پارلامەنت ءماجىلىسى دەپۋتاتتارىن سايلاۋدىڭ ەرەكشەلىكتەرى مەن رولىنە ساراپتامالىق تالقىلاۋ جاساپ, ەل ازاماتتارىنىڭ ساياسي مادەنيەتىن ارتتىرۋ ماقساتىندا وتكەن دوڭگەلەك ۇستەلگە قازاقستاندىق عالىمدار مەن ساراپشىلار قاتىستى.
ەۋرازيالىق ينتەگراتسيا ينستيتۋتىنىڭ ديرەكتورى ەرلان سايروۆتىڭ ايتۋىنشا, ەلىمىز پارلامەنتتىك سايلاۋدىڭ جاۋاپتى كەزەڭىنە اياق باستى. پرەزيدەنتىمىز قاسىم-جومارت توقاەۆتىڭ باستاماسىمەن ۇلتتىق قوعامدىق سەنىم كەڭەسى قۇرىلىپ, ساياسي رەفورمالاردىڭ العاشقى پاكەتى ازىرلەندى. سونىڭ شەڭبەرىندە ميتينگىلەر تۋرالى جاڭا زاڭ كۇشىنە ەندى. بۇدان باسقا جەتى زاڭنامالىق اكتىگە وزگەرىستەر ەنگىزىلدى. وندا ايەلدەر مەن جاستاردىڭ سايلاۋ پارتيالىق تىزىمدەرىنە قاتىسۋىنىڭ 30%-دىق كۆوتاسى بەكىتىلدى, ساياسي پارتيالاردى تىركەۋ شەگى 50%-عا تومەندەتىلدى. العاش رەت پارلامەنتتىك وپپوزيتسيا ينستيتۋتى ەنگىزىلدى. بۇل رەتتە قازاقستان – تۇراقسىز الەمدەگى تۇراقتى مەملەكەت ەكەنىن, ال الداعى سايلاۋ – ەلدىڭ ەۆوليۋتسيالىق دامۋ جولىنداعى جانە ازاماتتاردىڭ ساياسي مادەنيەتىنىڭ دەڭگەيىن ارتتىرۋداعى كەلەسى قادام ەكەنىن ەستە ۇستاعان ءجون. ناتيجەسىندە بارلىق ساياسي جۇمىستار, سونىڭ ىشىندە سايلاۋ جۇمىسى قوعام مەن ازاماتتاردىڭ بىرىگۋى جولىندا جۇمىس ىستەۋى كەرەك.
– الەمدە بولىپ جاتقان كورونوۆيرۋس ينفەكتسياسىنا قاراماستان, ەلىمىزدە الەۋمەتتىك سالاعا ءمان بەرىلۋدە. سوڭعى ءتورت جىلدا قازاقستاندا 3 مىڭنان استام بالاباقشا, 2 مىڭنان استام مەكتەپ سالىنعان. وسىنداي وڭدى وزگەرىستەر ارقاسىندا حالىقتىڭ بيلىككە دەگەن سەنىمى ارتىپ كەلەدى, – دەدى ەرلان سايروۆ.
دوڭگەلەك ۇستەلدە ءسوز العان شىعىس قازاقستان مەملەكەتتىك ۋنيۆەرسيتەتىنىڭ رەكتورى مۇحتار تولەگەننىڭ پىكىرىنشە, الداعى سايلاۋ ادەتتەگىدەن وزگەشە شەشىم قابىلدايتىن كوشباسشى جاستاردى انىقتايدى.
– سايلاۋ ناۋقانى باستالعانعا دەيىن ەلىمىزدىڭ قوعامدىق-ساياسي ومىرىنە بارلىق ساناتتاعى ازاماتتاردىڭ قاتىسۋىن ارتتىرۋ بويىنشا شارالار جۇرگىزىلدى. بۇل پروپورتسيونالدى مودەل الەمدىك دەموكراتيالىق تاجىريبەگە تولىق سايكەس كەلەدى, ساياسي جۇيەنى نىعايتۋعا, دەموكراتيانى دامىتۋعا ىقپال ەتەدى, ساياسي پارتيالاردىڭ قىزمەتىن جانداندىرادى. الداعى سايلاۋ وسىعان دەيىنگىلەردىڭ بارلىعىنان ەرەكشە. ونىڭ ەرەكشەلىگى, ۇگىت-ناسيحاتقا دەيىنگى ۇزاق كەزەڭ, ياعني 51 كۇن, – دەدى مۇحتار تولەگەن.
ال ساياساتتانۋشى قازبەك مايگەلدينوۆ پارلامەنت ءماجىلىسى دەپۋتاتتارىنىڭ كەزەكتى سايلاۋىنا قاتىستى ماسەلەلەر نۇر-سۇلتان قالاسىندا عانا ەمەس, ەلىمىزدىڭ باسقا ايماقتارىندا, اۋدانداردا تالقىعا سالىنعانى دۇرىس ەكەنىن العا تارتادى. ونىڭ ايتۋىنشا, 10 قاڭتاردا بولاتىن سايلاۋ ەرەكشە رەجىمدە وتكىزىلمەك. ولاي دەيتىنى, بۇل سايلاۋ كوروناۆيرۋس پاندەمياسىنا, الەمدەگى ەكونوميكالىق داعدارىسقا تۇسپا-تۇس كەلىپ وتىر. كەيبىر ۇمىتكەرلەر وسىنى پايدالانىپ ادەمى سوزدەردى, قۇرعاق ۋادەلەردى ءۇيىپ-توگۋى دە مۇمكىن. سوندىقتان حالىق تاڭداۋ جاسار كەزدە جان-جاقتى ويلانىپ, ءوز تاڭداۋلارىن جاساۋى ءتيىس.
سونداي-اق وزگە دە ساراپشىلار ءوز ويلارىن ورتاعا سالدى. ولاردىڭ ىشىندە پرايمەريزگە قاتىسىپ, ىرىكتەۋ سىننان وتكەندەر دە بولدى. ەندەشە, سايلاۋدىڭ ءار قازاقستاندىق ازامات ءۇشىن ماڭىزدى ەكەنىن قاپەرىمىزدە ۇستاپ, جاۋاپكەرشىلىك تانىتقان ابزال. دوڭگەلەك ۇستەلدە سايلاۋ ناتيجەسى مەملەكەتتىڭ الداعى 5 جىلىنا تىكەلەي اسەر ەتەتىنى دە ايتىلدى.
شىعىس قازاقستان وبلىسى
