڭ باعا جەتپەس شىعارماشىلىق جانە رۋحاني مۇراسىن بۇكىل الەمگە اشتى.
كەزدەسۋدىڭ باستى وقيعاسى باكۋ سلاۆيان ۋنيۆەرسيتەتىنىڭ پروفەسسورى, فيلولوگيا عىلىمدارىنىڭ دوكتورى نيزامي مامەدوۆ-تاگيسويدىڭ ازەربايجان تىلىندەگى «مۇحتار اۋەزوۆتىڭ شىعارماشىلىعى: داستۇردەن جاڭاشىلدىققا» اتتى كىتابىنىڭ تۇساۋكەسەرى بولدى. اۆتور قازاق جازۋشىسىنىڭ فەنومەنىن جاڭا فيلوسوفيالىق-ەستەتيكالىق جانە الەۋمەتتىك-كوركەمدىك تۇرعىدان تەرەڭ زەرتتەگەن. كىتاپ قر تۇڭعىش پرەزيدەنتى – ەلباسى ن.ءا.نازارباەۆتىڭ «بولاشاققا باعدار: رۋحاني جاڭعىرۋ» باعدارلاماسىن جۇزەگە اسىرۋ اياسىندا جارىق كوردى.
ءىس-شارا بارىسىندا قوناقتارعا جازۋشىنىڭ ۇلى, قوعام قايراتكەرى مۇرات اۋەزوۆتىڭ بەينە ۇندەۋى ۇسىنىلدى, وندا ول اۆتورعا قازاق جازۋشىسىن ەسكە الۋىنا قۇرمەت كورسەتكەن, ازەربايجان وقىرمانىنا ونىڭ شىعارماشىلىق مۇراسى مەن تالانتىن كورسەتكەنى ءۇشىن جانە قازاق ادەبيەتى مەن مادەنيەتىن باۋىرلاس ەلدە تانىمال ەتكەندىكتەرىنە ءوز العىسىن ءبىلدىردى.
ءوز سوزدەرىندە ازەربايجاندىق قالام شەبەرلەرى مۇحتار اۋەزوۆتىڭ ابايدىڭ رۋحاني الەمىنىڭ اشىلۋىنا قوسقان زور ۇلەسىن, سول كەزدەگى كۇردەلى جاعدايدا قازاق ادەبيەتتانۋىنىڭ, پروزاسى مەن دراماتۋرگياسىنىڭ قالىپتاسۋىن, شىعارمالاردىڭ جوعارى ساپاسى مەن بۇكىل تۇركى الەمى ءۇشىن قۇندى بولىپ تابىلاتىن سان قىرلى ۇلتتىق ەرەكشەلىگىن اتاپ ءوتتى.
تۇساۋكەسەر ءراسىمى مۇحتار اۋەزوۆتىڭ ءومىرى مەن قىزمەتى تۋرالى دەرەكتى ءفيلمدى كورۋىمەن اياقتالدى جانە اباي قۇنانباي ۇلىنىڭ 175 جىلدىعىن مەرەكەلەۋ اياسىندا وتكىزىلگەن قورىتىندى ءىس-شارا بولدى.
